.jpg)
គ្រួសារក្រីក្រ និងងាយរងគ្រោះ ទទួលបានថវិកាអំឡុងពេលប្រយុទ្ធនឹងកូវីដ។ រូបថត NSAF
ភ្នំពេញៈ អ្នករត់ម៉ូតូឌុប លោក ចាន់ សាមឿន អាយុ ៣៩ ឆ្នាំ ជាពលរដ្ឋ ដែលទទួលបានការផ្តល់ប្រាក់ឧបត្ថម្ភពីរាជរដ្ឋាភិបាលក្នុងកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលជំងឺកូវីដ ១៩។ មកដល់ពេលនេះ ថវិកាចំនួន ៦៨៣,៦៤ លានដុល្លារអាមេរិក ត្រូវបានផ្តល់ជូនគ្រួសារក្រីក្រ និងងាយរងគ្រោះ អំឡុងពេលប្រយុទ្ធនឹងជំងឺកូវីដ ១៩។
បុរសរត់ម៉ូតូឌុបរូបនេះបានប្រាប់ ភ្នំពេញ ប៉ុស្តិ៍ នៅថ្ងៃទី ២៦ ខែឧសភា ថា លោកបានទទួលប្រាក់ឧបត្ថម្ភពីរាជរដ្ឋាភិបាលចាប់តាំងពីខែមិថុនា ឆ្នាំ ២០២០ ដែលកម្មវិធីនេះចាប់ផ្តើមពីដំបូងរហូតមកដល់សព្វថ្ងៃនេះ។
លោកប្រាប់ថា៖ «[ខ្ញុំ] ទទួលបានថវិកា ចំនួន ២០ ម៉ឺនរៀល ក្នុង ១ ខែ សម្រាប់ចំណាយក្នុងគ្រួសារដែលមានកូន ៣ នាក់ ក្នុងបន្ទុកផងដែរ។ លុយទាំងនេះវាមិនច្រើនទេ សម្រាប់អ្នកដែលមានជីវភាពល្អ តែសម្រាប់ខ្ញុំ គឺច្រើន ហើយបានជួយសម្រាប់ខ្ញុំចំណាយថ្លៃបន្ទប់ជួលប្រចាំខែផងដែរ»។
ក្នុងអំឡុងពេលនៃការផ្ទុះឡើងនូវការរីករាលដាលមេរោគកូវីដ ១៩ ជាង ២ ឆ្នាំកន្លងមកនេះ លោក ចាន់ សាមឿន និងគ្រួសារដែលរស់នៅក្នុងសង្កាត់ទួលសង្កែទី ១ ខណ្ឌឫស្សីកែវ ជួបការលំបាកច្រើន។ ពួកគេត្រូវបាត់បង់ចំណូលស្ទើរទាំងស្រុង ដែល ១ ថ្ងៃលោករកចំណូលបានពីការរត់ម៉ូតូឌុប ពី ១ ម៉ឺនទៅ ២ ម៉ឺនរៀលប៉ុណ្ណោះ។ លោក ចាន់ សាមឿន និយាយថា៖ «វាជាកម្មវិធីល្អ ដែលរដ្ឋបានជួយដល់ប្រជាជនក្រីក្រពេលមានទុក្ខលំបាក ទោះមិនច្រើន តែវាប្រសើរជាងមិនបានអ្វីទាំងអស់»។
គួររំឭកថា កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលជំងឺកូវីដ ១៩ ត្រូវបានលោកនាយករដ្ឋមន្ត្រី ហ៊ុន សែន ប្រកាសដាក់ឱ្យដំណើរការជាផ្លូវការកាលពីថ្ងៃទី ២៤ ខែមិថុនា ឆ្នាំ ២០២០ ដែលរហូតមកដល់បច្ចុប្បន្នអនុវត្តបានចំនួន ៩ ជុំ មាន ២៣ លើករួចមកហើយ។
ក្រសួងសង្គមកិច្ច អតីតយុទ្ធជន និងយុវនីតិសម្បទានៅថ្ងៃទី ២៤ ខែមិថុនា ឱ្យដឹងថា រាជរដ្ឋាភិបាលបានចំណាយថវិកាជាង ២ ៧៣៤ ប៊ីលានរៀល ឬស្មើនឹង ៦៨៣,៦៤ លានដុល្លារអាមេរិក ចាប់ពីថ្ងៃទី ២៥ ខែមិថុនា ឆ្នាំ ២០២០ រហូតដល់ថ្ងៃទី ២៤ ខែឧសភា ឆ្នាំ ២០២២។
ក្រសួងបន្តថា សម្រាប់ការបើកផ្តល់ប្រាក់ឧបត្ថម្ភជុំទី ៩ លើកទី ២ នឹងចាប់ផ្តើម ពីថ្ងៃទី ២៥ ខែឧសភា រហូតដល់ថ្ងៃទី ២៤ ខែមិថុនា ឆ្នាំ ២០២២ ដែលមានរយៈពេល ៣០ ថ្ងៃ។ គ្រួសារ ដែលនឹងត្រូវទទួលត្រូវទៅបើកប្រាក់នៅតាមបញ្ជរវីងណាមួយ ដោយមិនតម្រូវឱ្យទៅសាលាឃុំ សង្កាត់ សាជាថ្មីទៀតទេ។
ក្រុមប្រឹក្សាជាតិគាំពារសង្គមលើកឡើងថា កម្មវិធីជំនួយសង្គមនេះមិនមែនជាកម្មវិធីមានលក្ខណៈអចិន្រៃ្តយ៍នោះទេ។ នេះជាកម្មវិធីជំនួយសង្គមពិសេសមួយ ដែលរាជរដ្ឋាភិបាលបានសម្រេចបង្កើតបន្ថែម និងដាក់ឱ្យដំណើរការជាផ្លូវការ សំដៅជួយសម្រួលដល់ជីវភាពរបស់ប្រជាជនក្រីក្រ ដែលមានបណ្ណសមធម៌ (ក្រ-១ និងក្រ-២) និងអ្នកទទួលរងផលប៉ះពាល់ ដោយសារជំងឺកូវីដ ១៩ ដោយរួមបញ្ចូលផងដែរ នូវអ្នកបាត់បង់ការងារ ឬអ្នកបាត់បង់ចំណូលត្រូវធ្លាក់ខ្លួនទៅក្នុងភាពទីទាល់ក្រឡើងវិញផងដែរ៕
