.jpg)
ឆ្កែចចកដែលអ្នកភូមិវ៉ៃសម្លាប់ បន្ទាប់ពីបានខាំអ្នកភូមិឱ្យរងរបួសនៅថ្ងៃទី២៤ឧសភា។ រូបថត ហ្វេសប៊ុក
កំពង់ឆ្នាំងៈ មន្ត្រីសុខាភិបាលខេត្តកំពង់ឆ្នាំង អំពាវនាវឱ្យពលរដ្ឋដែលរងរបួសដោយសារឆ្កែចចកខាំ ប្រញាប់រួសរាន់ ទៅកាន់មន្ទីរពេទ្យ ឬមណ្ឌលសុខភាព ដែលស្ថិតនៅក្បែរមូលដ្ឋានរបស់ខ្លួន ដើម្បីចាក់ថ្នាំបង្កាជំងឺឆ្កែឆ្កួត។
កាលពីព្រឹកថ្ងៃទី២៤ ខែឧសភា ឆ្នាំ២០២២ មានសត្វចចកមួយក្បាល បានរត់ចេញពីព្រៃ មកខាំអ្នកភូមិចំនួន៤នាក់ បណ្តាលឱ្យរងរបួសធ្ងន់-ស្រាល បន្ទាប់មកក្រុមអ្នកភូមិបាននាំគ្នា ទាញដំបងដេញព័ទ្ធវាយសម្លាប់ឆ្កែចចកនោះ រួចយកទៅធ្វើម្អូបអាហារ ដោយមិនខ្វល់អំពីការឆ្លងរោគផ្សេងៗឡើយ។
លោក គឹម សុផាត នាយនគរបាលប៉ុស្តិ៍ឃុំខុនរ៉ង បានប្រាប់ភ្នំពេញប៉ុស្តិ៍ថា ជនរងគ្រោះដែលត្រូវបានឆ្កែចចកនោះខាំ គឺជាពលរដ្ឋ នៅភូមិស្នោរ ឃុំខុនរ៉ង ស្រុកបរិបូរណ៍ ។ក្នុងចំណោមជនរងគ្រោះទាំង៤នាក់មានម្នាក់ជាកុមារា ឈ្មោះ ដា វីន អាយុ១៣ឆ្នាំ និង៣នាក់ទៀតជាស្ត្រី រួមមានឈ្មោះ ប៉ិល សុចិន អាយុ៣៤ឆ្នាំ យ៉ត សាឯម អាយុ២៦ឆ្នាំ ទ្រើន ចំណាន អាយុ១៨ឆ្នាំ ។
លោកបានបញ្ជាក់ថា៖«កន្លងមក ពុំមានករណីឆ្កែចចកចេញពីព្រៃចូលមកខាំប្រជាពលរដ្ឋនៅក្នុងភូមិបែបនេះទេ ប៉ុន្តែធ្លាប់មានករណីឆ្កែចចកចូលមកលួចចាប់មាន់ ទា អ្នកភូមិ ដែលដើររកស៊ីចំណីនៅតាមវាលស្រែ និងព្រៃរបោះខាងក្រោយភូមិឋានប្រជាពលរដ្ឋ»។
ចំណែកលោក ទួត វិបុល មេភូមិស្នោរ បានប្រាប់ភ្នំពេញប៉ុស្តិ៍ថា នៅក្នុងព្រៃរបោះខាងក្រោយភូមិរបស់គាត់ មានហ្វូងឆ្កែចចក និង ឆ្កែព្រៃជាច្រើនក្រុមរស់នៅ ហើយរៀងរាល់យប់ និងពេលទៀបភ្លឺ ពួកវាបានបន្លឺសំឡេងលូហៅគ្នា កងរំពងពេញក្នុងព្រៃ។
យូរៗម្ដង ពួកវាបានចេញមករកចាប់ចំណីនៅតាមវាលស្រែ ហើយពេលខ្លះ ពួកវាបានដេញខាំកូនគោរបស់អ្នកភូមិ ដែលបានលែងឱ្យដើរស៊ីស្មៅនៅតាមវាលស្រែនិងតាមព្រៃរបោះជាប់ដងអូរ ខាងក្រោយភូមិផងដែរ។ ប៉ុន្តែពុំដែលហ៊ានចូលមកខាំប្រហារមកលើអ្នកភូមិនោះទេ។
លោកថ្លែងថា៖«វត្តមានរបស់ឆ្កែចចកមួយក្បាលនេះ បានធ្វើឱ្យពលរដ្ឋនៅក្នុងភូមិ-ឃុំយើងខ្ញុំ មានការភ័យខ្លាចមិនហានចេញពីផ្ទះ ទៅមើលស្រែចម្ការ នៅពេលព្រឹកទាបភ្លឺ ឬ ទៅណាមកណាក្នុងពេលយប់ព្រលប់ដូចកាលពីមុនទៀតនោះទេ ព្រោះខ្លាចហ្វូងឆ្កែព្រៃទាំងនោះវា ចេញមកខាំប្រហារ ទៀត»។
ជនរងគ្រោះ ដោយឆ្កែចចកខាំត្រូវលើផ្នែកជង្គង់ និង កំភួនដៃខាងស្ដាំ កញ្ញា យ៉ត សាឯម បានប្រាប់ភ្នំពេញប៉ុស្តិ៍ថា នៅវេលាម៉ោង៥ទាបភ្លឺថ្ងៃទី ២៤ ខែឧសភាឆ្នាំ២០២២ នាងបានចុះពីលើផ្ទះ ដើម្បីរៀបចំដាំស្លរ សម្រាប់យកទៅស្រែ ដែលនៅឯចុងភូមិ។ ខណៈកំពុងរៀបចំដាំស្លរនោះ ស្រាប់តែឆ្កែចចកមួយក្បាល បានលោតមកខាំនាងទាំងកម្រោល។
កញ្ញា សាឯម បានបញ្ជាក់ថា៖«វាលោតខាំចំកំភួនដៃខ្ញុំ ហើយខ្ញុំក៏ភ្ញាក់វាយវាត្រូវមួយដៃ បន្ទាប់មកវាក៏ស្ទុះខាំជើងរបស់ខ្ញុំ ត្រូវផ្នែកខាងលើជង្គង់ ហើយខ្ញុំស្រវាបានដំបងវាយត្រូវខ្នងរបស់វា ប៉ុន្តែវាមិនដួលនោះទេ វាបានរត់ទៅខាំអ្នកភូមិបីនាក់ផ្សេងទៀត ដែលនៅក្បែរផ្ទះរបស់ខ្ញុំ ហើយវាក៏ត្រូវអ្នកភូមិនាំគ្នាយកដំបងមកព័ទ្ធវាយសម្លាប់ យកទៅធ្វើម្អូបអាហារនាព្រឹកនោះតែម្ដងទៅ»។
បើតាមកញ្ញា សាឯម បន្ទាប់ពីត្រូវឆ្កែចចកនោះខាំ នាងបានយកស្រាស មកចាក់លាងរបួស និងផឹកស្រាថ្នាំបុរាណ បំបាត់ការឈឺចាប់ ប៉ុន្តែនៅព្រឹកថ្ងៃទី២៥ខែឧសភា នាងនិងជនរងគ្រោះ៣នាក់ទៀត បាននាំគ្នាទៅចាក់ថ្នាំបង្ការជំងឺឆ្កែឆ្កួត នៅមណ្ឌលសុខភាពឃុំខុនរ៉ង តាមការណែនាំរបស់មន្ត្រីសុខាភិបាលខេត្តកំពង់ឆ្នាំង។
លោក គង់ ចាន់ធា ប្រធានការិយាល័យបច្ចេកទេស នៃមន្ទីរសុខាភិបាលខេត្តកំពង់ឆ្នាំង បានប្រាប់ភ្នំពេញប៉ុស្តិ៍ថា មិនថា សត្វចចក ឆ្កែព្រៃ ឬ ឆ្កែស្រុកនោះទេ នៅពេលដែលពួកវាខាំគឺអាចបង្កឱ្យមានជំងឺឆ្កែឆ្កួត ប្រសិនបើមិនបានលាងសម្អាតមុខរបួសឱ្យបានស្អាតជាមួយថ្នាំសម្លាប់មេរោគ និង ចាក់ថ្នាំបង្ការជំងឺឆ្កែឆ្កួត ឬ ថ្នាំតេតាណូស នោះទេ។
លោកបានបញ្ជាក់ថា៖«យើងមិនដឹងថា ឆ្កែចចកនោះវាមានជំងឺ ឬអត់នោះទេ ដោយសារតែអ្នកភូមិបានសម្លាប់វា និងយកវាទៅធ្វើជាម្ហូបអាហារបរិភោគអស់ទៅហើយ ប៉ុន្តែយកល្អអ្នកដែលត្រូវវាខាំ គប្បីត្រូវទៅចាក់ថ្នាំបង្ការជំងឺឆ្កែឆ្កួតឱ្យបានទាន់ពេលវេលា បើពុំនោះទេ វាអាចបង្កឱ្យស្លាប់បាន នៅពេលដែលមេរោគនៃជំងឺឆ្កែឆ្កួតជ្រាបសព្វសារពាង្គកាយ»។
យោងតាមរបាយការណ៍របស់អង្គការសុខភាពពិភពលោក ជារៀងរាល់ឆ្នាំមានមនុស្សចន្លោះពី ៣៥ ០០០នាក់ ទៅ ៥០ ០០០នាក់ ទូទាំងពិភពលោក បានស្លាប់ដោយសារជំងឺឆ្កែឆ្កួត ក្នុងនោះ៤០ភាគរយ គឺជាកុមារដែលមានអាយុក្រោម១៥ឆ្នាំ៕
