.jpg)
ទីស្នាក់ការ គជប ស្ថិតក្នុងក្រសួងមហាផ្ទៃ។ ហុង មិនា
ភ្នំពេញៈ ស្ថាទូតជប៉ុនប្រចាំកម្ពុជា គ្រោងដាក់អ្នកសង្កេតការណ៍បោះឆ្នោតយ៉ាងហោចណាស់ ២០ នាក់ ក្នុងនាមជាភ្ញៀវពិសេសរបស់ គ.ជ.ប សម្រាប់ការបោះឆ្នោតជ្រើសរើសក្រុមប្រឹក្សឃុំសង្កាត់អាណត្តិទី៥ ដែលនឹងប្រព្រឹត្តិទៅនៅថ្ងៃទី ៥ ខែ មិថុនា ឆ្នាំ ២០២២ ខាងមុខនេះ។
លោក ហង់ ពុទ្ធា អ្នកនាំពាក្យ គ.ជ.ប ប្រាប់ ភ្នំពេញ ប៉ុស្តិ៍ នៅថ្ងៃទី ២៦ ខែឧសភាថា មន្ត្រីនៃគណៈកម្មការជាតិរៀបចំការបោះឆ្នោត កាលពីថ្ងៃទី ២៥ ខែឧសភា បានជួបជាមួយនឹងមន្ត្រីមកពីស្ថានទូតជប៉ុន ពិភាក្សាអំពីដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ដោយក្នុងនោះ ភាគីជប៉ុននឹងដាក់អ្នកសង្កេតការណ៍ ក្នុងនាមជាភ្ញៀវពិសេស ប៉ុន្តែ មិនធ្វើរបាយការណ៍នោះទេ។
លោកបន្តថា ក្រោយពីពិភាក្សា ភាគីជប៉ុននឹងរៀបចំបញ្ជីឈ្មោះក្រុមអ្នកសង្កេតការណ៍ បញ្ជូនមក គ.ជ.ប ដែលពួកគាត់មានសិទ្ធិឃ្លាំមើល និងសង្កេតការណ៍ ការបោះឆ្នោតនៅគ្រប់មណ្ឌលបោះឆ្នោតទាំងអស់ ប៉ុន្តែ មិនធ្វើរបាយការណ៍នោះទេ។ ក្រុមអ្នកសង្កេតការណ៍នេះ មិនលើសពី ២០ រូបនោះទេ។
លោក ហង់ ពុទ្ធា ថ្លែងថា គ.ជ.ប មានគោការណ៍ ឱ្យមានអ្នកសង្កេតការណ៍ជាភ្ញៀវពិសេស ដូច្នេះ ក្រុមអ្នកសង្កេតការណ៍មកពីស្ថានទូតជប៉ុននេះ គឺជាភ្ញៀវពិសេស ដែលបានស្ម័គ្រចិត្តក្នុងការចូលរួមសង្កេតការណ៍ និងឃ្លាំមើលការបោះឆ្នោតនៅពេលខាងមុខ។
លោកថ្លែងថា៖ «គាត់មានសិទ្ធិដើរឃ្លាំមើលការបោះឆ្នោត នៅពេលដែលឃើញភ្ញៀវពិសេស ប្រធានការិយាល័យបោះឆ្នោត គាត់នឹងធ្វើការសម្របសម្រួល ហើយប។ គ.ជ.ប បានជំរាបពីនីតិវិធី នៃការដាក់ហើយ ហើយនៅរង់ចាំគាត់ដាក់ក្រុមប៉ុន្មានរូប។ ប៉ុន្តែ ខ្ញុំគិតថា មិនលើសពី ២០ រូបទេ»។
លោក សុន ឆ័យ អនុប្រធានគណបក្សភ្លើងទៀន នៅថ្ងៃទី ២៧ ខែឧសភា នេះ បានស្វាគមន៍ និងរីករាយចំពោះភាគីជប៉ុនដែលបានចូលរួមដាក់អ្នកសង្កេតការណ៍ បើទោះបី មិនឱ្យធ្វើរបាយការណ៍ណាមួយក៏ដោយ ពីជប៉ុន បាន យកចិត្តទុកដាក់ខ្ពស់ចំពោះការបោះឆ្នោតនៅកម្ពុជាតាំងពីដើមរៀងមក។
លោកថ្លែងថា៖ «ការចូលរួមបើទោះបីជាមិនមានការចេញសេចក្តីថ្លែងការណ៍ ក៏វាជាការតាមដានមួយដែលជប៉ុនអាចយកទៅពិនិត្យក្នុងការកែលម្អស្ថាប័បោះឆ្នោតនេះ ឱ្យល្អប្រសើរឡើងនៅពេលក្រោយទៀត»។
លោក សំ សុគន្ធាមី ប្រធានអង្គការនីហ្វិកប្រាប់ ភ្នំពេញ ប៉ុស្តិ៍ នៅថ្ងៃទី ២៦ ខែឧសភាថា អ្នកសង្កេតការណ៍ជប៉ុន គ្រាន់តែឃ្លាំមើល និងសង្កេតមើលជាទូទៅ ដោយមិនមានការពង្រាយក្រុមការងារច្រើននោះទេ ។ ជាមួយគ្នានេះ ក៏មិនចេញសេចក្តីថ្លែងការណាមួយនោះដែរ។
លោកថ្លែងថា៖ « វាល្អហើយ សម្រាប់ការបោះឆ្នោត ដែលមានជប៉ុនចូលឃ្លាំមើលគេមិនចេញសេក្តីថ្លែងការណ៍មែនតែគេនឹងកត់សម្គាល់នៅការបោះឆ្នោត។ ហើយ EU ក៏នឹងសួរយោបល់ខាងជប៉ុន ដែរ។ និយាយរួម វាក្រៅផ្លូវការ មែន ប៉ុន្តែ គេអាចផ្តល់យោបល់នៅពេលក្រោយបាន»៕
