ភ្នំពេញៈ មន្ទីរសង្គមកិច្ចរាជធានី-ភ្នំពេញ និងដៃគូកំពុងរកវិធីជួយស្ដ្រីម្នាក់ជាមេម៉ាយកូន ៥ នាក់ បន្ទាប់ពីកូនស្រីគាត់ម្នាក់អាយុ ៥ ឆ្នាំ ត្រូវបានស្ដ្រីម្នាក់ដែលយកទៅចិញ្ចឹមប្រើហិង្សាធ្ងន់ធ្ងរ ខណៈគណៈកម្មការការពារកុមារថ្នាក់ជាតិនៃក្រុមប្រឹក្សាជាតិកម្ពុជា ដើម្បីកុមារ (ក.ជ.ក) ថ្កោលទោស និងស្នើឱ្យដាក់ទោសធ្ងន់ធ្ងរដល់ជនសង្ស័យ ។ ការថ្កោលទោសនេះបន្ទាប់ពីស្រី្តម្នាក់ឈ្មោះ ចាន់ ធីតា អាយុ ៣៧ ឆ្នាំស្នាក់នៅផ្ទះជួលលេខ ១៣ ផ្លូវ ២១៩ ក្នុងសង្កាត់ផ្សារដេប៉ូ ១ ខណ្ឌទួលគោក រាជធានី-ភ្នំពេញបានប្រើអំពើហិង្សាលើកុមារីឈ្មោះ កង ស្រីកា អាយុ ៥ ឆ្នាំ ដែលជាអ្នកបម្រើតាមផ្ទះ ពីថ្ងៃទី ២០ ខែឧសភា បន្ទាប់ពីសុំពីម្ដាយបង្កើតបាន ១ ឆ្នាំ។
សេចក្តីថ្លែងការណ៍របស់ ក.ជ.ក ចុះថ្ងៃទី ២៤ ខែឧសភា បានថ្កោលទោសដាច់អហង្ការ ដោយមិនអាចទទួលយកបានដាច់ខាតចំពោះការប្រព្រឹត្តអំពើហិង្សាដោយចេតនាយ៉ាងអមនុស្សធម៌ដែលបង្កឡើងដោយឈ្មោះ ចាន់ ធីតា ។ ក.ជ.ក ក៏ដូចជាសាធារណជនពិតជាមានក្ដីរន្ធត់ និងអាណិតកុមារីដ៏កម្សត់នេះណាស់ដែលទទួលរងគ្រោះដោយអំពើហិង្សាយ៉ាងអមនុស្សធម៌។
ក.ជ.ក ថា «អំពើនេះបានរំលោភបំពានយ៉ាងធ្ងន់ធ្ងរទៅលើសិទ្ធិកុមារ ជាពិសេស សិទ្ធិទទួលបាននូវកិច្ចការពារដែលប្រទេសកម្ពុជាបានផ្តល់សច្ចាប័ន និងមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា»។
លើសពីនេះ ក.ជ.ក ដែលជាស្ថាប័នសម្របសម្រួលលើការងារសិទ្ធិកុមារបានអំពាវនាវដល់សមត្ថកិច្ចគ្រប់លំដាប់ថ្នាក់ ជាពិសេសតុលាការដាក់ទោសជនសង្ស័យតឹងរ៉ឹងបំផុត ដើម្បីកុំឱ្យអំពើដ៏អាក្រក់នេះកើតមានក្នុងសង្គមជាតិបន្តទៀត។
ជាមួយគ្នានេះដែរ ក.ជ.ក ក៏កោតសរសើរ និងអរគុណចំពោះសមត្ថកិច្ចដែលបានឃាត់ខ្លួនអ្នកប្រើអំពើហិង្សារូបនេះបានទាន់ពេលផងដែរ។
ពាក់ព័ន្ធនឹងករណីនេះកាលពីយប់ថ្ងៃទី ២៣ ខែឧសភា នគរបាលរដ្ឋបាលផ្សារដេប៉ូទី ១ នៃអធិការដ្ឋាននគរបាលខណ្ឌទួលគោកបានឃាត់ខ្លួន ឈ្មោះ ចាន់ ធីតា ហៅ ធីតា នៅមុខផ្ទះលេខ ១៣Eo ផ្លូវលេខ ២១៩ ភូមិ ៣ ក្នុងសង្កាត់ផ្សារដេប៉ូទី ១ រាជធានីភ្នំពេញ បន្ទាប់ពីជនសង្ស័យបានប្រើដៃវាយលើផ្ទៃមុខ និងប្រើដែកតម្ពក់ព្យួរខោអាវវ៉ៃលើក្មេងស្រី កង ស្រីកា ពីថ្ងៃទី ២០ ខែឧសភា ។
អធិការនគរបាលខណ្ឌទួលលោក សុខ ហេង បានឱ្យដឹងថា ជនសង្ស័យ ដែលទទួលក្មេងស្រីរងគ្រោះមករស់នៅជាមួយជាអ្នកលក់កាហ្វេ បច្ចុប្បន្នជនសង្ស័យកំពុងបញ្ជូនមកអធិការដ្ឋាននគរបាលខណ្ឌទួលគោក ដើម្បីសាកសួរ និងចាត់ការបន្តតាមនីតិវិធី។
លោកថា៖ «យើងកំពុងកសាងសំណុំរឿងដើម្បីបញ្ជូនទៅតុលាការពីបទទារុណកម្ម និងអំពើឃោរឃៅ (ប្រើដៃវាយលើផ្ទៃមុខ និងប្រើដែកតម្ពក់សម្រាប់ព្យួរខោអាវវ៉ៃលើក្មេងស្រីរងគ្រោះបណ្ដាលឱ្យរបួសធ្ងន់ធ្ងរ) »។
ទោះបីជាយ៉ាងណា លោកមិនទាន់ប្រាប់ពីមូលហេតុដែលនាំឱ្យស្រី្តរូបនោះឈានដល់ប្រើអំពើហិង្សានៅឡើយទេ ដោយលោកបានបញ្ជាក់ថា រឿងនេះពាក់ព័ន្ធជំនាញសួរចម្លើយ ។
ក៏ប៉ុន្តែលោកបានឱ្យដឹងថា ចំពោះក្មេងស្រីរងគ្រោះសមត្ថកិច្ចបានប្រគល់ជូនមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ ដើម្បីបញ្ជូនទៅព្យាបាលរបួស ។
លោកស្រី មុំ ចាន់ដានី ប្រធានមន្ទីរ សង្គមកិច្ច អតីតយុទ្ធជន និងយុវនីតិសម្បទា រាជធានីភ្នំពេញ ថ្លែងថាខាងមន្ទីរបានសហការជាមួយអង្គការមិត្តសម្លាញ់បញ្ជូនក្មេងស្ត្រីរងគ្រោះទៅមន្ទីរពេទ្យបង្អែករាជធានីតាំងពីថ្ងៃកើតហេតុមកម្ល៉េះ តែបច្ចុប្បន្នបញ្ជូនមកសម្រាកព្យាបាលនៅមន្ទីរពេទ្យកុមារជាតិ។
លោកស្រីបន្តថា បន្ទាប់ពីមានហេតុការណ៍នេះ ក្រុមការងារស្វះស្វែងរកឃើញស្ត្រីជាម្តាយក្មេងនោះ ឈ្មោះ កេង សុភា អាយុ ៣៦ ឆ្នាំ ដែលកំពុងស្នាក់នៅផ្ទះជួលមួយកន្លែងនៅភ្នំពេញដោយគាត់ជាស្ត្រីមេម៉ាយមានកូនក្នុងបន្ទុករហូតដល់ ៥ នាក់។
លោកស្រីថា៖ «គាត់ជាគ្រួសារទីទ័លក្រគាត់បានឱ្យកូនរបស់ខ្លួនទៅស្រី្តដែលជាជនសង្ស័យដោយជនសង្ស័យប្រាប់ថា ស្រឡាញ់ចង់យកទៅថែទាំហើយក៏មិនបានដឹងថា យកកូនទៅប្រើអំពើហិង្សាទេ»។
លោកស្រីថា៖ «ក្មេងស្រីនោះមិនជាប់សាច់ញាតិរបស់ជនសង្ស័យឡើយនិយាយឱ្យស្រួលស្តាប់ក្មេងស្រីនោះជាអ្នកបម្រើតាមផ្ទះ ហើយជាកុមារ ព្រោះគេយកទៅមើលកូនគេទើបកើត ជួយយោលអង្រឹង ក្មេងនោះស្នាក់នៅផ្ទះជនសង្ស័យបានជាង ១ ឆ្នាំ »។
យ៉ាងណាក្ដី លោកស្រី មុំ ចាន់ដានី សម្រាប់ពេលនេះ មន្ទីរសង្គមកិច្ច និងអង្គការមិត្តសម្លាញ់បានជួយថែទាំសុខភាពក្មេងស្រី និងកំពុងស្វែងរកបន្ទប់ជួលឱ្យក្រុមគ្រួសារក្មេងនោះស្នាក់នៅបណ្តោះអាសន្ន ។
លោកស្រីថា៖ «យើងជួយគាត់បឋមនោះ គឺជួយត្រឹមការហូបចុក និងការស្នាក់នៅរបស់ស្ត្រីជាម្តាយកុមារ យើងកំពុងតែគិតថា ជួយអីគាត់បន្ថែមទៀតឱ្យមានជីវភាពប្រសើរឡើង»។
ពាក់ព័ន្ធផ្លូវច្បាប់វិញ លោកស្រីថា ករណីឱ្យកូនទៅស៊ីឈ្នួលបម្រើគេតាមផ្ទះនេះ ដោយសារពលរដ្ឋអត់យល់ថានេះជាការជួញដូរកម្លាំងពលកម្មក្មេងទើបចាញ់បោកជនសង្ស័យ ប៉ុន្ដែមន្ទីរបានណែនាំ និងឱ្យម្តាយធ្វើកិច្ចសន្យាបញ្ឈប់ទង្វើនេះផងដែរ។
លោកស្រីថា៖ «បើយើងគិតថា យកគាត់ទៅដាក់ទោសទណ្ឌទៀត ចុះកូនកំព្រា ៤ នាក់ទៀតកំពុងអត់ឪពុកផង ហើយម្តាយជាប់ទោសទៀត អ៊ីចឹងតើនឹងទៅជាយ៉ាងណា? ត្រង់នេះដែលយើងត្រូវគិតដែរ គាត់គិតថា គេយកកូនគាត់ទៅរស់នៅជាមួយគេ គាត់គិតថាគេជួយគាត់ អ៊ីចឹងបានថា មនុស្សគាត់មិនយល់ច្បាប់។ ប្រាកដណាស់ យើងពន្យល់ផ្លូវច្បាប់ដល់គាត់ថានេះជាការលក់ដូរកូន ហើយគាត់យំស្រែកព្រោះ គាត់មិនដឹង ហើយគាត់នេះហើយចូលរួមដាក់ពាក្យបណ្តឹងសស្រោកសស្រាំជាមួយយើង»។
លោកស្រី សោម វឌ្ឍនា ប្រធានផ្នែកផ្តល់សេវាកម្មគាំពារកុមារនៃអង្គភាពការពារកុមារ (child protection unit) ថ្លែងថា ដោយសារមិនទាន់មានសំណុំរឿងនេះក្នុងដៃ ដូច្នេះមិនទាន់អាចសន្និដ្ឋាននោះទេ។ ក៏ប៉ុន្តែលោកស្រីចូលរួមអបអរសាទរចំពោះចំណាត់ការរបស់សមត្ថកិច្ច និងការថ្កោលទោសរបស់ក្រុមប្រឹក្សាជាតិកម្ពុជា ដើម្បីកុមារពាក់ព័ន្ធការប្រើហិង្សាលើកុមារនេះ៕
វីដេអូ៖