.jpg)
លោកស្រី ឱ វណ្ណឌីន ថ្លែងក្នុងសិក្ខាសាលាស្ដីពីការអនុវត្តច្បាប់។ រូបថត ក្រសួងសុខាភិបាល
ភ្នំពេញៈ កាលពីថ្ងៃទី ២៤ ខែឧសភា ក្រសួងសុខាភិបាលបានអំពាវនាវដល់ប្រជាពលរដ្ឋបញ្ឈប់ការទិញឱសថ ផលិតផលបំប៉នសុខភាព តាមប្រព័ន្ធអនឡាញ ដោយហេតុបារម្ភអំពីផលប៉ះពាល់ដល់សុខភាពសាធារណៈ ដែលអាចជាឱសថក្លែងក្លាយ និងអន់គុណភាព។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាលនៅថ្ងៃទី ២៤ ខែឧសភា បានថ្លែង នៅក្នុងសិក្ខាសាលាស្តីពីការអនុវត្តច្បាប់ពាក់ព័ន្ធនឹងការប្រយុទ្ធប្រឆាំងឱសថក្លែងក្លាយ និងអន់គុណភាព ដើម្បីផ្លាស់ប្តូរបទពិសោធ និងពង្រឹងសមត្ថភាព មន្ត្រីភ្នាក់ងារត្រួតពិនិត្យឱសថក្នុងការបង្ការ ទប់ស្កាត់ ស្រាវជ្រាវ និង ចាត់វិធានការផ្លូវច្បាប់ការប្រយុទ្ធប្រឆាំងឱសថក្លែងក្លាយ និងអន់គុណភាព។
លោកស្រីថ្លែងថា៖ «បច្ចុប្បន្ននេះ ក្រសួងសុខាភិបាលសង្កេតឃើញមានការចរាចរនៅលើទីផ្សារនូវផលិតផលឱសថគ្មានលេខបញ្ជិកា ក៏ដូចជាការផ្សព្វផ្សាយលក់ឱសថ តាមប្រព័ន្ធអនឡាញ ដែលជាបញ្ហាមួយគួរឱ្យព្រួយបារម្ភចំពោះផលប៉ះពាល់សុខភាព ព្រោះក្នុងចំណោមឱសថទាំងនោះ មានមួយចំនួនជាឱសថគ្មានប្រភពច្បាស់លាស់ មិនមានចុះបញ្ជិកាត្រឹមត្រូវពីក្រសួង ហើយអាចជាឱសថក្លែងក្លាយ ឬអន់គុណភាពផងដែរ»។
លោកស្រី ឱ វណ្ណឌីន បានថ្លែងថា ក្រសួងសុខាភិបាលបានធ្វើការអំពាវនាវដល់គ្រប់កន្លែងលក់ឱសថទាំងអស់ត្រូវលក់តែឱសថណា ដែលមានលេខទិដ្ឋាការ ឬបញ្ជិកាពីក្រសួងសុខាភិបាល ដើម្បីចូលរួមការប្រយុទ្ធប្រឆាំងឱសថក្លែងក្លាយ និងអន់គុណភាព។
លោកស្រីបានបញ្ជាក់ថា៖ «ប្រជាពលរដ្ឋត្រូវបញ្ឈប់ការទិញឱសថ ផលិតផលបំប៉នសុខភាព តាមប្រព័ន្ធអនឡាញ ហើយត្រូវទិញផលិតផលទាំងនេះតែពីឱសថស្ថានស្របច្បាប់ ដោយត្រូវពិនិត្យមើលនូវលតាបត្រទិដ្ឋាការ ឬបញ្ជិកា នៅលើសម្បកវេចខ្ចប់ឱសថត្រឹមត្រូវ ដែលក្រសួងយើងតែងតែងជូនព័ត៌មានជាហូរហែកន្លងមកផងដែរ»។
ជាមួយគ្នានេះដែរ លោកស្រីក៏បានស្នើឱ្យប្រជាពលរដ្ឋទាំងអស់ដែលមានជំងឺ ឬបញ្ហាសុខភាពផ្សេងៗត្រូវទៅពិគ្រោះជាមួយគ្រូពេទ្យដែលមានជំនាញត្រឹមត្រូវ ដើម្បីទទួលបានវេជ្ជបញ្ជាសម្រាប់តម្រូវការទិញឱសថប្រើប្រាស់ ដោយមិនត្រូវប្រើប្រាស់ឱសថដោយគ្មានវេជ្ជបញ្ជាឡើយ។
លោកស្រី ឱ វណ្ណឌីន ថ្លែងថា៖ «ការប្រើប្រាស់ឱសថដែលមានវេជ្ជបញ្ជាត្រឹមត្រូវ សំដៅបង្ការកុំឱ្យកើតមានភាពស៊ាំរបស់មេរោគទៅនឹងឱសថ ក៏ដូចជាគ្រោះថ្នាក់ជាយថាហេតុនានា ដែលកើតឡើងដោយការប្រើប្រាស់ឱសថ»។
យោងតាមសេចក្តីប្រកាសព័ត៌មានរបស់ក្រសួងសុខាភិបាលបានឱ្យដឹងថា សិក្ខាសាលានេះជាសិក្ខាសាលាលើកទី ២ បន្ទាប់ពីបានរៀបចំនៅខេត្តកែបកាលពីសប្តាហ៍មុន ដោយសិក្ខាសាលានេះមានការចូលរួមធ្វើបទបង្ហាញពីមន្ត្រីនគរបាលយុត្តិធម៌នៃក្រសួងសុខាភិបាល ក្រសួងមហាផ្ទៃ មន្ត្រីសាលាដំបូង អង្គការពាក់ព័ន្ធរួមនឹងមន្ត្រីភ្នាក់ងារត្រួតពិនិត្យឱសថនៃមន្ទីរសុខាភិបាល ខេត្តចំនួន ១៥ ផងដែរ។
សេចក្តីប្រកាសព័ត៌មានបានបន្តទៀតថា ក្រសួងសុខាភិបាលសង្ឃឹមថា ប្រជាពលរដ្ឋ អាជ្ញាធរពាក់ព័ន្ធ និងដៃគូទាំងអស់នឹងចូលរួមជាមួយនឹងក្រសួងសុខាភិបាលក្នុងសកម្មភាពប្រយុទ្ធប្រឆាំងនឹងឱសថក្លែងក្លាយ និងអន់គុណភាពទាំងអស់គ្នាសំដៅលើកកម្ពស់ សុខុមាលភាពសាធារណៈ ក៏ដូចជារួមចំណែកក្នុងការអភិវឌ្ឍសេដ្ឋកិច្ចជាតិផងដែរ។
គួររំឭកផងដែរថា រដ្ឋមន្ត្រីក្រសួងសុខាភិបាល លោក ម៉ម ប៊ុនហេង និងរដ្ឋមន្ត្រីក្រសួងមហាផ្ទៃ លោក ស ខេង ធ្លាប់បានធ្វើការប្រកាសរួមគ្នាមួយកាលពីឆ្នាំ ២០១៥ ស្តីពីការគ្រប់គ្រងគុណភាព សេវាកម្ម និងវិធានការលុបបំបាត់ផលិតផលសុខាភិបាលខុសច្បាប់ និងសេវាសុខាភិបាលឯកជនខុសច្បាប់ ដើម្បីសុខភាព និងសុវត្ថិភាពសង្គម។
ប្រកាសរួមនេះបានលើកឡើងថា ក្រសួងត្រូវសហការជាមួយស្ថាប័នពាក់ព័ន្ធនានា និងប្រព័ន្ធផ្សព្វផ្សាយជួយអប់រំប្រជាពលរដ្ឋឱ្យបានយល់ពីផលប៉ះពាល់ និងភាពងាយរងគ្រោះដល់សុខភាពសាធារណៈដែលបណ្តាលមកពីការប្រើប្រាស់ផលិតផលសុខាភិបាល និងសេវាសុខាភិបាលគ្មានការអនុញ្ញាតពីក្រសួងសុខាភិបាល៕
វីដេអូ៖
