កោះកុងៈ នគរបាលព្រហ្មទណ្ឌខេត្តកោះកុងបានបញ្ជូនជនជាប់ចោទម្នាក់ឃុំក្នុងពន្ធនាគារខេត្តពីថ្ងៃទី ២៣ ឧសភាតាមដីកាបង្គាប់ឱ្យឃុំខ្លួនរបស់តុលាការខេត្តកោះកុងពាក់ព័ន្ធកាប់យុវជនម្នាក់ស្លាប់កាលពីថ្ងៃទី ២២ មិថុនា ឆ្នាំ ២០២១ នៅភូមិ១ សង្កាត់ដងទង់ ក្រុង ខេមរភូមិន្ទ ខេត្តកោះកុង។
លោក ឃឹម សាណេ ស្នងការរងទទួលផែនការងារនគរបាលព្រហ្មទណ្ឌនៃស្នងការនគរបាលខេត្តកោះកុងឱ្យដឹងនៅថ្ងៃទី ២៤ ឧសភា ថា ជនជាប់ចោទឈ្មោះ យ៉ន វីរៈ អាយុ ២២ ឆ្នាំ ជាកម្មករឱ្យក្រុមហ៊ុនឯកជនមួយរស់នៅភូមិ២ ឃុំពាមក្រសោប ស្រុកមណ្ឌលសីមា ត្រូវបានឃុំខ្លួនក្នុងពន្ធនាគារហើយកាលពីថ្ងៃទី ២៣ ខែឧសភាបន្ទាប់ពីសមត្ថកិច្ចរបស់លោកចាប់ខ្លួនបានប៉ុន្មានម៉ោងដោយអនុវត្តតាមដីកាបង្គាប់ឱ្យចាប់ខ្លួនរបស់សាលាដំបូងខេត្តកោះកុង។
លោកប្រាប់ថា៖ «ជនសង្ស័យបានកាប់យុវជនម្នាក់ស្លាប់ហើយបានគេចខ្លួនជាង ១ ឆ្នាំមកហើយ ហើយតុលាការបានចេញដីកាឱ្យសមត្ថកិច្ចស្រាវជ្រាវតាមចាប់ខ្លួន។ កម្លាំងព្រហ្មទណ្ឌខ្ញុំចាប់គាត់នៅថ្ងៃទី ២៣ ឧសភា រួចបញ្ជូនទៅឃុំតែម្តង»។
បើតាមដីកាដែលចេញដោយលោកចៅក្រម កែវ សុខា ហើយដែលភ្នំពេញ-ប៉ុស្តិ៍ទទួលបាននៅថ្ងៃទី ២៤ ឧសភា បង្ហាញថា បង្គាប់ឱ្យភ្នាក់ងារមានសមត្ថកិច្ចចាប់ និងឃុំខ្លួនឈ្មោះ យ៉ន វីរៈ យកទៅដាក់ពន្ធនាគារ ខេត្តកោះកុង។ បញ្ជាដល់ប្រធានពន្ធនាគារខេត្តកោះកុង ឬប្រធានមណ្ឌលឃុំខ្លួនបណ្តោះអាសន្នឱ្យទទួល និងឃុំខ្លួនបុគ្គលនោះឱ្យបានសម្រេចតាមដីកានេះ។
លោកបញ្ជាក់ថា បើតាមអង្គហេតុកាលពីយប់ថ្ងៃទី ២២ ខែមិថុនា ឆ្នាំ ២០២១ គេបានឃើញជនល្មើសម្នាក់ប្រដាប់ដោយដាវ និងកាំបិតបានដេញកាប់យុវជនម្នាក់ឈ្មោះ លី ង៉ា អាយុ ១៩ ឆ្នាំ រស់នៅភូមិពាមក្រសោប ឃុំពាមក្រសោប ស្រុកមណ្ឌលសីមា។ ក្នុង ហេតុការណ៍នោះដោយសារតែត្រូវរបួសធ្ងន់ជនរងគ្រោះបានស្លាប់នៅកន្លែងកើតហេតុស្ថិតនៅមុខសាលារៀនខេមរសាមគ្គី សង្កាត់ដងទង់ ក្រុងខេមរភូមិន្ទ ខេត្តកោះកុង។
លោកបញ្ជាក់បន្តថា ភ្លាមៗក្រោយបង្កហេតុ ជនល្មើសបានរត់គេចខ្លួនបាត់។ តែដោយសារមានការស្រាវជ្រាវរបស់សមត្ថកិច្ចទើបឈានដល់កំណត់បានមុខសញ្ញា និងអត្តសញ្ញាណជនសង្ស័យទើបសមត្ថកិច្ចរបស់លោកកសាងសំណុំរឿងចុះថ្ងៃទី ២៤ មិថុនា ឆ្នាំ ២០២១ បញ្ជូនទៅអយ្យការអមសាលាដំបូងខេត្តកោះកុង ដើម្បីចាត់ការតាមនីតិវិធី។
លោកបញ្ជាក់ថា ក្រោយមកសាលាដំបូងខេត្តកោះកុងបើកសវនាការកំបាំងមុខជនសង្ស័យឈ្មោះ យ៉ន វីរៈ និងប្រកាសសាលក្រមនៅថ្ងៃទី ១៩ មករា ឆ្នាំ ២០២២ សម្រេចផ្តន្ទាទោសដាក់ពន្ធនាគារ ១០ ឆ្នាំដូចដែលបានចែងនៅក្នុងដីកាបង្គាប់ឱ្យចាប់ខ្លួន។ បើតាមដីកា ជនជាប់ចោទត្រូវបានចោទបទហិង្សាដោយចេតនាមានស្ថានទម្ងន់ទោសដោយសារមរណភាពនៃជនរងគ្រោះ និងបទហិង្សាដោយចេតនាមានស្ថានទម្ងន់ទោស តាមបញ្ញត្តិមាត្រា ២២៤ និងមាត្រា ២១៨ នៃក្រមព្រហ្មទណ្ឌ៕