The Phnom Penh Post Search

Search form




Logo of Phnom Penh Post newspaper Phnom Penh Post - នគរបាល​កំពុង​បន្ត​ស៊ើបអង្កេត​ ករណី​រកឃើញ​សារធាតុ​ផ្សំ​ផលិត​គ្រឿងញៀន​ជាង​ ៦០ ​គីឡូ

នគរបាល​កំពុង​បន្ត​ស៊ើបអង្កេត​ ករណី​រកឃើញ​សារធាតុ​ផ្សំ​ផលិត​គ្រឿងញៀន​ជាង​ ៦០ ​គីឡូ

Content image - Phnom Penh Post
នគរបាល​​សារធាតុ​ផ្សំ​ផលិត​គ្រឿងញៀន​ជាង​ ៦០ ​គីឡូ នៅខេត្តកំពង់ស្ពឺ កាលពីថ្ងៃទី ២០ ឧសភា។ រូបថត ប៉ូលិស

នគរបាល​កំពុង​បន្ត​ស៊ើបអង្កេត​ ករណី​រកឃើញ​សារធាតុ​ផ្សំ​ផលិត​គ្រឿងញៀន​ជាង​ ៦០ ​គីឡូ

កំពង់ស្ពឺៈ នគរបាល​មន្ទីរ​ប្រឆាំង​គ្រឿងញៀន​កំពុង​បន្ត​ស៊ើបអង្កេត​ករណី​រកឃើញ​សារធាតុគីមី​ផ្សំ​សម្រាប់​ផលិត​សារធាតុ​ញៀន​មាន​ជាង​ ៦០ ​គីឡូក្រាម កាលពី​យប់​ថ្ងៃទី​ ២០ ឧសភា ឆ្នាំ​ ២០២២ នៅ​ភូមិ​ស្រល់ ឃុំ​យាយម៉ៅ​ពេជ្រនិល ក្នុងស្រុក​ភ្នំស្រួច​។

លោក​ឧត្តមសេនីយ៍ទោ អ៊ិន សុង នាយករង​មន្ទីរ​ប្រឆាំង​គ្រឿងញៀន​ឱ្យដឹង​នៅ​ថ្ងៃទី​ ២២ ឧសភា ថា ករណី​បង្ក្រាប​គ្រឿងញៀន​នៅ​ខេត្ត​កំពង់ស្ពឺ​រហូត​មកដល់​ពេលនេះ​កម្លាំង​សមត្ថកិច្ច​ជំនាញ​របស់​មន្ទីរ​ប្រឆាំង​គ្រឿងញៀន​កំពុងបើក​ការ​ស៊ើបអង្កេត​បន្តទៀត​។ ប៉ុន្តែ​ពាក់ព័ន្ធ​នឹង​ព័ត៌មាន​ស្តីពី​ការប្រតិបត្តិការ​បង្ក្រាប​យ៉ាងណា​នោះ​លោក​ស្នើសុំ​មិន​ធ្វើ​អត្ថាធិប្បាយ​លម្អិត​ទេ​។

លោក​បន្តថា ប្រតិបត្តិការ​នៃ​ការបង្ក្រាប​បទល្មើស​គ្រឿងញៀន​នេះ​គឺ​ខាង​មន្ទីរ​ប្រឆាំង​គ្រឿងញៀន​នៅ​មិនទាន់​ធ្វើ​របាយការណ៍​បូកសរុប​ពាក់ព័ន្ធ​នឹង​ការឃាត់ខ្លួន​ជនល្មើស និង​ការដកហូត​វត្ថុតាង​ឱ្យបាន​លម្អិត​នៅឡើយ​ទេ ព្រោះថា​សមត្ថកិច្ច​កំពុងធ្វើការ​ស៊ើបអង្កេត​ដែល​លោក​មិនទាន់​អាច​ប្រាប់​ជូន​បានទេ​។

លោក​ថ្លែងថា​៖ «​ចំពោះ​វត្ថុតាង​គ្រឿងញៀន​វិញ​មាន​មែនហើយ ក៏ប៉ុន្តែ​ជំនាញ​មិនទាន់​ធ្វើការ​បែងចែក​អាណា​ជា​គ្រឿងញៀន​ប្រភេទ​អី និង​អាណា​មាន​ទម្ងន់​ប៉ុន្មាន​ទេ​។ ពោលគឺ​យើង​កំពុង​បន្ត​ការស៊ើបអង្កេត​នៅឡើយ​»​។

ពាក់ព័ន្ធ​ការបង្ក្រាប​គ្រឿងញៀន​នេះដែរ ត្រូវបាន​មន្ត្រីនគរបាល​ស្រុក​ភ្នំស្រួច ១ ​រូប ស្នើ​មិនឱ្យ​បញ្ចេញ​ឈ្មោះ​ប្រាប់​នៅ​ថ្ងៃទី​ ២២ ​ឧសភា ថា មន្ទីរ​ប្រឆាំង​គ្រឿងញៀន​ជា​ម្ចាស់​ករណី​ហើយ​កម្លាំង​សមត្ថកិច្ច​របស់​លោក​គ្រាន់តែ​សហការ​ក្នុងនាម​ជា​អាជ្ញាធរ​មូលដ្ឋាន​ប៉ុណ្ណោះ​។ ការងារ​នេះ​ធ្វើឡើង​នៅវេលា​ម៉ោងជាង​ ៨ ​យប់​ថ្ងៃទី​ ២០ ឧសភា នៅ​ចំណុច​ចម្ការ​ស្វាយ​ ១​ កន្លែង ក្នុងភូមិ​ស្រល់ ឃុំ​យាយ​ម៉ៅ​ពេជ្រនិល​។ សមត្ថកិច្ច​រកឃើញ​សារធាតុ​គីមី​ផ្សំ​សម្រាប់​ផលិត​គ្រឿងញៀន​មាន​ជាង​ ៦០ ​គីឡូក្រាម​។ ប៉ុន្តែ​មិនមាន​ការឃាត់ខ្លួន​មនុស្ស​ទេ​ហើយ​ការ​មក​ទីតាំង​ខាងលើ​គ្រាន់តែ​មក​ឆែកឆេរ​បន្ថែម​ ដើម្បី​រក​គ្រឿងញៀន និង​រក​វត្ថុតាង​ក្នុង​ការផលិត​គ្រឿងញៀន​ប៉ុណ្ណោះ​។

មន្ត្រីនគរបាល​ដដែល​បន្តថា​៖ «​នៅ​កន្លែង​រោង​ក្នុង​ចម្ការ​ស្វាយ​នោះ​អត់​ចាប់បាន​មនុស្ស​ទេ ហើយ​បុរស​សង្ស័យ​ជា​ជន​ជាតិចិន​ ៣ ​នាក់​គឺ​ខាង​មន្ទីរ​ប្រឆាំង​គ្រឿងញៀន​ចាប់ពី​ភ្នំពេញ​ និង​នាំមក​បង្ហាញ​ទីតាំង​ផលិត​គ្រឿងញៀន​ទេ​»​។ មន្ត្រីនគរបាល​រូបនោះ​បន្ថែមថា ចំពោះ​សំណុំរឿង​គ្រឿងញៀន​នេះ បើតាម​លោក​ដឹង​គឺ​សមត្ថកិច្ច​ជំនាញ​កំពុង​ធ្វើការ​ស្រាវជ្រាវ​បន្តទៀត ​ដើម្បី​ស្វែងរក​ចាប់ខ្លួន​បក្ខពួក​របស់​ជនសង្ស័យ​បន្ថែមទៀត​៕

អត្ថបទគួរចាប់អារម្មណ៍