ភ្នំពេញៈ ក្រសួងសុខាភិបាល និងទីភ្នាក់ងារសហប្រតិបត្តិការអន្តរជាតិកូរ៉េ (កយកា) បើកកិច្ចប្រជុំគណៈកម្មាធិការសម្របសម្រួលថ្នាក់ជាតិ សម្រាប់គម្រោងពង្រឹងសុខភាពមាតា និងទារក នៅខេត្តភាគឦសាននៃប្រទេសកម្ពុជាកាលពីថ្ងៃទី ២០ ឧសភា ដើម្បីចែករំលែកព័ត៌មានអំពីសកម្មភាពគម្រោង និងប្រមូលធាតុចូលពីភាគីពាក់ព័ន្ធសម្រាប់ផែនការអនាគតនៃការអនុវត្តគម្រោង។
ទីភ្នាក់ងារសហប្រតិបត្តិការអន្តរជាតិ-កូរ៉េ (កយកា) ឱ្យដឹងថា កិច្ចប្រជុំនេះត្រូវបានរៀបចំឡើងក្រោមអធិបតីភាពលោក នោ ហ្យន់ជូន (Hyunjun RHO) នាយកប្រចាំប្រទេសនៃការិយាល័យ កយកា នៅកម្ពុជា និងលោក ហុក គឹមឆេង អគ្គនាយកក្រសួងសុខាភិបាល។ កិច្ចប្រជុំនេះក៏មានការចូលរួមពីសមាជិកគណៈកម្មាធិការសម្របសម្រួលថ្នាក់ជាតិទាំងអស់ ដូចជា មន្ទីរសុខាភិបាលខេត្តមណ្ឌលគិរី និងរតនគិរី មជ្ឈមណ្ឌលជាតិគាំពារសុខភាពមាតា (NMCHC) មជ្ឈមណ្ឌលជាតិលើកកម្ពស់សុខភាព (NCHP) ដើម្បីចែករំលែកព័ត៌មាន និងប្រមូលធាតុចូលលើការអនុវត្តគម្រោង និងលើកផែនការអនុវត្តបន្ត។
កយកា លើកឡើងថា ការអនុវត្តគម្រោងរយៈពេល ៣ ឆ្នាំកន្លងមកនេះ គម្រោងបានធ្វើឱ្យល្អប្រសើរឡើងនូវការត្រៀមលក្ខណៈផ្តល់សេវារបស់មូលដ្ឋានសុខាភិបាល តាមរយៈការគាំទ្រការកសាងសមត្ថភាពដល់បុគ្គលិកសុខាភិបាល ការផ្តល់សម្ភារបរិក្ខារពេទ្យដល់មូលដ្ឋានសុខាភិបាល ខណៈការសាងសង់អគារសុខភាពមាតា និង ទារកទាំង ៥ នឹងត្រូវបញ្ចប់ក្នុងពេលឆាប់ៗ។
លើសពីនេះ លទ្ធភាពទទួលបានសេវារបស់សហគមន៍ក៏ត្រូវបានធ្វើឱ្យល្អប្រសើរឡើងផងដែរ តាមរយៈការពង្រឹងប្រព័ន្ធផ្ទេរអ្នកជំងឺ និងការផ្តល់នូវរថយន្តសង្គ្រោះបន្ទាន់ កាណូត និងការបង្កើនការយល់ដឹងរបស់សហគមន៍រួមនឹងសកម្មភាពផ្សព្វផ្សាយនៅតាមតំបន់ដាច់ស្រយាល។
លោក ហុក គឹមចេង លើកឡើងក្នុងកិច្ចប្រជុំថា គម្រោងនេះបាននិងកំពុងពង្រឹងសមត្ថភាពអ្នកវិជ្ជាជីវៈ ផ្នែកសុខាភិបាលតាមរយៈការបណ្តុះបណ្ដាលនានា និងបានធ្វើឱ្យល្អប្រសើរឡើងនូវប្រព័ន្ធបញ្ជូនអ្នកជំងឺ តាមរយៈការផ្ដល់នូវរថយន្តសង្គ្រោះបន្ទាន់ ទូក និងម៉ូតូផងដែរ។
យោងតាមទីភ្នាក់ងារ កយកា គម្រោងនេះផ្តោតលើផ្នែកសំខាន់ៗចំនួន ៤ គឺ ការកសាងសមត្ថភាពបុគ្គលិកសុខាភិបាល ការកែលម្អបរិស្ថានមូលដ្ឋានសុខាភិបាល ការផ្តល់សេវាសុខាភិបាលចំពោះទីតាំងដាច់ស្រយាល និងការលើកកម្ពស់ការយល់ដឹងពីសហគមន៍។
គួរបញ្ជាក់ដែរថា កាលពីដើមឆ្នាំ ២០២២ កន្លងទៅ កយកា និងក្រសួងសុខាភិបាលបានសាងសង់អគារសម្ភព និងថែទាំទារកនៃគម្រោងពង្រឹងសុខភាពមាតា និងទារកនៅភូមិភាគឦសាននៃប្រទេសកម្ពុជា (ខេត្តរតនគិរី និងមណ្ឌលគិរី)។
គម្រោងពង្រឹងសុខភាពមាតា និងទារកនៅភាគឦសាននៃប្រទេសកម្ពុជាមានរយៈពេល ៥ ឆ្នាំ (២០១៩-២០២៣) ត្រូវបានអនុវត្តក្រោមជំនួយឥតសំណងរបស់សាធារណរដ្ឋកូរ៉េ តាមរយៈទីភ្នាក់ងារ កយកា ក្នុងថវិកាប្រមាណជា ៧ លានដុល្លារសហរដ្ឋអាមេរិក។ គម្រោងនេះត្រូវបានអនុវត្តក្នុងខេត្តរតនគិរី និងមណ្ឌលគិរី ដែលមានគោលបំណង ដើម្បីធ្វើឱ្យប្រសើរឡើងនូវសុខភាពមាតា និងទារក តាមរយៈការធ្វើឱ្យល្អប្រសើរនូវគុណភាព និងការទទួលសេវាសុខភាពមាតា និងទារក៕