.jpg)
លោក កឹម សុខា ពេលចេញពីតុលាការកាលពីខែមករា។ ហុង មិនា
ភ្នំពេញៈ ក្នុងសវនាការលើកទី ៤១ លោក កឹម សុខា ប្រធានអតីតគណបក្សសង្គ្រោះជាតិបានព្យាយាមឆ្លើយសំណួររបស់ក្រុមសហមេធាវីរបស់លោក និង បង្ហាញភ័ស្តុតាងមួយចំនួន ដើម្បីដោះបន្ទុកពីការចោទប្រកាន់ពាក់ព័ន្ធទៅនឹងបទសន្ទិដ្ឋភាពជាមួយបរទេស ឬត្រូវរ៉ូវជាមួយរដ្ឋបរទេស ដើម្បីផ្តួលរំលំរាជរដ្ឋាភិបាលស្របច្បាប់។
លោក ចាន់ ចេន សហមេធាវីរបស់លោក កឹម សុខា ប្រាប់ក្រុមអ្នកសារព័ត៌មាននៅក្រោយបញ្ចប់សវនាការនៅថ្ងៃទី ២៥ ឧសភា ថា សវនាការលោក កឹម សុខា លើកទី ៤១ នេះមិនមានលក្ខណៈជឿនលឿនទៅមុខទៅតាមអ្វីដែលក្រុមមេធាវី ក៏ដូចជាកូនក្តីរបស់លោកចង់បាននោះទេ។ ប៉ុន្តែអ្វីដែលគួរឱ្យកត់សម្គាល់ គឺក្រុមប្រឹក្សាបានផ្តល់ឱកាសឱ្យសហមេធាវីរបស់លោក សួរដេញដោល លោក កឹម សុខា ដែលមាន ១២ សំណួរ។
លោកបន្តថា សំណួរទាំងនោះពាក់ព័ន្ធទៅនឹងបទចោទដូចជាសួរថា៖ «តើឯកឧត្តម កឹម សុខា មានបានចុះកិច្ចព្រមព្រៀង ឬឃុបឃិតជាមួយរដ្ឋបរទេស ឬ ភ្នាក់ងារបរទេសឬទេ?»។
លោក កឹម សុខា បានឆ្លើយនូវរាល់សំណួរទាំងអស់របស់មេធាវីដោយបានបង្ហាញថា លោកមិនបានឃុបឃិតជាមួយរដ្ឋបរទេស ឬភ្នាក់ងារបរទេស ឬ អង្គការបរទេស ដើម្បីផ្តួលរំលំរដ្ឋាភិបាលនោះទេ។ ផ្ទុយទៅវិញរាល់សកម្មភាពទាំងអស់របស់លោក កឹម សុខា ដែលបានធ្វើតាំងពីចូលឆាកនយោបាយនៅក្នុងគណបក្សប្រជាធិបតេយ្យសេរីនិយមព្រះពុទ្ធសាសនា គណបក្សហ៊្វុនស៊ិនប៉ិច មជ្ឈមណ្ឌសិទ្ធិមនុស្សកម្ពុជា និងក្រោយមកគណបក្សសិទ្ធិមនុស្ស និងគណបក្សសង្គ្រោះជាតិជាស្ថាប័នដែលទទួលស្គាល់ដោយក្រសួងមហាផ្ទៃ គឺមិនបានឃុបឃិតជាមួយបរទេសដូចការចោទប្រកាន់នោះទេ។ ដោយឡែក អង្គការអន្តរជាតិមាន USAID ជាដើមក៏ជាស្ថាប័នមួយដែលរដ្ឋាភិបាលទទួលស្គាល់ដែរ។ លោកថ្លែងថា៖ «ឯកឧត្តម កឹម សុខា បានបញ្ជាក់ច្បាស់ហើយថា គឺអត់បានធ្វើអីតាមការចោទប្រកាន់របស់តំណាងអយ្យការទេ»។
លោក ចាន់ ចេន បន្តទៀតថា សវនាការនៅព្រឹកថ្ងៃទី ២៥ ឧសភា លោក កឹម សុខា ក៏បានឱ្យចាក់វីដេអូមួយដែលបានថ្លែងនៅខេត្តព្រៃវែង ដើម្បីគាំទ្រនូវសម្តីរបស់លោកថា លោកមិនត្រឹមតែមិនបានឃុបឃិតជាមួយបរទេសទេសូម្បីតែរណបបរទេសក៏លោកមិនធ្វើជាដាច់ខាត។ នេះបញ្ជាក់យ៉ាងច្បាស់ថា លោក កឹម សុខា អត់មានត្រូវរ៉ូវ ឬឃុបឃិតជាមួយរដ្ឋបរទេស ដើម្បីឱ្យប្រទេសកម្ពុជា មានភាពប្រទូសរ៉ាយនោះទេ។ លោកបញ្ជាក់ថា៖ «អ្វីដែលឯកឧត្តម កឹម សុខា ថ្លែង ១ ព្រឹកនេះ ក៏ដូចជាកន្លងមក គឺចង់បង្ហាញថា គាត់ជាមនុស្សស្អាតស្អំ អត់មានប្រព្រឹត្តដូចការចោទប្រកាន់នោះទេ»។
លោក ចាន់ ចេន ក៏សង្កេតឃើញដើមបណ្តឹងរដ្ឋប្បវេណីបានលើកឡើងថា នៅក្នុងសវនាការលើកនេះលោក កឹម សុខា និងមេធាវីការពារក្តីឱ្យជនជាប់ចោទ ហាក់បីដូចជាមានសិទ្ធិពេញលេញ និងឱកាសនិយាយច្រើននៅក្នុងសវនាការ ប៉ុន្តែតាមច្បាប់ ជនជាប់ចោទមានសិទ្ធិទទួលនូវការជំនុំជម្រះឱ្យបានឆាប់ និងយុត្តិធម៌។
លោក ប្លង់ សុផល អ្នកនាំពាក្យអយ្យការសាលាដំបូងរាជធានី-ភ្នំពេញបានប្រាប់ភ្នំពេញប៉ុស្តិ៍ថា សវនាការលោក កឹម សុខា នៅថ្ងៃទី ២៥ ខែឧសភា មិនមានអ្វីទៅមុខទេ ដោយហេតុថា ក្រុមប្រឹក្សាជំនុំជម្រះបានកំណត់អំពីការសាកសួរអំពីការចុះឈ្មោះ និងការប្រកាសលទ្ធផលបោះឆ្នោត ប៉ុន្តែមេធាវីការពារសិទ្ធិឱ្យជនជាប់ចោទបានលើកជាសំណួរក៏ដូចជាបញ្ហាទាំងឡាយពាក់ព័ន្ធនឹងការចាប់ខ្លួនជនជាប់ចោទទៅវិញ។ លោកថ្លែងថា៖ «ករណីនេះគឺជាការមិនគោរពនឹងការសម្រេចរបស់ក្រុមប្រឹក្សាជំនុំជម្រះម្យ៉ាងទៀត ការសាកសួរនេះទៀតសោតគឺបានធ្វើរួចតាំងពីចាប់ផ្តើមសវនាការលើកទី ២ ឬទី ៣ មកម្ល៉េះ។ ដូច្នេះហើយទើបធ្វើឱ្យសវនាការមិនបានទៅមុខ ហើយដែលជាទម្លាប់កន្លងមក មានការចោទប្រកាន់ថា តុលាការមានចេតនាអូសបន្លាយពេលវេលាសវនាការ»។
តាមប្រតិទិនរបស់តុលាការ សវនាការរបស់លោក កឹម សុខា នឹងត្រូវបន្តធ្វើនៅថ្ងៃទី ១ ខែមិថុនា ឆ្នាំ ២០២២៕
វីដេអូ៖
