.jpg)
ក្រុមអភិរក្សបង្ហាញបបែលយក្សដែលជាប់សន្ទូចអ្នកនេសាទ។ រូបថត AKP
ស្ទឹងត្រែងៈ ត្រីបបែលយក្ស ១ ក្បាលថ្មីទៀត ត្រូវបានគម្រោងអច្ឆរិយភាពទន្លេមេគង្គ សហការជាមួយវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប (IFREDI) លែងចូលក្នុងទន្លេវិញ បន្ទាប់ពីវាបានជាប់សន្ទូចរបស់ប្រជានេសាទនៅឃុំកោះព្រះ ស្រុកសៀមបូក ខេត្តស្ទឹងត្រែង កាលពីល្ងាចថ្ងៃទី ២២ ខែ ឧសភា ឆ្នាំ ២០២២។ នេះបើតាមសម្ដីលោក ស្រី សមវិចិត្រ នាយខណ្ឌរដ្ឋបាលជលផលខេត្តស្ទឹងត្រែង។
លោកថ្លែងថា ត្រីបបែលយក្សនោះ មានទម្ងន់១៤៣គីឡូក្រាម និងទទឹងដងខ្លួន ១៧១ សង់ទីម៉ែត្រ និងបណ្តោយដងខ្លួន ១៨១ សង់ទីម៉ែត្រ និងប្រវែងដងខ្លួនសរុប (ពីចុងច្រមុះដល់ចុងកន្ទុយ) ៣៦៥សង់ទីម៉ែត្រ។ វាត្រូវបានលែងចូលទៅក្នុងទន្លេមេគង្គវិញ នៅព្រឹកថ្ងៃទី ២៣ ខែ ឧសភា ឆ្នាំ ២០២២ បន្ទាប់ពីក្រុមមន្ត្រីជំនាញនៃកម្មវិធីអច្ឆរិយភាពទន្លេមេគង្គ និង ក្រុមអ្នកស្រាវជ្រាវនៃ IFREDI បានដោះផ្លែសន្ទូចចេញពីមាត់របស់វា និង បានកឹបស្លាកសញ្ញាសម្គាល់ និងបន្ទះឈីប សម្រាប់តាមដានពីសកម្មភាពរបស់វារួចមក។
លោកថ្លែងថា៖«បបែលយក្សទឹកសាបនេះ ជាប្រភេទសត្វងាយរងគ្រោះ និងជិតផុតពូជ។ ជាទូទៅវារស់នៅក្នុងអន្លុង់ទឹកជ្រៅ ដូចពពួកផ្សោតទឹកសាបទន្លេមេគង្គផងដែរ»។
បើតាមលោក សមវិចិត្រ កោះព្រះ ជាតំបន់អភិរក្សត្រីមេពូជដ៏កម្រ ដូចជាត្រីត្រសក់ ត្រីរាជ ត្រីគល់រាំង និងជាតំបន់អន្លុង់ទឹកជ្រៅ ដែលមានសត្វផ្សោតរស់នៅផងដែរ ។ តំបន់នេះត្រូវបានការពារយ៉ាងតឹងរឹងដោយក្រុមឆ្មាំទន្លេ នៃខណ្ឌរដ្ឋបាលជលផលខេត្តស្ទឹងត្រែង ប្រជាសហគមន៍នេសាទ រួមទាំងអាជ្ញាធរមូលដ្ឋាន។
យ៉ាងណាក៏ដោយ លោក ផេង បឿន ប្រធានសហគមន៍នេសាទកោះព្រះ បានប្រាប់ ភ្នំពេញ ប៉ុស្តិ៍ថា វត្តមានសត្វបបែលយក្សទឹកសាប ជាប់សន្ទូចអ្នកនេសាទ ម្ដងហើយម្ដងទៀតនេះ បានបង្កឲ្យមានក្ដីព្រួយកង្វល់ និងបង្ហាញថាសត្វដ៏កម្រនិងជិតផុតពូជនេះកំពុងជួបប្រឈមនូវការគំរាមកំហែងយ៉ាងខ្លាំងពីប្រជានេសាទ។
លោកបឿនបាននិយាយថា៖ «មុនដំបូងយើងមានអារម្មណ៍អរសប្បាយ ដោយឃើញមានវត្តមានបបែលយក្សទឹកសាបដ៏កម្រនិងជិតផុតពូចនេះ នៅក្នុងដងទន្លេមេគង្គនៃភូមិសាស្ត្រប្រទេសកម្ពុជាយើង ប៉ុន្តែនៅពេលឃើញវាជាប់សន្ទូចអ្នកនេសាទយើងទៀតនោះ ធ្វើឲ្យយើងគិតថាពួកវាកំពុងជួប ប្រឈមនូវបញ្ហាមួយចំនួន ដែលរួមបញ្ជូលទាំងបញ្ហាកង្វះចំណីអាហារ ផងដែរ»។
បើតាមលោក បឿន បបែលយក្សទឹកសាបនៅក្នុងតំបន់ការពារនិងអភិរក្សកោះព្រះនោះ មាន២ប្រភេទ គឺបបែលយក្សសម្បុរខ្មៅ ដែលអ្នកភូមិហៅថា បបែលក្របី និងបបែលយក្សសម្បុរក្រហម ដែលអ្នកភូមិនិយមហៅថា បបែលគោ។ ពួកវាបានបង្ហាញខ្លួននៅទីនោះជាច្រើនឆ្នាំមកហើយ ប៉ុន្តែ គ្មាននរណាម្នាក់បានដឹងពីចំនួនពិតប្រាកដរបស់វានោះទេ ។ ពេលខ្លះវាមានចរឹតស្លូតបូត ប៉ុន្តែពេលខ្លះវាមានការវាយប្រហារមកលើទូកប្រជានេសាទផងដែរ នៅពេលប្រើសន្ទូចស្ទូចចាប់វា។
នេះគឺជាលើកទី២ ហើយ ដែលបបែលយក្សទឹកសាបត្រូវបានប្រជានេសាទក្នុងតំបន់អភិរក្សខាងលើនេះចាប់បាន។ កាលពីថ្ងៃទី ៥ ឧសភា កន្លងទៅថ្មីៗនេះ ត្រីបបែលយក្សមួយក្បាលមានទម្ងន់ជិត ១៨០ គីឡូក្រាម ក៏បានធ្វើការដោះលែងទៅវិញផងដែរ បន្ទាប់ពីជាប់សន្ទូចអ្នកនេសាទម្នាក់។ ហើយត្រីបបែលយក្សទាំង២នេះជាត្រីបបែលញី ដែលបានបង្ហាញឱ្យឃើញពី ត្រីបបែលជាត្រីមេពូជ មានវត្តមាននៅទន្លេមេគង្គលើនៃប្រទេសកម្ពុជា។
លោក សមវិចិត្រ បានបញ្ជាក់ថា៖ «បបែលយក្សទឹកសាបទាំង ២ នោះជាប់សន្ទូចដែលគេស្ទូច និងបង្កៃ មិនមែនជាប់សន្ទូចរនងនោះទេ»។ លោកបានបន្ថែមថា កុំថាឡើយឧបករណ៍នេសាទខុសច្បាប់ សូម្បីតែការរាយមងនិងសន្ទូចរនង នៅក្នុងតំបន់អភិរក្សត្រីមេពូជ និងអន្លង់ផ្សោត គឺត្រូវបានហាមឃាត់ និងចាត់ទុកជាអំពើល្មើសច្បាប់»៕
វីដេអូ៖
