ភ្នំពេញៈ គណៈកម្មការបង្ការទប់ស្កាត់ជំងឺកូវីដ ១៩ នៃក្រសួងមហាផ្ទៃនឹងចាប់ផ្តើមចាក់វ៉ាក់សាំងកូវីដ ១៩ ដូសទី ៤ ជូនមន្ត្រីព្រមទាំងក្រុមគ្រួសារ និងអតីតមន្ត្រីនៃក្រសួងនេះ ដែលបានចូលនិវត្តន៍ នៅថ្ងៃទី ៣០ ឧសភា នៅមន្ទីរពេទ្យ ១៦ ឧសភា។
លោក សក់ សេដ្ឋា រដ្ឋលេខាធិការក្រសួងមហាផ្ទៃ ឱ្យដឹងពីថ្ងៃទី ២៦ ឧសភា ថា គណៈកម្មការបង្ការ ទប់ស្កាត់ជំងឺកូវីដនឹងចាក់វ៉ាក់សាំងកូវីដ ១៩ ដូសទី ៤ ជូនមន្ត្រីមានទាំងរដ្ឋលេខាធិការ អនុរដ្ឋលេខាធិការ ទីប្រឹក្សា ជំនួយការ មន្ត្រីនគរបាលជាតិ មន្ត្រីរាជការស៊ីវិល មន្ត្រីពន្ធនាគារ ក្រុមគ្រួសារ និងអតីតមន្ត្រីចូលនិវត្តន៍ផងដែរ។
លោកថា៖ «អ្នកដែលនឹងទទួលដូសទី ៤ នេះ គឺជាអ្នកដែលបានចាក់វ៉ាក់សាំងដូសទី ៣ រួចរាល់ ដោយមានគម្លាតចាប់ពី ៤ ខែឡើង ដែលមិនទាន់បានចាក់វ៉ាក់សាំងដូសទី ៤ នៅឡើយ នៅមន្ទីរពេទ្យ ១៦ ឧសភា ចាប់ពីថ្ងៃទី ៣០ ខែឧសភា តទៅ»។
គួរបញ្ជាក់ថា លោកនាយករដ្ឋមន្ត្រី ហ៊ុន សែន បានប្រកាសឱ្យចាប់ផ្តើមធ្វើយុទ្ធនាការចាក់វ៉ាក់សាំងដូសទី ៤ ជូនមន្ត្រីជួរមុខ អ្នកដែលមានហានិភ័យខ្ពស់ ក្រុមគ្រូពេទ្យជួរមុខ និងប្រជាពលរដ្ឋនៅទូទាំងប្រទេស កាលពីដើមខែមករា ឆ្នាំ ២០២២ ដោយប្រើប្រាស់វ៉ាក់សាំងប្រភេទ Pfizer។
តាមរបាយការណ៍ក្រសួងសុខាភិបាលគិតត្រឹមយប់ថ្ងៃទី ២៥ ឧសភា អ្នកដែលបានចាក់ដូសទី ៤ មានជាង ២,៤ លាននាក់។
ប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស លោកស្រី ឱ វណ្ណឌីន ថ្លែងពីថ្ងៃទី ២៦ ឧសភា តាមរយៈសារសំឡេងស្តីពីវឌ្ឍនភាពនៃយុទ្ធនាការប្រឆាំងនឹងជំងឺកូវីដ ១៩ ក្រោមគំនិតផ្តួចផ្តើមរបស់រាជរដ្ឋាភិបាលថា ប្រមុខរាជរដ្ឋាភិបាលមានការយកចិត្តទុកដាក់ ដោយបានដាក់ចេញនូវយុទ្ធសាស្ត្រសំខាន់ជាច្រើនក្នុងការប្រឆាំងនឹងជំងឺកូវីដ ១៩ រហូតទទួលបានជោគជ័យ។
លោកស្រីថា ក្នុងយុទ្ធសាស្ត្រទាំង ៦ នោះក៏មានយុទ្ធសាស្ត្រចាក់វ៉ាក់សាំងកូវីដ ១៩ ហើយអ្វីដែល ប្រមុខរាជរដ្ឋាភិបាលបានដាក់ចេញក្នុងយុទ្ធសាស្ត្រចាក់វ៉ាក់សាំងនេះមាន ២ សំខាន់ៗ គឺ ទី ១ ការយកប្រជាមានិតចិនជាបង្អែកក្នុងការស្វែងរកវ៉ាក់សាំងជាជំនួយ និងការទិញយកវ៉ាក់សាំងសម្រាប់ចាក់ជូនប្រជាពលរដ្ឋ។
លោកស្រីថ្លែងថា៖ «ចំណុចទី ២ គឺសម្តេចនាយករដ្ឋមន្ត្រីបានដាក់ចេញនូវយុទ្ធសាស្ត្រផ្ការីកក្នុងការចាក់វ៉ាក់សាំងនេះ ដើម្បីឱ្យមានភាពសុំារបស់សហគមន៍ ក៏ដូចជាបុគ្គលតាមតំបន់នីមួយៗឱ្យបានត្រឹមត្រូវ»។ លោកស្រីបន្តថា ថ្វីដ្បិត ស្ថានភាពនៃការឆ្លងវីរុសកូវីដ ១៩ មានភាពល្អប្រសើរឡើង ប៉ុន្តែការការពារ ការប្រុងប្រយ័ត្នត្រូវតែប្រកាន់ខ្ជាប់ដដែល ដើម្បីកុំឱ្យមានការឆ្លងជាថ្មីឡើងវិញ៕