.jpg)
លោក ហ៊ុន សែន និងមន្ត្រីក្នុងសន្និបាត ESCAP ពីថ្ងៃទី ២២ ឧសភា។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន ជំរុញដល់បណ្តាប្រទេសពាក់ព័ន្ធត្រូវរួមគ្នារក្សាឱ្យបាននូវសណ្តាប់ធ្នាប់ សន្តិភាព និងជាពិសេសសន្តិសុខស្បៀង ដើម្បីកុំឱ្យប្រជាជនជួបទុក្ខលំបាក ហើយលោកក៏អះអាងថា សង្គ្រាមនៅអ៊ុយក្រែនបានបន្ទច់បង្អាក់ដល់ការងើបឡើងវិញនៃស្ថានភាព សង្គមសេដ្ឋកិច្ច។
ការថ្លែងរបស់លោក គឺធ្វើឡើងតាមរយៈសារវីដេអូ ថតទុកក្នុងកម្មវិធីបើកសន្និបាតប្រចាំឆ្នាំលើកទី ៧៨ របស់គណៈកម្មការសេដ្ឋកិច្ច និងសង្គមកិច្ចសម្រាប់អាស៊ី និងប៉ាស៊ីហ្វិកនៃអង្គការសហប្រជាជាតិ (UN ESCAP) នៅទីក្រុងបាងកក ប្រទេសថៃ។ ខណៈនេះលោកកំពុងចូលរួមកិច្ចប្រជុំប្រចាំឆ្នាំ ២០២២ របស់វេទិកាសេដ្ឋកិច្ចពិភពលោក ដែលប្រព្រឹត្តទៅនៅថ្ងៃទី ២២-២៦ ខែឧសភា នៅទីក្រុងដាវ៉ូសក្លូស្ទ័រ (Davos-Klosters) ប្រទេសស្វ៊ីស។
លោក ហ៊ុន សែន ថ្លែងថា៖ «ក្នុងពេលដែលតំបន់របស់យើងក៏ដូចជាពិភពលោកទាំងមូលកំពុងតែសម្លឹងទៅមុខប្រកបដោយសុទិដ្ឋិនិយម យើងក៏កំពុងទទួលរងនូវវិបត្តិមួយថ្មីទៀត គឺសង្គ្រាមនៅអ៊ុយក្រែន ដែលវិបត្តិនេះមិនត្រឹមតែបន្ទច់បង្អាក់ដល់ការងើបឡើងវិញនៃស្ថានភាពសង្គម-សេដ្ឋកិច្ចប៉ុណ្ណោះទេ តែអាចជះឥទ្ធិពលដល់សង្គម-សេដ្ឋកិច្ច និងភូមិសាស្ត្រនយោបាយរយៈពេលវែងផងដែរ»។
លោកបន្តថា៖ «យើងត្រូវខិតខំប្រឹងប្រែងរួមគ្នារក្សាឱ្យបាននូវសណ្តាប់ធ្នាប់ សន្តិភាព និងជាពិសេស សន្តិសុខស្បៀងក្នុងប្រទេស និងតំបន់ ដោយរក្សាឱ្យបាននូវលំហូរនៃទំនិញសំខាន់ចាំបាច់ ដើម្បីកុំឱ្យប្រជាជនរបស់យើងជួបទុក្ខលំបាកថែមទៀត និងគ្មាននរណាម្នាក់ត្រូវបានបំភ្លេចចោល»។
លោក ហ៊ុន សែន ជំរុញដល់បណ្តាប្រទេសនានាសម្រេចចិត្តរួមគ្នា ក្រោមយន្តការពហុភាគីនិយម ដោយគោរពច្បាប់អន្តរជាតិ និងអធិបតេយ្យភាពនៃប្រទេសនីមួយៗ ដើម្បីឈានទៅសម្រេចបាននូវការអភិវឌ្ឍប្រកបដោយចីរភាព។ លោកបង្ហាញក្តីសង្ឃឹមថា សន្និបាតប្រចាំឆ្នាំលើកទី ៧៨ នេះនឹងមានការពិភាក្សាផុលផុស និងឈានទៅដល់ការបង្កើតនូវយន្តការ និងគំនិតផ្តួចផ្តើមថ្មីៗ នៃកិច្ចសហប្រតិបត្តិការតំបន់អាស៊ី និងប៉ាស៊ីហ្វិកសំដៅជំរុញការស្តារ និងលើកកម្ពស់កំណើនសេដ្ឋកិច្ច ឡើងវិញ ក្រោយពីវិបត្តិកូវីដ ១៩ និងឈានឆ្ពោះទៅសម្រេចបាននូវគោលដៅអភិវឌ្ឍន៍ប្រកបដោយចីរភាព ឆ្នាំ ២០៣០ តាមការរំពឹងទុក។
លោកប្រកាសថា កម្ពុជាត្រៀមខ្លួនរួចជាស្រេចក្នុងការចូលរួមកិច្ចពិភាក្សាក្នុងសន្និបាតនេះទាំងក្នុងនាមជាប្រទេសមួយក្នុងតំបន់អាស៊ី និងប៉ាស៊ីហ្វិក និងជាប្រធានអាស៊ានក្នុងឆ្នាំ ២០២២។ លោកបញ្ជាក់ថា៖ «យន្តការពហុភាគីនិយម គឺជាក្តីសង្ឃឹមរបស់យើង ហើយអង្គការសហប្រជាជាតិ គឺជាសញ្ញានៃក្តីសង្ឃឹមរបស់យើងទាំងអស់គ្នា»។
លោកនាយករដ្ឋមន្ត្រីលើកឡើងថា ការអភិវឌ្ឍប្រកបដោយចីរភាព គឺជារបៀបវារៈរួមជាសកលដ៏សំខាន់ ដែលទាមទារឱ្យមានការចូលរួមពីគ្រប់មជ្ឈដ្ឋានទាំងក្នុងប្រទេសតំបន់ និងសកលលោកទាំងមូល។ វិបត្តិនៃជំងឺកូវីដ ១៩ ក៏ដូចជាបញ្ហាប្រឈមផ្សេងទៀតដែលបាននិងកំពុងកើតមានឡើង មិនត្រឹមតែបានបន្ទច់បង្អាក់ដំណើរការនៃការឈានទៅសម្រេចបាននូវការអភិវឌ្ឍប្រកបដោយចីរភាពប៉ុណ្ណោះទេ ប៉ុន្តែថែមទាំងឆ្លុះបញ្ចាំងឱ្យឃើញពីភាពចាំបាច់នៃការបង្កើន និងពង្រឹងកិច្ចសហប្រតិបត្តិការអន្តរជាតិឱ្យកាន់តែខ្លាំងឡើងថែមទៀត ។
លោក ហ៊ុន សែន ថ្លែងថា ក្នុងបរិបទនៃជំងឺកូវីដ ១៩ មានភាពល្អប្រសើរ តែមិនទាន់ឆ្លងផុតទាំងស្រុងនៅឡើយ។ អាទិភាពចម្បងនៃរបៀបវារៈរួមក្នុងតំបន់អាស៊ី និង ប៉ាស៊ីហ្វិក ក៏ដូចជា សកលលោកទាំងមូល គឺនៅតែផ្តោតលើការយកឈ្នះលើសមរភូមិប្រយុទ្ធនឹងជំងឺកូវីដ ១៩ ដោយប្រើប្រាស់វ៉ាក់សាំងជាអាវុធយុទ្ធសាស្ត្រគន្លឹះ។
លោកលើកឡើងថា៖ «កម្ពុជាសូមវាយតម្លៃខ្ពស់ចំពោះវប្បធម៌នៃការជួយគ្នាទៅវិញទៅមក ជាពិសេសការចែករំលែកវ៉ាក់សាំងបង្ការជំងឺកូវីដ ១៩ សំដៅបង្កើតភាពស៊ាំសហគមន៍ពេញលេញនៅទូទាំងសកលលោក»។
ខណៈវិធានការរដ្ឋបាល និងសុខាភិបាលត្រូវបានសម្រួល និងដកចេញជាបន្តបន្ទាប់ លោក ហ៊ុន សែន ជំរុញដល់បណ្តាប្រទេសពាក់ព័ន្ធធ្វើការបើកទូលាយ និងពង្រឹងការធ្វើសមាហរណកម្មសេដ្ឋកិច្ច តាមរយៈការជំរុញការវិនិយោគ ការធ្វើពាណិជ្ជកម្ម ដោយអនុវត្តឱ្យបានពេញលេញនូវកិច្ចព្រមព្រៀងពាណិជ្ជកម្មសេរីនានា ដែលបានចូលជាធរមាន និងការតភ្ជាប់ប្រជាជន និងប្រជាជន។ ជាពិសេសនៅក្នុងវិស័យទេសចរណ៍ ដើម្បីរួមគ្នា ស្តារនិងលើកស្ទួយកំណើនសេដ្ឋកិច្ចក្នុងប្រទេស និងតំបន់ឡើងវិញ នៅក្រោយវិបត្តិនៃជំងឺកូវីដ ១៩។
សេចក្តីប្រកាសព័ត៌មានគណៈកម្មាធិការជាតិអេស្កាប់ (ESCAP) ឱ្យដឹងថា កម្ពុជាត្រូវបានបោះឆ្នោតជ្រើសតាំងជាអនុប្រធានសន្និបាតនេះនាថ្ងៃទី ២៣ ខែឧសភា ក្នុងពិធីបើកកិច្ចប្រជុំពេញអង្គនៃសន្និបាតនេះ ដែលលោក លី ធុជ ទេសរដ្ឋមន្ត្រីនិងជាប្រធានគណៈកម្មាធិការជាតិអេស្កាប់ (ESCAP) បានដឹកនាំគណៈប្រតិភូរាជរដ្ឋាភិបាលកម្ពុជាទៅចូលរួមដោយផ្ទាល់ក្នុងសន្និបាត នេះក្រោមមូលបទ «របៀបវារៈរួមដើម្បីជំរុញការអភិវឌ្ឍប្រកបដោយចីរភាពនៅក្នុងតំបន់ អាស៊ី និងប៉ាស៊ីហ្វិក» ពីថ្ងៃទី ២៣ ដល់ថ្ងៃទី ២៧ ខែឧសភា។
លោកធ្វើសេចក្តីថ្លែងការណ៍ចំពោះអង្គសន្និបាតនេះ នាថ្ងៃទី ២៣ ឧសភា អំពីឆន្ទៈរបស់រាជរដ្ឋាភិបាលកម្ពុជាក្នុងការចូលរួមកិច្ចសហប្រតិបត្តិការអន្តរជាតិ ក្រោមក្របខ័ណ្ឌពហុភាគីនិយម ដើម្បីស្តារឡើងវិញនូវស្ថានភាពសង្គម-សេដ្ឋកិច្ច និងលើកកម្ពស់វិបុលភាពសម្រាប់ទាំងអស់គ្នា។
នៅថ្ងៃទី ២៤ ខែឧសភា លោកគ្រោងនឹងជួបប្រជុំទ្វេភាគីជាមួយលោកស្រី Armida Salsiah Alisjahbana អគ្គលេខាធិការរងអង្គការសហប្រជាជាតិ និងជាប្រធាន UN ESCAP ដើម្បីពង្រីក និងពង្រឹងកិច្ចសហប្រតិបត្តិការ ជាពិសេសទៅលើវិស័យមីនដែលជាគោលដៅទី ១៨ នៃក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជា ឆ្នាំ ២០១៦-២០៣០ និងដឹកនាំកិច្ចប្រជុំកម្រិតខ្ពស់ស្តីពីការធានាឱ្យបានភាពធន់នៃខ្សែចង្វាក់ផ្គត់ផ្គង់ និងការតភ្ជាប់។
នៅថ្ងៃទី ២៥ ខែឧសភា លោកនឹងធ្វើសេចក្តីថ្លែងការណ៍ក្នុងកិច្ចប្រជុំបណ្តាប្រទេស ដែលមានការអភិវឌ្ឍតិចតួច (LDCs) ក្នុងតំបន់អាស៊ី និងប៉ាស៊ីហ្វិកអំពីវិធានការជំរុញសេដ្ឋកិច្ចកម្ពុជា បន្ទាប់ពីរងផលប៉ះពាល់ពីវិបត្តិនៃជំងឺកូវីដ ១៩៕
