ភ្នំពេញៈ ក្នុងអំឡុងពេលដែលកម្ពុជាទទួលរងនូវវិបត្តិជំងឺឆ្លងកូវីដ ១៩ វិទ្យាស្ថានប៉ាស្ទ័រកម្ពុជា (IPC) ដែលជាដៃគូរបស់ក្រសួងសុខាភិបាល បានធ្វើតេស្តរកវីរុសកូវីដបានជាង ៦០ ម៉ឺនករណីតាមរយៈតេស្ត RT-PCR និងការសិក្សាវីរុសបំបែកបន្តៗគ្នាចំនួន ២ ០០០ វីរុស ដើម្បីកំណត់រកមេរោគបំប្លែងខ្លួនថ្មី ខណៈភាគីទាំង ២ ប្តេជ្ញាបន្តកិច្ចសហប្រតិបត្តិការ ដើម្បីសុខភាពសាធារណៈ។ នេះបើតាមសេចក្តីប្រកាសព័ត៌មាន ស្តីពីកិច្ចប្រជុំក្រុមប្រឹក្សាទំនាក់ទំនងប្រចាំឆ្នាំ ២០២២ នៃវិទ្យាស្ថានប៉ាស្ទ័រកម្ពុជាជាមួយក្រសួងសុខាភិបាល។
វិទ្យាស្ថានប៉ាស្ទ័រកម្ពុជាបានរៀបចំកិច្ចប្រជុំក្រុមប្រឹក្សាទំនាក់ទំនងប្រចាំឆ្នាំរបស់ខ្លួន ដោយផ្ទាល់នៅក្នុងបន្ទប់ប្រជុំរបស់វិទ្យាស្ថាន ក្រោមអធិបតីភាពលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោក Stewart Cole ប្រធានវិទ្យាស្ថានប៉ាស្ទ័រ និងមន្ត្រីជាន់ខ្ពស់ពាក់ព័ន្ធជាច្រើនរូបទៀត នៅថ្ងៃទី ២៤ ខែឧសភា ឆ្នាំ ២០២២។
សេចក្តីប្រកាសព័ត៌មានលើកឡើងថា ព្រឹត្តិការណ៍ដែលគួរឱ្យកត់សម្គាល់ នៅក្នុងឆ្នាំ ២០២១ គឺមានការរាតត្បាតនៃជំងឺកូវីដ ១៩ កើតមានឡើងនៅកម្ពុជា និងទូទាំងពិភពលោក ហើយវិទ្យាស្ថាននេះបានដើរតួនាទីយ៉ាងសំខាន់ក្នុងវិស័យសុខាភិបាល។ សេចក្តីប្រកាសបន្តថា៖ «សកម្មភាពរបស់វិទ្យាស្ថានមានសារៈសំខាន់ក្នុងវិស័យសុខាភិបាល ជាពិសេសការគាំទ្រដ៏ខ្លាំងក្លាក្នុងការឆ្លើយតបទៅនឹងការរាតត្បាតនៃជំងឺកូវីដ ១៩ រួមមានការធ្វើតេស្តបានជាង ៦០០ ០០០ RT-PCR និងការសិក្សាវីរុសបំបែកបន្តៗគ្នាចំនួន ២ ០០០ វីរុស ដើម្បីកំណត់រកមេរោគបំប្លែងខ្លួនថ្មី»។ សកម្មភាពស្រាវជ្រាវនៅតែបន្តហើយទទួលបានលទ្ធផលសំខាន់ៗ នៅក្នុងវិស័យផ្សេងៗដែលជាប្រធានបទនៃការបោះពុម្ពផ្សាយអត្ថបទផ្នែកវិទ្យាសាស្ត្រចំនួន ៤៩ នៅក្នុងទិនានុប្បវត្តិអន្តរជាតិកម្រិតខ្ពស់។
លោក ម៉ម ហ៊ុនហេង មានប្រសាសន៍ថា ក្នុងរយៈពេល ២ ឆ្នាំចុងក្រោយនេះត្រូវបានកត់សម្គាល់ថា ជំងឺរាតត្បាតកូវីដ ១៩ បានរីករាលដាល ពាសពេញពិភពលោក និងនៅកម្ពុជាជាពិសេសនៅឆ្នាំ ២០២១ ប៉ុន្តែដោយសារការឆ្លើយតបប្រកបដោយប្រសិទ្ធភាព ដែលរៀបចំដោយអាជ្ញាធរកម្ពុជា ជំងឺរាតត្បាតនេះត្រូវបានគ្រប់គ្រងបានល្អប្រសើរ ហើយប្រជាពលរដ្ឋអាចរស់នៅ និងប្រកបរបរជាប្រក្រតីធម្មតាឡើងវិញ។
លោកបញ្ជាក់ថា វិទ្យាស្ថានប៉ាស្ទ័រគឺជាដៃគូដ៏យូរអង្វែងមួយរបស់កម្ពុជា ហើយលោកជឿជាក់ថា ថ្នាក់ដឹកនាំវិទ្យាស្ថាន និងក្រុមការងាររបស់ពួកគេបំពេញការងារក្នុងស្មារតីនៃកិច្ចសហការយ៉ាងជិតស្និទ្ធ និងប្រកបដោយផ្លែផ្កាជាមួយគ្រប់នាយកដ្ឋាននៃក្រសួងសុខាភិបាល។ «ខ្ញុំសូមកោតសរសើរដល់កិច្ចការងារ និងការប្រឹងប្រែង ដែលវិទ្យាស្ថានប៉ាស្ទ័របានធ្វើដោយបានប្រែក្លាយលទ្ធផលនានាទៅជាអនុសាសន៍ និងសកម្មភាពពាក់ព័ន្ធសុខភាពសាធារណៈជាឧទាហរណ៍ក្នុងវិស័យស្រាវជ្រាវគ្លីនិកក្នុងវិស័យជំងឺរបេង ការឆ្លងមេរោគអេដស៍ ជំងឺរលាកថ្លើម និងជំងឺឆ្កែឆ្កួត និងការផ្ទេរព័ត៌មានភ្លាមៗទាក់ទងការរកឃើញមេរោគ SARS-Cov2 និងមេរោគគ្រុនផ្តាសាយបក្សី»។
ប្រធានវិទ្យាស្ថានប៉ាស្ទ័រកម្ពុជា លោក Stewart Cole ថ្លែងថា បន្ទាប់ពីការព្យាយាមរយៈពេល ២ ឆ្នាំដែលបង្កឡើងដោយជំងឺរាតត្បាតកូវីដ ១៩ ប្រទេសជាច្រើនរួមទាំងកម្ពុជា និងបារាំងបានរៀនសម្របខ្លួនទៅនឹងវា និងបង្ហាញពីភាពធន់ក្នុងការរួមបញ្ចូលគ្នានូវការការពារប្រជាជន និងការអភិវឌ្ឍសេដ្ឋកិច្ច។ លោកបន្តថា កិច្ចប្រជុំដោយផ្ទាល់ជាមួយក្រុមប្រឹក្សាទំនាក់ទំនងនាពេលនេះ បញ្ជាក់ពីប្រសិទ្ធភាពនៃសកម្មភាពដែលធ្វើឡើងដោយអាជ្ញាធរកម្ពុជាក្នុងការប្រយុទ្ធប្រឆាំងនឹងជំងឺរាតត្បាតយ៉ាងមានប្រសិទ្ធភាព។
លោកគូសបញ្ជាក់ថា៖ «ជោគជ័យដែលវិទ្យាស្ថានប៉ាស្ទ័រនៅកម្ពុជាទទួលបាននាពេលបច្ចុប្បន្ននេះ មិនអាចកើតឡើងបានទេ ប្រសិនបើមិនមានការគាំទ្រពីក្រសួងសុខាភិបាល ហើយខ្ញុំប្តេជ្ញាចិត្តក្នុងការបម្រើសុខភាពប្រជាជនក្នុងប្រទេសកម្ពុជា និងក្រៅប្រទេស»។ វិទ្យាស្ថានប៉ាស្ទ័រក៏កំពុងពង្រឹងសេវាកម្មដ៏ទូលំទូលាយរបស់ខ្លួនដល់សាធារណជនតាមរយៈមន្ទីរពិសោធន៍ជីវវេជ្ជសាស្ត្រ មជ្ឈមណ្ឌលវ៉ាក់សាំងអន្តរជាតិ មជ្ឈមណ្ឌលព្យាបាលជំងឺឆ្កែឆ្កួតនៅរាជធានីភ្នំពេញ ខេត្តបាត់ដំបង និងខេត្តកំពង់ចាម និងមន្ទីរពិសោធន៍បរិស្ថាន និងសុវត្ថិភាពចំណីអាហារ។
វិទ្យាស្ថានប៉ាស្ទ័រកម្ពុជាបានបង្កើតឡើងក្នុងខែធ្នូ ឆ្នាំ ១៩៥៣ ស្ថិតក្រោមការត្រួតពិនិត្យរបស់វិទ្យាស្ថានប៉ាស្ទ័រនៅទីក្រុងប៉ារីសគឺជាវិទ្យាស្ថានស្រាវជ្រាវមិនស្វែងរកប្រាក់ចំណេញដែលដំណើរការក្រោមការឧបត្ថម្ភរបស់ក្រសួងសុខាភិបាលកម្ពុជា៕