.jpg)
សមត្ថកិច្ចខេត្តសៀមរាប ដុតបំផ្លាញឧបករណ៍នេសាទខុសច្បាប់ កាលពីថ្ងៃទី ២៥ ឧសភា។ រូបថត ហ្វេសប៊ុក
ពោធិ៍សាត់ៈ ក្នុងរយៈពេលជាង ២ ខែកន្លងមកនេះ ជនសង្ស័យ ២៥ នាក់ ក្នុងចំណោម ៤៨ នាក់ ត្រូវបានតុលាការខេត្តនៅជុំវិញបឹងទន្លេសាប សម្រេចឃុំខ្លួន ដាក់ក្នុងពន្ធនាគារ ពាក់ព័ន្ធបទល្មើសជលផល ខណៈ ១៩ នាក់ទៀត ត្រូវបានតុលាការចេញដីការស្វែងរកចាប់ខ្លួនក្នុងបទល្មើសដូចគ្នានេះ។ នេះបើយោងតាមទិន្នន័យ ស្ដីពីការបង្ក្រាបបទល្មើសជលផល ក្នុងខេត្តជុំវិញបឹងទន្លេសាប របស់រដ្ឋបាលជលផល ដែលភ្នំពេញប៉ុស្តិ៍ទទួលបាននៅថ្ងៃទី ២៦ ខែ ឧសភា ឆ្នាំ ២០២២។
តាមរយៈតារាងទិន្នន័យនេះ បានបង្ហាញថា ក្នុងរយៈពេលជាង ២ ខែកន្លងមកនេះ ដោយគិតចាប់ពីថ្ងៃទី ២ ខែមិនា ដល់ថ្ងៃទី ២៥ ខែ ឧសភា ឆ្នាំ ២០២២ គណៈកម្មការចម្រុះថ្នាក់ជាតិសម្រាប់បង្ការទប់ស្កាត់ និងស្រាវជ្រាវ បង្ក្រាបបទល្មើសជលផល សហការជាមួយអាជ្ញាធរខេត្តជុំវិញបឹងទន្លេសាប បានបង្ក្រាបចាប់រឹបអូសវត្ថុតាងនៃបទល្មើសនេសាទ រួមមានអួនអូសចំនួន៤០ វង់ ម៉ាញ់ ១៤ វង់ ឧបករណ៍ឆក់ (ត្រជាក់ និងក្ដៅ) ១ ២៧០ គ្រឿង ឈឹបយន្ត ២១ គ្រឿង អួនហ៊ុម ១៦ វង់ របាំងស្បៃមុង និងសាច់អួនសរុប ៧១ ៦៤០ ម៉ែត្រ លបលូស្បៃមុង ៧៣៧ មាត់ បង្គោលសម្រាស់ ៧៣ ២៧៤ ដើម និងរឹបអូសមធ្យោបាយនៃបទល្មើសរួមមានកាណូត ៥៨ គ្រឿង និងម៉ាស៊ីន (ដែលមានកម្លាំងពី ៨-១២ សេស) ៤៣ គ្រឿង។
ក្នុងយុទ្ធនាការនៃការបង្ក្រាបបទល្មើសនេសាទ ក្នុងខេត្តជុំវិញបឹងទន្លេសាបនេះ ខេត្តពោធិ៍សាត់ និងខេត្តសៀមរាប ត្រូវបានគេកត់សម្គាល់ថា មានភាព «សកម្ម» ជាងគេ ដោយក្នុងរយៈពេលដូចគ្នានេះ នៅខេត្តពោធិ៍សាត់ បានបង្ក្រាបចាប់ជនប្រព្រឹត្តបទល្មើសជលផលចំនួន ២១ នាក់ ក្នុងនោះ ២០ នាក់ ត្រូវបានបញ្ជូនទៅតុលាការ ហើយតុលាការសម្រេចឃុំខ្លួនដាក់ពន្ធនាគារ ចំនួន ១៤ នាក់ ដោយចោទប្រកាន់តាមមាត្រាទី៨៩ និង មាត្រា ៩៨ នៃច្បាប់ស្ដីពីជលផល។
ក្រៅពីនេះបានចេញដីកាកោះហៅជនសង្ស័យចំនួន ៦ នាក់ផ្សេងទៀត មកចូលឆ្លើយបំភ្លឺជុំវិញករណីនេសាទខុសច្បាប់ក្នុងតំបន់អភិរក្សត្រីពូជ ដោយប្រើឧបករណ៍ឆក់។
នៅខេត្តសៀមរាបបង្ក្រាបចាប់ជនសង្ស័យបានចំនួន ១៥ នាក់ បញ្ជូនទៅតុលាការ ហើយតុលាការសម្រេចឃុំខ្លួនដាក់ពន្ធនាគារ ចំនួន ៥ នាក់ ដោយចោទប្រកាន់តាមមាត្រាទី៨៩ និង មាត្រា ៩៨ នៃច្បាប់ស្ដីពីជលផល និងចេញដីកាកោះហៅមកឆ្លើយបំភ្លឺជុំវិញការប្រព្រឹត្តិបទល្មើសជលផលចំនួន ១០ នាក់។
យោងតាមមាត្រា ៨៩ និងមាត្រា ៩៨ នៃច្បាប់ស្ដីពីជលផល ជនជាប់ចោទ ក្នុងបទល្មើសជលផលទាំងនោះ អាចនឹងត្រូវប្រឈមការផ្តន្ទាទោសជាប់ពន្ធនាគារ ពី ៣ ឆ្នាំទៅ ៥ ឆ្នាំ ហើយវត្ថុតាងនៃបទល្មើសទាំងអស់ត្រូវរឹបអូសទុកជាសម្បត្តិរដ្ឋ។
ជុំវិញករណីបង្ក្រាបបទល្មើសនេសាទនេះដែរ លោក ភុំ វិមល នាយខណ្ឌរដ្ឋបាលជលផល ខេត្តពោធិ៍សាត់ បានប្រាប់ ភ្នំពេញ ប៉ុស្តិ៍ថា កាលពីថ្ងៃទី ២៥ ខែឧសភា ក្រុមការងារ ខណ្ឌរដ្ឋបាលជលផលខេត្តពោធិ៍សាត់ បានរួមសហការជាមួយកម្លាំងសមត្ថកិច្ចមូលដ្ឋាន ចុះស្រាវជ្រាវទប់ស្កាត់និងបង្ក្រាបបទល្មើសនេសាទ និងការកាប់រុករានទន្ទ្រាន ដីព្រៃលិចទឹក នៅតំបន់បឹងទន្លេសាបនៃភូមិសាស្ត្រ ស្រុកក្រគរ ស្រុកកណ្ដៀង ដោយបានរុះរើ និងរឹបអូសវត្ថុតាងនៃបទល្មើស រួមមានលូស្បៃមុង ២៦ មាត់ របាំងស្បៃមុង ២១ ខ្សែ មានប្រវែងសរុប ១ ៩៥០ ម៉ែត្រ លបប្រើស ១០០ ចំនួន ៩ ខ្សែ របាំងសាច់អួនចំនួន ៣ ខ្សែ មានប្រវែងសរុប ១ ២៥០ ម៉ែត្រ បង្គោលសម្រាស់ចំនួន ១ ០០៥ ដើម និងចាក់លែងកូនត្រីចម្រុះប្រភេទ មួយចំនួនធំ ចូលទៅក្នុងទឹកបឹងទន្លេសាបវិញ ។
លោកបានបញ្ជាក់ថា៖ «រដូវនេះជារដូវត្រីពងកូន ហើយទឹកបឹង ព្រែក ស្ទឹង ទន្លេ ក៏កំពុងចាប់ផ្ដើមជន់ឡើងជាបណ្ដើរៗផងដែរ ដោយសាររដូវនេះ ជារដូវវស្សាមានភ្លៀងធ្លាក់ច្រើន ដូច្នេះកម្លាំងសមត្ថកិច្ចចម្រុះរបស់យើង ចាំបាច់បង្កើនការចុះល្បាត ស្រាវជ្រាវនិងបង្ក្រាបបទល្មើសជាប្រចាំ និងដោយគ្មានការលើកលែងឡើយ ដែលការបង្ក្រាបនេះ គឺធ្វើឡើងក្នុងគោលបំណង ដើម្បី ធ្វើឱ្យប្រសើរឡើងនូវធនធានមច្ឆជាតិ និងជីវចម្រុះក្នុងតំបន់បឹងទន្លេសាបឡើងវិញ សម្រាប់ជាប្រយោជន៍ដល់មនុស្សជាតិគ្រប់ជំនាន់។
ក្នុងអំឡុងនៃការចុះសួរសុខទុក្ខ និងផ្ដល់អំណោយជាគ្រឿងបរិភោគ ឧបភោគដល់កងកម្លាំងអន្តរាគមន៍ថ្នាក់ជាតិ ប្រចាំការនៅទីបញ្ជាការកន្លែងអភិរក្សជលផលកំពង់ភ្លុក នៃបឹងទន្លេសាប ស្រុកប្រាសាទបាគង ខេត្តសៀមរាប កាលពីរសៀលថ្ងៃទី ២៥ ខែឧសភា លោក ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាអនុប្រធានគណៈកម្មការអន្តរក្រសួង បានមានប្រសាសន៍ថា ចាប់តាំងពីពេលដែលប្រមុខរាជរដ្ឋាភិបាល បង្កើតគណៈកម្មការអន្តរក្រសួង ដើម្បីទប់ស្កាត់ និងបង្ក្រាបបទល្មើសនេសាទនៅបឹងទន្លេសាប មានរយៈពេល ១ខែកន្លងមកនេះ ឃើញថា បទល្មើសនេសាទ មានការថយចុះជាលំដាប់ ពោលគឺមានតែ ១១ ករណី និងប្រជានេសាទបានស្ម័គ្រចិត្តប្រគល់ឧបករណ៍ឆក់ចំនួន ៤៩គ្រឿង និងសម្ភារមួយចំនួនទៀតផងដែរ។
ទន្ទឹមនឹងនេះលោកបានណែនាំដល់មន្ត្រីជលផល ត្រូវសហការគ្នាលើកផ្លាកសញ្ញាដាក់នៅតាមទីសាធារណៈ ទីប្រជុំជនដោយរាយឈ្មោះឧបករណ៍នេសាទដែលអាចប្រើប្រាស់បាន និងមិនអាចប្រើប្រាស់បានក្នុងរដូវបិទការនេសាទ ដើម្បីឱ្យប្រជានេសាទបានយល់ដឹងកាន់តែច្បាស់ចៀសវាងការប្រព្រឹត្តបទល្មើសក្នុងរដូវបិទនេសាទនេះ។
លោកបានបញ្ជាក់ថា៖ «ក្នុងរដូវបិទនេសាទរយៈពេល ៤ ខែ ដែលនឹងមកដល់ចាប់ពីថ្ងៃទី ០១ ខែមិថុនា រហូតដល់ដំណាច់ខែកញ្ញា ដែលជារដូវមច្ឆាជាតិពងកូន ការនេសាទគ្រប់ប្រភេទមិនអនុញ្ញាតឱ្យធ្វើការនេសាទឡើយ លើកលែងតែការនេសាទជាលក្ខណៈគ្រួសារ ការប្រើប្រាស់ឧបករណ៍តាមការកំណត់ដូចជា សន្ទូច ទ្រូ សំណាញ់ ឆ្នុក លប សាច់មងមានក្រឡា ១ ហ៊ុនកន្លះឡើងទៅ»៕
