.jpg)
ពលរដ្ឋទទួលការចាក់វ៉ាក់សាំងកូវីដ ១៩ ដូសជំរុញនៅខណ្ឌដូនពេញ រាជធានីភ្នំពេញ ពីថ្ងៃទី ៤ ឧសភា។ ហេង ជីវ័ន
ភ្នំពេញៈ គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) នឹងចាប់ផ្តើមការចាក់វ៉ាក់សាំងកូវីដ ១៩ ដូសទី ៥ ជូនប្រជាពលរដ្ឋចាប់ពីថ្នាក់ដឹកនាំក្នុង ជួររាជរដ្ឋាភិបាលក្រុមគ្រូពេទ្យជួរមុខទាំងរដ្ឋ និងឯកជន អាជ្ញាធរមូលដ្ឋាន ជនវ័យចាស់ និងអ្នកដែលមានអាយុពី ១២ ឆ្នាំឡើង ចាប់ពីថ្ងៃទី ៩ ខែមិថុនា ខាងមុខនេះ។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធាន គ.វ.ក-១៩ បានឱ្យដឹងថា យុទ្ធនាការចាក់វ៉ាក់សាំងកូវីដ ១៩ ដូសទី ៥ ដល់មន្ត្រីជួរមុខ និងក្រុមគោលដៅអាទិភាព ចាប់ពីថ្ងៃទី ៩ ខែមិថុនា ដោយយោងតាមចំណារឯកភាពដ៏ខ្ពង់ខ្ពស់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី ២០ ខែឧសភា។
លោកស្រីថា៖ «គ.វ.ក-១៩ នឹងផ្តល់ការចាក់វ៉ាក់សាំងដូសទី ៥ ដល់ថ្នាក់ដឹកនាំរាជរដ្ឋាភិបាល ព្រឹទ្ធសភា រដ្ឋសភា ក្រុមគ្រូពេទ្យជួរមុខអាជ្ញាធរមូលដ្ឋាន បុគ្គលិកស្ថានទូត អង្គការ-ជាតិ-អន្តរជាតិ អ្នកសារព័ត៌មាន សិល្បករ និងក្រុមមនុស្សមានប្រព័ន្ធការពារខ្សោយ ដែលមានអាយុចាប់ពី ១២ ឆ្នាំឡើង ដែលបានចាក់ដូសទី ៤ រួច មានគម្លាតយ៉ាងតិច ៣ ខែឡើង»។
មន្ទីរពេទ្យ ដែលមានការចាក់វ៉ាក់សាំងកូវីដ ១៩ ដូសទី ៥ នេះ មាននៅមន្ទីរពេទ្យកាល់ម៉ែត មន្ទីរពេទ្យព្រះអង្គឌួង មន្ទីរពេទ្យកុមារជាតិ មន្ទីរពេទ្យមិត្តភាពខ្មែ-សូវៀត មជ្ឈមណ្ឌលជាតិគាំពារមាតា និងទារក និងតាមមណ្ឌលសុខភាពមួយចំនួនទៀតផងដែរ។
ជាមួយគ្នានេះ លោកនាយករដ្ឋមន្ត្រី ហ៊ុន សែន បានថ្លែងពីទីក្រុងហ្សូរិច ប្រទេសស្វ៊ីសនាថ្ងៃទី ២២ ខែឧសភា ថា កម្ពុជាកំណត់យកវ៉ាក់សាំងជាអាវុធយុទ្ធសាស្ត្រសម្រាប់ប្រយុទ្ធជាមួយនឹងកូវីដ ១៩។
លោកមានប្រសាសន៍ថា៖ «ខ្ញុំបានអនុម័តឱ្យចាក់ដូសទី ៥ ចាប់ពីថ្ងៃទី ៩ ខែមិថុនា នេះតទៅ។ យើងមានវ៉ាក់សាំងដូចគ្នា ចាក់វ៉ាក់សាំងដូចគ្នា ប៉ុន្តែបើការចេញដំណើរមិនត្រូវ នោះភាពស៊ាំសហគមន៍នឹងមិនរឹងមាំទេ។ កម្ពុជាបានអនុវត្តតាមអភិក្រមផ្ការីក»។
លោកក៏បានបញ្ជាក់ដែរថា កម្ពុជាទទួលបានវ៉ាក់សាំងក្នុងដៃសរុបប្រមាណ ៥២ លានដូស ហើយ ៤២ លានដូសត្រូវបានប្រើប្រាស់ ក្នុងនោះមាន ២៨,៥ លានដូស គឺកម្ពុជាប្រើប្រាស់ថវិកាជាតិទៅទិញ។ នេះបង្ហាញថា កម្ពុជាមិនបណ្តែតបណ្តោយឱ្យពលរដ្ឋស្លាប់ ដោយសារជំងឺកូវីដ ១៩ នោះឡើយ។ ការដាក់ចេញកម្មវិធីចាក់វ៉ាក់សាំង ដោយការប្រមូលផ្តុំនេះបាននាំឱ្យកម្ពុជាបង្កើតបានភាពស៊ាំសហគមន៍ខ្លាំង និងទប់ស្កាត់ការរីករាលដាលបានលឿនរហ័ស។
ឆ្លៀតឱកាសនោះដែរលោក ហ៊ុន សែន ក៏បានលើកឡើងពីស្ថានភាពនៃការឆ្លងវីរុសកូវីដ ១៩ ក្នុងប្រទេសកម្ពុជាផងដែរ ដោយលោកបញ្ជាក់ថា រយៈពេល ១៥ ថ្ងៃជាប់ៗគ្នាកន្លងមក កម្ពុជាមិនមានអ្នកឆ្លងថ្មីឡើយ។ រីឯអ្នកជំងឺកំពុងសម្រាកព្យាបាលជំងឺកូវីដនៅមន្ទីរពេទ្យមានចំនួនតែ ៨ នាក់ទៀតប៉ុណ្ណោះ ក្នុងនោះរាជធានីភ្នំពេញមានចំនួន ៤ នាក់ និងខេត្តបាត់ដំបងចំនួន ៤ នាក់។
ទោះបីជាស្ថានភាពនៃការឆ្លងវីរុសកូវីដ ១៩ មានភាពប្រសើរក៏ដោយ ប៉ុន្តែលោកនាយករដ្ឋមន្ត្រី ហ៊ុន សែន នៅតែអំពាវនាវដល់ប្រជាពលរដ្ឋទាំងអស់ សុំបន្តរក្សានូវស្ថានភាពដ៏ល្អប្រសើរនេះតាមរយៈការការពារខ្លួន ចំពោះមុខការរាតត្បាតនៃជំងឺនេះ ដែលមិនទាន់បានបញ្ចប់ជាមួយនឹងការទទួលយកវ៉ាក់សាំង។
លោកបញ្ជាក់ថា៖ «យើងកំពុងសាងសង់មន្ទីរពេទ្យមួយ ដែលមានសមត្ថភាពទទួលអ្នកជំងឺរហូតដល់ ១ ម៉ឺននាក់។ ការប្រយុទ្ធជាមួយនឹងជំងឺមួយនេះមិនមែនជាការប្រយុទ្ធធម្មតានោះទេ ទម្រាំយើងទទួលបានជោគជ័យលើសមរភូមិកូវីដ ១៩»។
យោងតាមរបាយការណ៍របស់ក្រសួងសុខាភិបាល គិតត្រឹមថ្ងៃទី ២១ ខែឧសភា លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦ លាននាក់បាន ៩៣,៨៧%។ សម្រាប់អ្នកដែលបានចាក់ដូសទី ៣ បានចំនួនជាង ៩ លាននាក់ និងអ្នកចាក់ដូសទី ៤ បានចំនួនជាង ២ លាននាក់។
លោក ហ៊ុន សែន បានសង្កត់ធ្ងន់ថា៖ «វ៉ាក់សាំងនៅកម្ពុជា គឺជាវ៉ាក់សាំងជោគជ័យ ដែលរាប់ទាំងបញ្ហាមិនប្រកាន់និន្នាការនយោបាយឡើយ។ វ៉ាក់សាំងនៅកម្ពុជាមិនមានពណ៌សម្បុរនយោបាយ ជាតិសាសន៍ ឬសាសនាណាមួយឡើយ។ នេះគឺជាជោគជ័យរបស់ជាតិយើង»៕
