ភ្នំពេញៈវ៉ាក់សាំងប្រឆាំងនឹងមេរោគកូវីដ១៩របស់សាធារណរដ្ឋប្រជាមានិតចិន មួយប្រភេទទៀត ដែលមានឈ្មោះថា Convidecia ត្រូវបានអង្គការសុខភាពពិភពលោក (WHO) សម្រេចអនុម័តឱ្យប្រើប្រាស់ជាផ្លូវការបន្ទាន់ កាលពីថ្ងៃទី ១៩ ខែឧសភា ដែលនេះជាវ៉ាក់សាំងទី១១ ដែលអង្គការនេះ បានប្រកាសឱ្យប្រើប្រាស់ចាប់តាំងពីមានការផ្ទុះរាលដាលមេរោគកូវីដ ១៩។
ស្ថានទូតសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា បានបង្ហោះសារលើបណ្តាញសង្គមហ្វេសប៊ុករបស់ខ្លួនកាលពីថ្ងៃទី២០ ខែឧសភា ថា ៖ «នាថ្ងៃទី១៩ខែឧសភា អង្គការសុខភាពពិភពលោក បានប្រកាសថា វ៉ាក់សាំងកូវីដ Convidecia ដែលផលិតឡើងដោយក្រុមហ៊ុនចិន CanSino Biologics Inc ត្រូវបានបញ្ជាក់អនុញ្ញាតឱ្យប្រើប្រាស់ជាបន្ទាន់ដោយអង្គការសុខភាពពិភពលោកជាផ្លូវការ»។
ស្ថានទូតចិនដដែលនេះ បានបន្តថា នេះជាវ៉ាក់សាំងកូវីដទីបីរបស់ចិន ដែលទទួលបានការបញ្ជាក់អនុញ្ញាតប្រើប្រាស់ជាបន្ទាន់ ពីអង្គការសុខភាពពិភពលោក បន្ទាប់ពីវ៉ាក់សាំងចិនស៊ីណូហ្វាម និង ស៊ីណូវ៉ាក់។
ប្រភពដដែលបានបញ្ជាក់ថា ៖ «វ៉ាក់សាំង Convidecia មានប្រសិទ្ធភាព ៦៤% ក្នុងការការពារ មានអាការៈឆ្លងនៃជំងឺកូវីដ១៩ និងមានប្រសិទ្ធភាព៩២% សម្រាប់ការការពារអាការៈធ្ងន់ធ្ងរនៃជំងឺកូវីដ១៩»។
យោងតាមអង្គការសុខភាពពិភពលោក បានឱ្យដឹងកាលពីថ្ងៃទី១៩ ខែឧសភា ថា WHO បានអនុម័តឱ្យប្រើប្រាស់ជាបន្ទាន់ នូវវ៉ាក់សាំងកូវីដ១៩ Convidecia ដែលជាវ៉ាក់សាំងផលិតដោយក្រុមហ៊ុន CanSino Biologics ប្រទេសចិន ដែលវាជាការរីកលូតលាស់នៃវ៉ាក់សាំងដែលអង្គការ WHO អនុម័តក្នុងការប្រើប្រាស់សម្រាប់ការការពារជំងឺកូវីដ១៩។
នីតិវិធីការចុះបញ្ជីការប្រើប្រាស់បន្ទាន់ (EUL) របស់ អង្គការសុខភាពពិភពលោក គឺវាយតម្លៃលើគុណភាព សុវត្ថិភាព និងប្រសិទ្ធភាព នៃវ៉ាក់សាំងដែលជាតម្រូវការជាមុន សម្រាប់ការផ្គត់ផ្គង់វ៉ាក់សាំងទាំងនេះទៅកាន់មជ្ឈមណ្ឌលកូវ៉ាក់(COVAX)។
វាក៏អនុញ្ញាតឱ្យប្រទេសនានាពន្លឿនការអនុម័តបទបញ្ញត្តិរបស់ខ្លួន ក្នុងការនាំចូល និងគ្រប់គ្រងវ៉ាក់សាំងកូវីដ ១៩ ផងដែរ។
ទាក់ទងនឹងការប្រកាសនូវការប្រើប្រាប់វ៉ាក់សាំងកូវីដ Convidecia ដែលជាវ៉ាក់សាំងទី៣របស់ប្រទេសចិននេះ ក្រសួងសុខាភិបាលកម្ពុជា មិនទាន់មានការចេញសេចក្តីប្រកាសណាមួយពីការអនុម័តឱ្យប្រើប្រាស់នៅក្នុងប្រទេសឡើយ។
លោកស្រី ឱ វណ្ណឌីន ប្រធានគណៈកម្មការចំពោះកិច្ច ចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេស ធ្លាប់បានលើកឡើង កាលពីថ្ងៃទី ២២ ខែឧសភា ថា វ៉ាក់សាំងកូវីដ១៩ដែលកម្ពុជាបាននិងកំពុងធ្វើយុទ្ធនាការចាក់ជូនប្រជាពលរដ្ឋជាវ៉ាក់សាំងដែលជាអំណោយមកពីបណ្តាប្រទេសខាងអឺរ៉ុប ក៏ដូចជាមកពីប្រទេសអូស្រ្តាលី ឥណ្ឌា ប្រជាមានិតចិន សហរដ្ឋអាមេរិក និងបណ្តាប្រទេសផ្សេងៗមួយចំនួនទៀត។
លោកស្រីមានប្រសាសន៍ថា ៖ «សូមបងប្អូនមកទទួលយកវ៉ាក់សាំងកូវីដ១៩ឱ្យបានគ្រប់ៗគ្នា។ វ៉ាក់សាំងដែលយើងប្រើប្រាស់នេះ គឺយើងប្រើទៅតាមប្រភេទវ៉ាក់សាំងដែលយើងទទួលបាន ហើយសុទ្ធតែជាប្រភេទវ៉ាក់សាំងដែលស្ថិតក្នុងបញ្ជីប្រើប្រាស់បន្ទាន់របស់អង្គការសុខភាពពិភពលោក និងជាវ៉ាក់សាំងមានប្រសិទ្ធភាពត្រឹមត្រូវពីការជួយការពារពីការវាយលុករបស់វីរុសកូវីដ១៩»៕