បាត់ដំបងៈ នគរបាលចរាចរណ៍ខេត្តបាត់ដំបង នៅថ្ងៃទី ២៥ ឧសភា កំពុងស្រាវជ្រាវស្វែងរកចាប់ម្ចាស់រថយន្តមកទទួលខុសត្រូវចំពោះមុខច្បាប់ បន្ទាប់ពីបានបើកបុកម៉ូតូ ១ គ្រឿងបណ្តាលឱ្យមនុស្ស ៤ នាក់ស្លាប់ នៅភូមិទួលទិល ឃុំតាក្រី ស្រុកកំរៀង ខេត្តបាត់ដំបង។
លោកចាន់ សុធី នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តបាត់ដំបង ប្រាប់នៅថ្ងៃទី២៥ ឧសភា ថាករណីរថយន្តបុកមនុស្សស្លាប់៤នាក់នេះ សមត្ថកិច្ចជំនាញរបស់លោកកំពុងស្រាវជ្រាវចាប់ខ្លួនជនបង្កជាអ្នកបើករថយន្ត បន្ទាប់ពីបានបង្កហេតុបុកជនរងគ្រោះ ហើយរត់គេចខ្លួនកាលពីយប់ថ្ងៃទី២៤ ឧសភា។ ជនរងគ្រោះស្លាប់ ឈ្មោះកាំង សំណាង ភេទស្រី អាយុ៥៩ឆ្នាំ(ស្លាប់នៅកន្លែងកើតហេតុ) ទី២-ឈ្មោះឡី ស្រីម៉ៅ ភេទស្រី អាយុ១៦ឆ្នាំ ទី៣-ឈ្មោះហឿន ធារ៉ា ភេទប្រុស អាយុ៦ឆ្នាំ និងឈ្មោះ ហឿន ភារម្យ ភេទស្រី អាយុ៥ឆ្នាំ។ ពួកគេរស់នៅភូមិទួលទិល ឃុំតាក្រី ស្រុក កំរៀង ខេត្តបាត់ដំបង។
លោកថ្លែងថា៖«ករណីនេះ នគរបាលជំនាញចរាចរណ៍យើង កំពុងដុតដៃ ដុតជើង ស្វះស្វែងរកចាប់ខ្លួនជនសង្ស័យហើយ។ ជនសង្ស័យបានរត់គេចខ្លួនក្រោយបង្កហេតុ»។
លោកវេ គឹមចត់ អធិការនគរបាលស្រុកកំរៀងឱ្យដឹងនៅថ្ងៃទី២៥ឧ សភា ថា ហេតុការណ៍គ្រោះថ្នាក់ចរាចរណ៍នេះបានកើតឡើងនៅប្រហែលម៉ោងជាង៨យប់ ថ្ងៃទី២៤ ឧសភា នៅតាមបណ្តោយផ្លូវជាតិលេខ៥៧B ចន្លោះបង្គោលគីឡូលេខ៣១ទៅ ៣២ ស្ថិតក្នុងក្រុមទី៥ ភូមិទួលទិល ឃុំតាក្រី ស្រុកកំរៀង ខេត្តបាត់ដំបង។
លោករៀបរាប់តាមសម្តីសាក្សីនៅកន្លែងកើតហេតុថា មុនពេលកើតហេតុ មានម៉ូតូស៊េរីចាស់១គ្រឿងបានបណ្តើរនៅលើចិញ្ចើមផ្លូវខាងស្តាំពីទិសខាងកើតទៅទិសខាងលិច ដោយមានបណ្តើរគ្នាចំនួន៦នាក់ ដែលទើបឡើងមកពីចម្ការ។ គ្រានោះស្រាប់តែមានរថយន្ត១គ្រឿងម៉ាក អ៊ីស៊ុយស៊ុយ(isuzu) ពណ៌ទឹកប្រាក់ ពាក់ផ្លាកលេខព្រះវិហារ 2 A 0193 បើកស្របទិសគ្នាបានបុកម៉ូតូដែលកំពុងបណ្តើរពេញទំហឹង បណ្តាលឱ្យស្ត្រីឈ្មោះកាំង សំណាង អាយុ៥៩ឆ្នាំ ស្លាប់នៅកន្លែងកើតហេតុ។ ក្នុងហេតុការណ៍នោះដែរ ដោយសារតែពេលយប់ងងឹត គេមិនដឹងថា ក្នុងរថយន្តនោះមានមនុស្សប៉ុន្មាននាក់ជិះនោះទេ រីឯអ្នកបើកបរបានរត់គេចខ្លួនបាត់។
បើតាមលោកអធិការ ក្រោយកើតហេតុភ្លាមៗប្រជាពលរដ្ឋបានរាយការណ៍ទៅនគរបាលប៉ុស្តិ៍ឃុំតាក្រី ហើយសមត្ថកិច្ចនគរបាលឃុំ បានរាយការណ៍បន្តមកលោក។ ក្រោយទទួលបានសេចក្តីរាយការណ៍ លោក៏បានដឹកនាំកម្លាំងចុះដល់កន្លែងកើតហេតុ។ ពេលនោះសមត្ថកិច្ចលោកបានដឹកជនរងគ្រោះ ឈ្មោះឡី ស្រីម៉ៅ ឈ្មោះហឿន ធារ៉ា និងហឿន ភារម្យ ទៅមណ្ឌលសុខភាព ប៉ុន្តែដោយរបួសធ្ងន់ពេកពួកគេបានស្លាប់នៅថ្ងៃទី២៦ ឧសភា។ ចំណែករថយន្តត្រូវបានមន្ត្រីនគរបាលចរាចរណ៍ខេត្តអូសយកទៅរក្សាទុកនៅស្នងការដ្ឋាននគរបាលខេត្តបាត់ដំបង ដើម្បីស្វែងរកម្ចាស់ចូលខ្លួនដោះស្រាយតាមច្បាប់៕