.jpg)
មន្ត្រីស៊ីម៉ាក់ បោសសម្អាតគ្រាប់បែកទម្លាក់ពីយន្តហោះប្រភេទ MK-82 មានទម្ងន់ប្រមាណ ២៣០ គីឡូក្រាមចំនួន ១ គ្រាប់ ស្ថិតនៅក្នុងភូមិគិរី ឃុំរលាំងកែន ស្រុកកណ្ដាលស្ទឹង ខេត្តកណ្ដាល។ រូបថត ស៊ីម៉ាក់
ភ្នំពេញៈ អគ្គនាយកអង្គភាពស៊ីម៉ាក់អះអាងថា ការយកគ្រាប់ចេញពីនាវាលិចនៅក្នុងបាតទន្លេមេគង្គ ស្ថិតនៅចំណុចភូមិពាមរាំង ឃុំពាមរាំង ស្រុកពាមជរ ខេត្តព្រៃវែង ត្រូវបានក្រុមជំនាញរបស់អង្គភាពស៊ីម៉ាក់បាននិងកំពុងស្រង់ចេញពីក្នុងទន្លេដោយក្នុង ១ ថ្ងៃៗបានចំនួន ១០ ទៅ ២០ គ្រាប់។ ទោះជាយ៉ាងណា មន្ត្រីជំនាញមិនទាន់បានស្ថិតិសរុបចំនួននោះទេ។
លោក ហេង រតនា អគ្គនាយកអង្គភាពស៊ីម៉ាក់ប្រាប់ភ្នំពេញប៉ុស្តិ៍នៅថ្ងៃទី ២៣ ខែ ឧសភាថា ប្រតិបត្តិការយកគ្រាប់ចេញពីនាវាដែលលិចចន្លោះឆ្នាំ ១៩៧០-១៩៧៥ នៅតែបន្តរហូតដល់ចប់ និងមានសុវត្ថិភាពទាំងស្រុង ព្រោះវាជាគោលការណ៍របស់រាជរដ្ឋាភិបាល ដើម្បីធ្វើយ៉ាងណាឱ្យប្រទេសកម្ពុជាមានសុវត្ថិភាពទាំងនៅក្នុងទឹក និងនៅលើគោក។
លោកបន្តថា ការយកគ្រាប់ចេញពីនាវាដែលលិចនៅក្នុងទន្លេមេគង្គ មិនងាយស្រួលដូចការយកគ្រាប់នៅលើគោកនោះទេ ព្រោះនៅក្នុងទឹកមានបំណែកនាវា និងបូមខ្សាច់ដែលហូរកប់គ្រាប់ដែលយ៉ាងហោចណាស់នឹងត្រូវការរយៈពេលពី ៧ ទៅ ៨ ខែ ដែរក្នុង ១ ទីតាំងនេះ។ លោកបញ្ជាក់ថា ក្រោយពេលបញ្ចប់ទីតាំងនេះ ក្រុមមន្ត្រីជំនាញនឹងបន្តចុះទៅយកនៅទីតាំងផ្សេងទៀតនៅខេត្តកណ្តាល ខណៈទីតាំងនេះត្រូវបានកំណត់រួចហើយ។
លោកថ្លែងថា៖ «ការយកគ្រាប់ចេញពីក្នុងទឹក និងនៅលើគោកនេះត្រូវបានទទួលគោលការណ៍ពីសម្តេចនាយករដ្ឋមន្ត្រី ហ៊ុន សែន និងសម្តេច ស ខេង ក្នុងគោលបំណង ដើម្បីអភិវឌ្ឍប្រទេសឱ្យមានសន្តិសុខឱ្យកាន់តែប្រសើរថែមមួយកម្រិតទៀត និងធានាសុខសុវត្ថិភាពជូនប្រជាពលរដ្ឋនៅទូទាំងប្រទេស»។
លោក ហេង រតនា ថ្លែងថា ក្រុមជំនាញគ្រាប់បែកអង្គភាពស៊ីម៉ាក់បានដោះបន្សាបគ្រាប់បែកទម្លាក់ពីយន្តហោះប្រភេទ AN-M66 ទម្ងន់ជិត ១ ០០០ គីឡូក្រាមដែលបានស្រង់ពីបាតទន្លេចតុមុខកន្លងទៅនោះបានសម្រេចជោគជ័យ៕
