.jpg)
កម្មកររោងចក្រកាត់ដេរធ្វើដំណើរតាមរថយន្តកាលពីអំឡុងកូវីដរាតត្បាតកន្លងមក។ រូបថត Oxfam
ភ្នំពេញៈ អង្គការអុកស្វាម និងមូលនិធិ Laudes Foundation បានសហការគ្នាដាក់ឱ្យអនុវត្តគម្រោង «កិច្ចគាំពារសង្គម ប្រកបដោយបរិយាប័ន្នដែលឆ្លើយតបទៅនឹងតម្រូវការរបស់កម្មករនិយោជិតក្នុងវិស័យកាត់ដេរ» ហៅកាត់ថា INSPIRE ក្នុងគោលបំណងរួមចំណែកជាមួយរាជរដ្ឋាភិបាលកម្ពុជាក្នុងការពង្រឹងកិច្ចគាំពារសង្គមក្នុងវិស័យកាត់ដែរឱ្យកាន់តែប្រសើរឡើង។
សេចក្តីប្រកាសព័ត៌មានរួមបានឱ្យដឹងថា គម្រោង INSPIRE ត្រូវបានដាក់ឱ្យអនុវត្តចាប់ពីថ្ងៃទី ២៣ ខែឧសភា ឆ្នាំ ២០២២ រហូតដល់ឆ្នាំ ២០២៥។ គម្រោងនេះនឹងត្រូវអនុវត្តរួមគ្នាជាមួយអង្គការ និងសហជីពចំនួន ៤ ផ្សេងទៀត រួមមាន មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) សហភាពការងារកម្ពុជា (CLC) សហព័ន្ធសហជីពកម្ពុជា (CAT-U) និងសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (C.CAWDU)។
លោកស្រី ភាណ សោភ័ណ នាយិកាអង្គការអុកស្វាម មានប្រសាសន៍នៅក្នុងសេចក្តីប្រកាសថា អង្គការអុកស្វាម ប្តេជ្ញាធ្វើការជាមួយ និងគាំទ្ររាជរដ្ឋាភិបាលកម្ពុជា និងដៃគូពាក់ព័ន្ធ ដើម្បីកាត់បន្ថយភាពក្រីក្រ និងវិសមភាពក្នុងចំណោមកម្មករនិយោជិតក្នុងវិស័យកាត់ដេរ ជាពិសេសកម្មករនិយោជិតកិច្ចសន្យាដែលភាគច្រើនជានារី ដើម្បីធានាលទ្ធភាពរបស់ពួកគេក្នុងការទទួលបានកិច្ចគាំពារសង្គម ប្រកបដោយបរិយាប័ន្ន។
លោកស្រីថា៖ «ការទទួលបានការគាំពារសង្គម គឺមានសារៈសំខាន់ណាស់សម្រាប់កម្មករនិយោជិត និងក្រុមគ្រួសាររបស់ពួកគេ ព្រោះវាជួយទ្រទ្រង់សុខុមាលភាពរបស់ពួកគេ បង្កើនភាពធន់ និងកាត់បន្ថយហានិភ័យនៃគ្រោះមហន្តរាយ ឬជំងឺរាតត្បាតជាសកលជាដើម»។
លោក Jill Tucker ប្រធានកម្មវិធីសិទ្ធិពលកម្មរបស់មូលនិធិ Laudes Foundation មានប្រសាសន៍ថា គោលនយោបាយបេឡាជាតិរបបសន្តិសុខសង្គម ប.ស.ស បានចូលរួមចំណែកជួយពង្រឹងកិច្ចសន្យាសង្គម និងផ្តល់ការការពារជាមូលដ្ឋានដល់កម្មករនិយោជិត ដើម្បីស្នើសុំការគាំទ្រ និងកិច្ចគាំពារនៅពេលពួកគេមានជំងឺ ជួបគ្រោះថ្នាក់នៅកន្លែងធ្វើការ ឬរងផលប៉ះពាល់ដោយវិបត្តិសេដ្ឋកិច្ច។ លោកបន្តថា ការបំពេញតាមកិច្ចសន្យានេះបានជំរុញឱ្យសំឡេងកម្មករមានភាពជាតំណាងកាន់តែប្រសើរឡើង និងឆ្លុះបញ្ចាំងនៅក្នុងកិច្ចពិភាក្សាអំពីគោលនយោបាយនានា។
លោកបន្តថា៖ «តាមរយៈកិច្ចសហប្រតិបត្តិការជាមួយអង្គការអុកស្វាមលើគម្រោង INSPIRE នេះ យើងខ្ញុំជឿជាក់ថា កម្មករនិយោជិតក្នុងវិស័យកាត់ដេរនៅកម្ពុជានឹងមានលទ្ធភាពកាន់តែច្រើនឡើង ដើម្បីប្រើប្រាស់ និងទទួលបានអត្ថប្រយោជន៍នានា តាមរយៈគោលនយោបាយ ប.ស.ស»។
កម្មករធ្វើការនៅតំបន់សេដ្ឋកិច្ចពិសេសសានតុងនៅខេត្តស្វាយរៀងលោក សំ ចិត្តា បានថ្លែងថា ក្នុងនាមជាកម្មករតែងតែសប្បាយចិត្តនៅពេលមានគម្រោងណាមួយដាក់ឱ្យអនុវត្ត ដើម្បីជួយលើកកម្ពស់ដល់កម្មករ។ លោកថា៖ «ធម្មតាកម្មករយើងមានគ្រោះថ្នាក់ច្រើនក្នុង ១ ថ្ងៃៗជាពិសេសគ្រោះថ្នាក់ចរាចរណ៍តែម្តង ហើយនៅរោងចក្រខ្លះ ក៏ជួបហានិភ័យដែរ ដូចខ្ញុំធ្វើការផ្នែកម៉ាស៊ីននៅរោងចក្រ អ៊ីចឹងអាចគាបដៃ ដូច្នេះការដាក់ឱ្យអនុវត្តគម្រោងនេះសង្ឃឹមថានឹងជួយសម្រួលដល់ពួកខ្ញុំដែរ»។
តាមរយៈសេចក្តីប្រកាសនេះ ក៏បានកោតសរសើរដល់រាជរដ្ឋាភិបាលកម្ពុជាដែលបានយកចិត្តទុកដាក់យ៉ាងខ្លាំងលើកិច្ចគាំពារសង្គមសម្រាប់ពលរដ្ឋទាំងអស់គ្នា។ សេចក្តីប្រកាសលើកឡើងថា៖ «ការយកចិត្តទុកដាក់នេះ គឺសបញ្ជាក់ឱ្យឃើញតាមរយៈការផ្តួចផ្តើមអនុវត្តគោលនយោបាយគាំពារសង្គមមួយចំនួន ជាពិសេស (ប.ស.ស) ដែលបានផ្តល់អត្ថប្រយោជន៍យ៉ាងច្រើនដល់កម្មករនិយោជិតក្នុងវិស័យកាត់ដេរ»។
ជាក់ស្តែងរបាយការណ៍របស់បេឡាជាតិសន្តិសុខសង្គម ឆ្នាំ ២០២០ បានកត់សម្គាល់ឃើញថា កម្មការិនីកាត់ដេរសរុបចំនួន ៨ ម៉ឺននាក់បានទទួលប្រាក់ឧបត្ថម្ភមាតុភាពពីរដ្ឋាភិបាល ដែលមានទឹកប្រាក់សរុបប្រមាណជា ៧,៩ លានដុល្លារអាមេរិក។
បន្ថែមលើនេះទៀត នៅពេលកម្ពុជារងសម្ពាធខ្លាំងពីការរាតត្បាតនៃវីរុសកូវីដ ១៩ កម្មករនិយោជិត ដែលបាត់បង់ការងារក៏ត្រូវបានផ្ដល់ការគាំទ្រក្នុងទម្រង់ជាសាច់ប្រាក់ផងដែរ។ ទាំងនេះសបញ្ជាក់ឱ្យឃើញថា កម្ពុជាកំពុងដើរលើមាគ៌ាដ៏ត្រឹមត្រូវឆ្ពោះទៅរកការកសាងភាពធន់ និងកសាងសង្គមមួយប្រកបដោយបរិយាបន្ន។
សេចក្តីប្រកាសគូសបញ្ជាក់ថា តាមរយៈការប្ដេជ្ញាចិត្តរបស់រាជរដ្ឋាភិបាលកម្ពុជា គម្រោង INSPIRE នេះនឹងជួយពង្រឹង និងពង្រីកគោលនយោបាយ ប.ស.ស និងជួយជ្រោមជ្រែងរាជរដ្ឋាភិបាលដោះស្រាយបញ្ហាសេសសល់មួយចំនួនទៀត ក្នុងចំណោមកម្មករនិយោជិត (ជាពិសេស គឺកម្មករនិយោជិតកិច្ចសន្យា) ក្នុងវិស័យកាត់ដេររួមមាន កង្វះលទ្ធភាពទទួលបានព័ត៌មានពីកិច្ចគាំពារសង្គម និងអត្ថប្រយោជន៍ និងកម្រិតគុណភាពនៃសេវាកម្មកិច្ចគាំពារសង្គមដែលផ្ដល់ដល់កម្មករនិយោជិតក្នុងវិស័យកាត់ដេរ។ល៕
