ភ្នំពេញៈ សំណល់ភក់បង្គន់នៅរាជធានីភ្នំពេញក្នុងឆ្នាំ ២០០១ មានប្រមាណ ២៦ ០០០ ម៉ែត្រគុប ក្នុង ១ ឆ្នាំ ហើយបើតាមការសិក្សា វានឹងកើនឡើងដល់ ៣៣០ ០០០ ម៉ែត្រគុបក្នុង ១ ឆ្នាំ នាឆ្នាំ ២០៣៥ ពោលគឺកើនឡើងជិត ១៣ ដង ដែលទាមទារបង្កើតអាងប្រព្រឹត្តិកម្មសំណល់នេះឱ្យបានត្រឹមត្រូវ ស្របតាមស្តង់ដាបច្ចេកទេស មិនធ្វើឱ្យប៉ះពាល់បរិស្ថាន។ នេះបើតាមលោកឃួង ស្រេង អភិបាលរាជធានីភ្នំពេញ។
ការថ្លែងរបស់លោកឃួង ស្រេង បែបនេះក្នុងពិធីបើកការដ្ឋានស្ថាបនាស្ថានីយប្រព្រឹត្តិកម្មសំណល់ភក់បង្គន់មានទីតាំងនៅសង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ នាព្រឹកថ្ងៃទី២៤ ខែឧសភានេះ។
លោកអភិបាលរាជធានីភ្នំពេញ ឱ្យដឹងថា បច្ចុប្បន្ន រាជធានីភ្នំពេញមានការអភិវឌ្ឍយ៉ាងខ្លាំង ទាំងបែបទូលាយ និងបែបជម្រៅ។ ក្នុងនោះ ព្រំប្រទល់រដ្ឋបាលត្រូវបានពង្រីក ពី៣០០ ទៅ៦៩២,៤៦គីឡូម៉ែត្រក្រឡា មានប្រជាជនរស់នៅនិងស្នាក់នៅបម្រើការងារប្រមាណ ៣លាននាក់។
លោកអភិបាលឱ្យដឹងទៀតថា រាជធានីភ្នំពេញ ពិតជាមានភាពចាំបាច់និងមានសារៈសំខាន់ខ្លាំងណាស់ ដើម្បីលើកកម្ពស់អនាម័យសាធារណៈ ឆ្លើយតបទៅនឹងអត្រាកំណើនប្រជាពលរដ្ឋ កំណើនសេដ្ឋកិច្ច នគរូបនីយកម្ម ការពង្រីកទីក្រុង និងការកើនឡើងផ្នែកជីវភាព។ តម្រូវការរស់នៅកាន់តែស៊ីវិល័យរបស់ប្រជាពលរដ្ឋ ក្នុងនោះគម្រោងស្ថាបនាស្ថានីយប្រព្រឹត្តិកម្មសំណល់ភក់បង្គន់នេះ នឹងផ្តល់នូវអត្ថប្រយោជន៍សំខាន់ចំនួន ៣ រួមមាន អត្ថប្រយោជន៍ផ្នែកបរិស្ថាន ផ្នែកសង្គម និងផ្នែកសេដ្ឋកិច្ចទីផ្សារកសិកម្ម។
លោកថ្លែងថា៖«ទី១ អត្ថប្រយោជន៍ផ្នែកបរិស្ថាន តាមរយៈការគ្រប់គ្រងសំណល់ភក់បង្គន់បានត្រឹមត្រូវ ទី២ ផ្នែកសង្គម តាមរយៈការបង្កើតការងារ និងកែច្នៃសំណល់ភក់បង្គន់ទៅជាជីសរីរាង្គ កាត់បន្ថយការប្រើប្រាស់ជីគីមី និងទី៣ អត្ថប្រយោជន៍ផ្នែកសេដ្ឋកិច្ច តាមរយៈការលក់ជីសរីរាង្គដែលផលិតបានទៅក្នុងទីផ្សារកសិកម្ម ឬ អាចនិយាយបានថា យកសំណល់ គ្រប់គ្រងសំណល់»។
លោកឃួង ស្រេង បន្តថា តាមការតម្រង់ទិសរបស់លោកនាយករដ្ឋមន្ត្រីហ៊ុន សែន ក្នុងការអភិវឌ្ឍវិស័យហេដ្ឋារចនាសម្ព័ន្ធរូបវន្ត ក្នុងរាជធានីភ្នំពេញ គឺត្រូវយកចិត្តទុកដាក់ដោះស្រាយ ការកកស្ទះ៣ចំណុចសំខាន់ៗ ដូចជា ទី១ ការកកស្ទះចរាចរណ៍ ទី២ ការកកស្ទះ លូ-ប្រឡាយ និងទី៣ ការកកស្ទះសំរាម។ ព្រោះទាំងនេះ ជាកត្តាសត្យានុម័ត សេដ្ឋកិច្ចជាតិកើនឡើង ទីក្រុងកាន់តែរីក ប្រជាជនកាន់តែច្រើន សម្ភារប្រើប្រាស់កាន់តែសម្បូរបែប ជាហេតុនាំឱ្យការផ្តល់សេវាតម្រូវការ និងសេវាសំណូមពរជូនប្រជាពលរដ្ឋត្រូវមានការកើនឡើងដោយចៀសមិនរួច។
លោកឃួង ស្រេង បញ្ជាក់ថា ក្នុងពេលអតីតកាល កម្ពុជាគ្មានតម្រូវការស្ថានីយប្រព្រឹត្តិកម្មប្រភេទនេះទេ ព្រោះប្រជាជនមានជីវភាពខ្វះខាត គា្មនអាហារបរិភោគគ្រប់គ្រាន់ និងគ្មានស្តង់ដារស់នៅ។ ប៉ុន្តែក្នុងពេលថ្មីៗនេះ ជីវភាពប្រជាជនកាន់តែមានភាពល្អប្រសើរ និងមានអាហារបរិភោគគ្រប់គ្រាន់ ដូច្នេះស្តង់ដានៃការរស់នៅក្នុងទីក្រុង ក៏ត្រូវតែលើកកម្ពស់ឱ្យកាន់តែប្រសើរឡើងជាលំដាប់ផងដែរ។
លោកនួន ផារ័ត្ន អភិបាលរងរាជធានីភ្នំពេញ បានឱ្យដឹងតាមរយៈការសរសេរលើទំព័រហ្វេសប៊ុកនៅថ្ងៃទី២៤ ខែឧសភាថា អាងប្រព្រឹត្តិកម្មសំណល់ភក់បង្គន់ដែលមានទីតាំងនៅសង្កាត់ភ្លើងឆេះរទេះ ខណ្ឌកំបូលនេះ គឺជាអាងដំបូងគេបង្អស់នៅរាជធានីភ្នំពេញ ដែលអាចប្រព្រឹត្តិកម្មបាន៧០ម៉ែត្រគុបក្នុង១ថ្ងៃ។
លោកបញ្ជាក់ថា៖«ស្ថានីយប្រព្រឹត្តិកម្មសំណល់ភក់បង្គន់មុនគេបង្អស់ នៅរាជធានីភ្នំពេញ (ដែលមានសមត្ថភាពធ្វើប្រព្រឹត្តិកម្មបានចំនួន៧០ម៉ែត្រគុបក្នុង១ថ្ងៃ ស្មើនឹង២៥,៥៥០ម៉ែត្រគុបក្នុង១ឆ្នាំ) ត្រូវបានបើកការដ្ឋានចាប់ផ្តើមសាងសង់ជាផ្លូវការ ក្រោមអធិបតីភាពរបស់ឯកឧត្តមអភិបាលរាជធានីភ្នំពេញ និងលោកអគ្គលេខាធិការអចិន្ត្រៃយ៍សមាគមអន្តរជាតិ អភិបាលក្រុង ប្រើប្រាស់ភាសាបារាំង (AIMF)»។
លោកព្យែរ ប៊ែយ៉េ លេខាធិការអចិន្ត្រៃយ៍សមាគមអន្តរជាតិអភិបាលក្រុងប្រើប្រាស់ភាសាបារាំង បានលើកឡើងថា ការរៀបចំអាងប្រព្រឹត្តិកម្មសំណល់ភក់បង្គន់នេះ ជាគោលនយោបាយមួយធ្វើឱ្យប្រសើរឡើង នៃការរស់នៅរបស់ប្រជាពលរដ្ឋនៅភ្នំពេញ ប្រកបដោយសុខុមាលភាព និងចូលរួមដោះស្រាយការប្រែប្រួលអាកាសធាតុ។
លោកថ្លែងថា៖«សំណល់ភក់បង្គន់នេះ នឹងប្រែក្លាយទៅជាជី សម្រាប់បងប្អូនប្រជាពលរដ្ឋធ្វើកសិកម្ម ហើយវានឹងផ្តល់ការងារជូនក្រុមហ៊ុនតូចតាច មានការងារធ្វើផងដែរ»៕