ភ្នំពេញៈ អាជ្ញាធរមីនអំពាវនាវដល់ភាគីពាក់ព័ន្ធឱ្យពន្លឿនការគាំទ្រដល់សកម្មភាពបោសសម្អាតមីន ដើម្បីសម្រេចបានគោលដៅគ្មានមីននៅកម្ពុជាក្នុងឆ្នាំ ២០២៥ ខណៈកម្ពុជាត្រូវការរំដោះផ្ទៃដីមានមីនដែលបានដឹងជាង ៧០០ គីឡូម៉ែត្រការ៉េត្រឹមឆ្នាំ ២០២៥ ។
លោក លី ធុជ ទេសរដ្ឋមន្ត្រី និងអនុប្រធានទី ១ អាជ្ញាធរមីនថ្លែងថា ដើម្បីបំពេញកាតព្វកិច្ចរបស់កម្ពុជាក្រោមអនុសញ្ញាហាមប្រាមមីនប្រឆាំងមនុស្ស អាជ្ញាធរមីនត្រូវបោសសម្អាតដីដែលមានមីនប្រហែល ៧៣៦ គីឡូម៉ែត្រការ៉េនៅឆ្នាំ ២០២៥។
លោកថ្លែងថា៖ «ទោះបីជាមានមហិច្ឆតាក៏ដោយ ប៉ុន្តែកាលកំណត់ឆ្នាំ ២០២៥ គឺជាគោលដៅដែលអាចសម្រេចបាន ប្រសិនបើរាជរដ្ឋាភិបាលកម្ពុជា សហគមន៍ម្ចាស់ជំនួយអន្តរជាតិ ដៃគូអភិវឌ្ឍន៍ និងវិស័យឯកជនធ្វើការរួមគ្នា និងពន្លឿនការគាំទ្ររបស់ពួកគេចំពោះសកម្មភាពមីន»។
លោកថ្លែងដូច្នេះក្នុងវេទិកាកិច្ចសន្ទនាកម្រិតខ្ពស់ស្តីពីសកម្មភាពមីនពីថ្ងៃទី ២០ ឧសភា ដើម្បីពង្រីក និងលើកកម្ពស់ភាពជាដៃគូឆ្ពោះទៅរកកម្ពុជាគ្មានមីនឆ្នាំ ២០២៥ នៅខេត្តសៀមរាប ដោយអាជ្ញាធរមីន និងស្ថានទូតអូស្ត្រាលីប្រចាំនៅកម្ពុជាធ្វើជាសហប្រធានដឹកនាំ។
លោក លី ធុជ ថ្លែងថា៖ «ការបរិច្ចាគរបស់អ្នកនឹងធ្វើឱ្យប្រទេសកម្ពុជារួចផុតពីផលប៉ះពាល់យ៉ាងខ្លាំងដោយសារមីន និងសំណល់ជាតិផ្ទុះពីសង្គ្រាមផ្សេងទៀត។ យើងមិនត្រឹមតែស្នើសុំការបរិច្ចាគដ៏សប្បុរសរបស់អ្នកប៉ុណ្ណោះទេ ប៉ុន្តែយើងក៏ចង់បានជំនួយរបស់អ្នកក្នុងការរៃអង្គាសថវិកា និងធ្វើការជាមួយយើងលើមធ្យោបាយថ្មីក្នុងការរៃអង្គាសថវិកានៅក្នុងប្រទេសផងដែរ ដើម្បីរ៉ាប់រងរាល់ការចំណាយទាំងអស់ ដើម្បីបោសសម្អាត សំណល់ជាតិផ្ទុះពីសង្គ្រាមទាំងអស់នៅកម្ពុជា»។
លោកបន្តថា អាជ្ញាធរមីនបានបង្កើតឱ្យមានគោលការណ៍ណែនាំស្តីពីការអនុវត្តយន្តការភូមិអស់មីនក្នុងគោលបំណងកៀរគរធនធានហិរញ្ញវត្ថុបន្ថែមពីម្ចាស់ជំនួយ ដៃគូអភិវឌ្ឍន៍ វិស័យឯកជន អង្គការសង្គមស៊ីវិល និងសប្បុរសជននានា ជាពិសេសនឹងផ្តល់លទ្ធភាពឱ្យម្ចាស់ជំនួយ ឬសប្បុរសជននានាដែលមានថវិកាតិចតួចអាចចូលរួមជាមួយរាជរដ្ឋាភិបាលកម្ពុជា ដើម្បីឃើញនូវលទ្ធផលភ្លាមៗក្នុងការធានាឱ្យភូមិទាំងមូលគ្មានមីន និងផ្តល់ឱ្យសហគមន៍។
លោកទេសរដ្ឋមន្ត្រីរូបនេះថ្លែងថា៖ «ដើម្បីសម្រេចបាននូវចក្ខុវិស័យឆ្នាំ ២០២៥ កម្ពុជាគ្មានមីនកាត់បន្ថយការគំរាមកំហែងនៃសំណល់ជាតិផ្ទុះពីសង្គ្រាមជាអប្បបរមា និងការអភិវឌ្ឍសេដ្ឋកិច្ចសង្គមប្រកបដោយសុវត្ថិភាព យើងត្រូវបន្តពង្រឹងកិច្ចខិតខំប្រឹងប្រែងកៀរគរធនធានពីគ្រប់ភាគីពាក់ព័ន្ធពង្រឹងទំនាក់ទំនងល្អជាមួយម្ចាស់ជំនួយដែលបានកសាងទំនុកចិត្តគ្នា និងសម្រេចនូវសមិទ្ធផលរួមជាច្រើនឆ្នាំ និងស្វែងរកកិច្ចសហប្រតិបត្តិការបន្ថែមជាមួយម្ចាស់ជំនួយថ្មីៗនាពេលខាងមុខ»។
ក្នុងនាមជារដ្ឋភាគីនៃអនុសញ្ញាហាមប្រាមគ្រាប់មីនប្រឆាំងមនុស្ស (អនុសញ្ញាអូតាវ៉ា) និងជាអ្នកសង្កេតការណ៍នៃអនុសញ្ញាស្តីពីគ្រាប់បែកចង្កោម រាជរដ្ឋាភិបាលកម្ពុជាបានចាត់ទុកវិស័យសកម្មភាពមីន គឺជាការងារអាទិភាពរបស់ជាតិដ៏សំខាន់តាមរយៈការដាក់ចេញនូវគោលដៅទី ១៨ នៃគោលដៅអភិវឌ្ឍន៍ប្រកបដោយចីរភាពកម្ពុជា (CSDG18) ដែលត្រូវបានប្រកាសនៅក្នុងយុទ្ធសាស្ត្រចតុកោណដំណាក់កាលទី ៤ និងផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣។
រាជរដ្ឋាភិបាលកម្ពុជាបានតាំងចិត្តលុបបំបាត់វត្តមានគ្រាប់មីនដែលបានដឹងឱ្យអស់ត្រឹមឆ្នាំ ២០២៥ ក្នុងនាមជារដ្ឋភាគីនៃអនុសញ្ញាអូតាវ៉ាដូចបានចែងក្នុងផែនការយុទ្ធសាស្ត្រជាតិសកម្មភាពមីន (NMAS) ២០១៨-២០២៥។
គណៈប្រតិភូនៃវេទិកាកិច្ចសន្ទនាកម្រិតខ្ពស់ស្តីពីសកម្មភាពមីន ដែលមានតំណាងស្ថានទូតប្រចាំនៅកម្ពុជា ដៃគូអភិវឌ្ឍន៍ និងវិស័យឯកជនចុះទស្សនកិច្ចនៅសារមន្ទីរសន្តិភាពសកម្មភាពកំចាត់មីននៃមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) ដើម្បីស្វែងយល់អំពីសមិទ្ធផលការងារបោសសម្អាតមីន និងសំណល់ជាតិផ្ទុះដែលជាលទ្ធផលបានមកពីមរតកនៃសង្គ្រាមរ៉ាំរ៉ៃជាង ៣ ទសវត្សរ៍នៅកម្ពុជា។
លោក លី ធុជ ថ្លែងថា មជ្ឈមណ្ឌលស៊ីម៉ាក់បានធ្វើការក្នុងភាពជាដៃគូយ៉ាងជិតស្និទ្ធជាមួយអាជ្ញាធរមីន ដែលជាសេនាធិការរបស់រាជរដ្ឋាភិបាលកម្ពុជា ក្នុងការសម្របសម្រួលគ្រប់គ្រង និងត្រួតពិនិត្យវិស័យសកម្មភាពមីននៅកម្ពុជាក្នុងការឆ្លើយតបនឹងបញ្ហាមីន និងសំណល់ជាតិផ្ទុះពីសង្គ្រាម៕