.jpg)
រោគសញ្ញា អ្នកកើតជំងឺអុតស្វា។ រូបថត ក្រសួងសុខាភិបាល
ភ្នំពេញៈ មកដល់ពេលនេះកម្ពុជាមិនទាន់មានការហាមឃាត់អ្នកដំណើរមកពីប្រទេសណាមួយចូលមកក្នុងប្រទេសកម្ពុជា ទាក់ទងនឹងការសង្ស័យ ពាក់ព័ន្ធនឹងជំងឺអុតស្វា (Monkeypox) ឡើយ ប៉ុន្តែក្រសួងបានណែនាំឱ្យមន្ត្រីប្រចាំការតាមច្រកចេញ-ចូលត្រូវយកចិត្តទុកដាក់ខ្ពស់លើការពិនិត្យសុខភាពអ្នកដំណើរជាប្រចាំ។
ជំងឺអុតស្វា ត្រូវបានរកឃើញជាបន្តបន្ទាប់នៅបណ្តាប្រទេសប្រមាណជា ១៩ ប្រទេសហើយនៅលើពិភពលោកដែលមិនមែនជាប្រទេសអង់ដេមីនៃជំងឺនេះ ដោយគិតត្រឹមថ្ងៃទី ២៣ ខែឧសភា ករណីជំងឺអុតស្វាដែលបានរាយការណ៍ជូនអង្គការសុខភាពពិភពលោក មានចំនួន ១៥៨ នាក់ មានអ្នកសង្ស័យចំនួន ១១៧ នាក់ ប៉ុន្តែមិនទាន់មានករណីស្លាប់ទេ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងនៅថ្ងៃទី ២៥ ឧសភាថា៖ «ទោះបីជាកម្ពុជាមិនមានការរកឃើញករណីជំងឺអុតស្វា ឬ Monkeypox ក៏ដោយ ប៉ុន្តែមន្ត្រីជាន់ខ្ពស់នៃក្រសួងសុខាភិបាលបានណែនាំឱ្យអាជ្ញាធរមូលដ្ឋានត្រូវធ្វើការអប់រំសុខភាពប្រជាពលរដ្ឋ និងលើកកម្ពស់ការយល់ដឹងស្តីពីការការពារ ការចម្លងរោគនៅក្នុងសហគមន៍»។
ក្រសួងសុខាភិបាលក៏បានណែនាំទៅដល់មន្ត្រីប្រចាំការនៅច្រកចេញ-ចូលអន្តរជាតិ ត្រូវយកចិត្តទុកដាក់ពិនិត្យមើលឱ្យបានហ្មត់ចត់នូវអ្នកដំណើរចូលមកកម្ពុជា ដោយត្រូវរាយការណ៍ទៅអាជ្ញាធរសុខាភិបាលភ្លាមៗ ឬទៅលេខ ១១៥ ប្រសិនបើបុគ្គលមានកន្ទួលរមាស់ ឬចេញពងទឹកនៅលើសរីរាង្គអមដោយមានគ្រុនក្តៅ និងមានចេញរោគសញ្ញាសង្ស័យជាដើម។
ប្រភពដដែលបានបញ្ជាក់ថា ត្រូវយកចិត្តទុកដាក់ តាមដានលើអ្នកដំណើរដែលមានប្រវត្តិមកពីប្រទេសប៉ែកខាងអាហ្វ្រិក ដែលមានកើតជំងឺអុតស្វាបែបអង់ដេមី ដូចជាប្រទេសបេណាំង កាមេរូន សាធារណរដ្ឋអាហ្វ្រិកកណ្តាល សាធារណរដ្ឋប្រជាធិបតេយ្យកុងហ្គោ ហ្គាបុង ហ្គាណា កូតឌីវ័រ លីបេរី នីហ្សេរីយ៉ា សាធារណរដ្ឋកុងហ្គោ សៀរ៉ាឡេអូន និងប្រទេសស៊ូដង់ខាងត្បូង។
លោក ម៉ម ប៊ុនហេង បានបន្ថែមថា៖ «មកដល់ពេលនេះមិនទាន់មានការហាមឃាត់អ្នកដំណើរមកពីប្រទេសណាមួយចូលមកកម្ពុជានោះទេ គ្រាន់តែមានការប្រុងប្រយ័ត្ន និងតាមដានស្ថានភាពអ្នកដំណើរចូលមកកម្ពុជា ហើយត្រូវណែនាំអ្នកធ្វើដំណើរទៅកាន់តំបន់ដែលមានជំងឺរាតត្បាតឱ្យចេះការពារខ្លួន»។ ទន្ទឹមនឹងនេះ លោករដ្ឋមន្ត្រីក៏បានណែនាំដល់អ្នកដែលសង្ស័យតែមិនមានរោគសញ្ញា មិនត្រូវដាក់ធ្វើចត្តាឡីស័កទេ ហើយអាចធ្វើការងារជាធម្មតា គ្រាន់តែមានការប្រុងប្រយ័ត្ន ដោយមិនត្រូវមានការប៉ះពាល់អ្នកដទៃក្នុងអំឡុងពេលធ្វើការតាមដានសុខភាពរយៈពេល ២១ ថ្ងៃ បន្ទាប់ពីបានប៉ះពាល់ជាមួយអ្នកឈឺជំងឺអុតស្វានេះ។
លោក រដ្ឋមន្ត្រី ក៏បានឱ្យក្រុមគ្រូពេទ្យបម្រើការនៅតាមមូលដ្ឋានសុខាភិបាលទាំងរដ្ឋ និងឯកជន ត្រូវពង្រឹងប្រព័ន្ធតាមដានជំងឺនៅតាមមន្ទីរពេទ្យនានា ក្នុងកាលៈទេសៈដែលមិនទាន់មានការរាតត្បាតជំងឺនេះក្នុងប្រទេសនៅឡើយ ដើម្បីអាចរកឃើញករណីសង្ស័យ ឬករណីឆ្លងបានលឿន និងអាចចាត់វិធានការសុខាភិបាលបានទាន់ពេលវេលា។
ក្រៅពីវិធានការការពារនានា ក្រសួងក៏កំពុងរិះរកប្រភព ដើម្បីផ្គត់ផ្គង់វ៉ាក់សាំងអុតស្វាទុកជាមុនផងដែរ។
ទាក់ទងនឹងអ្នកដំណើរនៅច្រកចេញ-ចូលអន្តរជាតិ លោក ស៊ិន ចាន់សេរីវត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិលបានប្រាប់ភ្នំពេញ-ប៉ុស្តិ៍ថា ក្រសួងសុខាភិបាលជាអ្នកដែលមានវិធានការ និងចេញប្រកាស ផ្សព្វផ្សាយទៅដល់ប្រជាពលរដ្ឋឱ្យមានការប្រយ័ត្នប្រយែង។
លោកបន្តថា ចំណែកខាងអាកាសចរស៊ីវិលមានភារកិច្ចសហការជួយសម្រួលដល់សមត្ថកិច្ចពាក់ព័ន្ធបានធ្វើការងាររបស់ពួកគាត់នៅតាមច្រកអន្តរជាតិនៅពេលអ្នកដំណើរមកដល់។
លោក ស៊ិន ចាន់សេរីវត្ថា មានប្រសាសន៍ថា៖ «អ្នកដំណើរដែលចូលមកក្នុងប្រទេសកម្ពុជាយើង មិនមានការធ្លាក់ចុះទេ គឺមានភាពប្រក្រតីជាធម្មតា ដោយសារតែមិនទាន់មានការប្រកាសអាសន្ននៅលើពិភពលោកទេសម្រាប់ជំងឺនេះ គ្រាន់តែយើងត្រូវប្រយ័ត្នប្រយែង ជាក្តីបារម្ភរបស់អង្គការសុខភាពពិភពលោក»។
គួរបញ្ជាក់ដែរថា រោគសញ្ញានៃជំងឺអុតស្វានេះ គឺអ្នកជំងឺមានចេញកន្ទួលរមាស់បែបពងទឹកនៅលើដងខ្លួន បាតដៃ បាតជើង និងផ្ទៃមុខ អមដោយរោគសញ្ញាក្តៅខ្លួនលើសពី ៣៨,៥ អង្សាសេ និងមានឈឺក្បាល ហើមកូនកណ្តុរ ឈឺសាច់ដុំ និងខ្លួនប្រាណ ឈឺចង្កេះ អស់កម្លាំងខ្លាំង៕
