ភ្នំពេញៈ លោកនាយករដ្ឋមន្ត្រី ហ៊ុន សែន នឹងចូលរួមជាមួយប្រមុខរដ្ឋ និងប្រមុខរដ្ឋាភិបាល និងឥស្សរជនជាន់ខ្ពស់មកពីបណ្ដាប្រទេសអាស៊ីដទៃទៀតក្នុងសន្និសីទអន្តរជាតិលើកទី ២៧ ស្ដីពី «អនាគតរបស់អាស៊ី» នៅថ្ងៃទី ២៦-២៧ ខែឧសភា នៅទីក្រុងតូក្យូ ប្រទេសជប៉ុនតាមប្រព័ន្ធវីដេអូ។
សេចក្តីប្រកាសព័ត៌មាន ក្រសួងការបរទេសកម្ពុជាបញ្ជាក់នាថ្ងៃទី ២៥ ខែឧសភាថា សន្និសីទនេះធ្វើឡើងក្រោមមូលបទ «ការកំណត់ឡើងវិញនូវតួនាទីរបស់ទ្វីបអាស៊ី នៅក្នុងពិភពលោកដែលបែកខ្ញែក» ក្នុងទម្រង់រូបវន្តផង និងតាមប្រព័ន្ធអនឡាញផង។
សេចក្តីប្រកាសព័ត៌មាននេះបន្តថា លោក ហ៊ុន សែន នឹងថ្លែងពីការស្តារសេដ្ឋកិច្ច-សង្គមឡើងវិញក្រោយពីវិបត្តិជំងឺកូវីដ ១៩ ការបន្តដាក់សម្ពាធលើបរិយាកាសសន្តិសុខសកល ការប្រកួតប្រជែងភូមិសាស្ដ្រនយោបាយរវាងមហាអំណាច និងសារៈសំខាន់នៃពហុភាគីនិយម និងកិច្ចសហប្រតិបត្តិការអន្តរជាតិដោយផ្អែកលើវិធានច្បាប់។ លោកក៏នឹងគូសបញ្ជាក់ផងដែរអំពីផែនការស្តារសេដ្ឋកិច្ចឡើងវិញ ក្រោយវិបត្តិជំងឺកូវីដ ១៩ កិច្ចខិតខំប្រឹងប្រែងរបស់កម្ពុជាក្នុងការដោះស្រាយបញ្ហាការប្រែប្រួលអាកាសធាតុ និងអំពើភេរវកម្មឆ្លងដែន និងតួនាទីរបស់អាស៊ាន រួមទាំងកម្ពុជាក្នុងការកសាងអនាគតដ៏ត្រចះត្រចង់សម្រាប់ទ្វីបអាស៊ី និងពិភពលោក។
សេចក្តីប្រកាសព័ត៌មានបានបញ្ជាក់ថា៖ «ការអញ្ជើញចូលរួមតាមប្រព័ន្ធវីដេអូរបស់សម្តេចតេជោនាយករដ្ឋមន្ត្រីនៅក្នុងសន្និសីទអន្តរជាតិខាងលើនឹងឆ្លុះបញ្ចាំងអំពីការប្តេជ្ញាចិត្តរបស់កម្ពុជាក្នុងការដើរតួនាទីដ៏សកម្មនៅក្នុងការកសាងអនាគតប្រកបដោយនិរន្តរភាពមួយសម្រាប់អាស៊ី និងពិភពលោក ជាពិសេសនៅក្នុងបុព្វហេតុស្តារឡើងវិញ ក្រោយវិបត្តិជំងឺកូវីដ ១៩»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា ប្រាប់ភ្នំពេញប៉ុស្តិ៍នាថ្ងៃទី ២៥ ខែឧសភាថា អ្វីដែលកម្ពុជាអាចចែករំលែកក្នុងវេទិកានេះជាមួយប្រទេសផ្សេងទៀត គឺពាក់ព័ន្ធនឹងបទពិសោធ «ប្រកបដោយភាពជោគជ័យ» របស់កម្ពុជាក្នុងការប្រយុទ្ធប្រឆាំងជំងឺកូវីដ- ១៩ និងផែនការស្តារសេដ្ឋកិច្ចឡើងវិញដែលជាមេរៀនដ៏សំខាន់មួយ។
លោកថ្លែងថា កម្ពុជាក៏នឹងផ្តោតលើសារៈសំខាន់ពាក់ព័ន្ធនឹងគោលការណ៍ពហុភាគីនិយម ពីព្រោះបញ្ហាប្រឈមជាច្រើន ដែលចាំបាច់ត្រូវការសាមគ្គីភាពពីសំណាក់សហគមន៍អន្តរជាតិក្នុងការដោះស្រាយបញ្ហាប្រឈមទាំងអស់នេះ រាប់ទាំងជំងឺរាតត្បាតកូវីដ- ១៩បញ្ហាបម្រែបម្រួលអាកាសធាតុ បញ្ហាបរិស្ថានក៏ដូចជាបញ្ហាកង្វល់សន្តិសុខអន្តរជាតិផ្សេងទៀតដូចជាអំពើភេរវកម្មជាដើម។ កម្ពុជាអាចនឹងលើកឡើងពាក់ព័ន្ធជាមួយនឹងសណ្តាប់ធ្នាប់ពិភពលោកដែលពឹងផ្អែកលើច្បាប់ (Rule-based global order)។ លោក គិន ភា ថ្លែងថា៖ «ដូចជាវិបត្តិនៅអ៊ុយក្រែននេះវាបង្ហាញពីភាពចលាចលនៃសណ្តាប់ធ្នាប់ពិភពលោកដែលចាំបាច់ត្រូវតែនាំគ្នាពង្រឹងទៅលើគោលកាណ៍ច្បាប់អន្តរជាតិ និងធម្មនុញ្ញនៃអង្គការសហប្រជាជាតិ»៕