កំពង់ចាមៈ គណៈកម្មការរៀបចំការបោះឆ្នោតខេត្តកំពង់ចាមបានបង្កើតគណៈកម្មការ ដើម្បីធ្វើការស៊ើបអង្កេត ករណីគណបក្សប្រជាជនកម្ពុជា ប្តឹងបេក្ខជនគណបក្សភ្លើងទៀនចំនួន ១៥ នាក់នៅឃុំទាំង ១១ នៃ ស្រុកកងមាស ករណីគណបក្សភ្លើងទៀនផ្តល់ប្រាក់ដល់សកម្មជនរបស់ខ្លួន ក្រោយពីបានធ្វើការផ្សះផ្សាមិនត្រូវរ៉ូវគ្នានៅគណៈកម្មការឃុំ សង្កាត់រៀបចំការបោះឆ្នោត។
លោក ឈីម ចាន់ធឿន ប្រធានលេខាធិការដ្ឋានរៀបចំការបោះឆ្នោតខេត្តកំពង់ចាម ប្រាប់ភ្នំពេញប៉ុស្តិ៍ នៅថ្ងៃទី ២៦ ខែឧសភាថា តាមពាក្យបណ្តឹងដែលបានយកមកដាក់នៅគណៈកម្មការរៀបចំការបោះឆ្នោតខេត្តកំពង់ចាមកាលពីអំឡុងម៉ោង ៥ ល្ងាចថ្ងៃទី ២៥ ខែឧសភា ឆ្នាំ ២០២២ គណបក្សប្រជាជនកម្ពុជាបានប្តឹងបេក្ខជនគណបក្សភ្លើងទៀនចំនួន ១៥ នាក់ ដោយក្នុងម្នាក់ៗទាមទារផាកពិន័យជាប្រាក់ ២០ លានរៀល និងប្តឹងឱ្យផាកពិន័យគណបក្សភ្លើងទៀនចំនួន ៣០ លានរៀល។
លោកបន្តថា គណៈកម្មការរៀបចំការបោះឆ្នោតខេត្តកំពង់ចាមមានរយៈពេល ៣ ថ្ងៃ ក្នុងការដោះស្រាយបណ្តឹងនេះ ដោយក្នុងនោះបានបង្កើតគណៈកម្មការស៊ើបអង្កេត និងដោះស្រាយ ប៉ុន្តែបើគូភាគីទំនាស់មិនពេញចិត្តអាចបន្តប្តឹងទៅគណៈកម្មាធិការជាតិរៀបចំការបោះឆ្នោតទៀតបាន។
លោក មឿន ផា ប្រធានគណបក្សប្រជាជនកម្ពុជាស្រុកកងមាស ប្រាប់ ភ្នំពេញ ប៉ុស្តិ៍ នៅថ្ងៃទី ២៦ ខែឧសភា ថាលោកបានដាក់ពាក្យប្តឹង បន្ទាប់ពីលោក គង់ រ៉ៃយ៉ា ដែលជាបេក្ខជនឈរលេខរៀងទី ១ របស់គណបក្សភ្លើងទៀនបានបង្ហោះនៅលើបណ្តាញសង្គមហ្វេសប៊ុកពីការចែកលុយក្នុងរោងបុណ្យក្នុងអំឡុងពេលយុទ្ធនាការឃោសនាបោះឆ្នោតមានទាំងវីដេអូ និងរូបថត។
លោកបញ្ជាក់ថា បើសិនជាលោក គង់ រ៉ៃយ៉ា នេះ ចែកនៅក្នុងទីស្នាក់ការរបស់គណបក្សភ្លើងទៀន មិនអីនោះទេ ប៉ុន្តែនេះបានចែកនៅក្នុងរោងបុណ្យ ដោយមានពាក់ទាំងអាវរបស់គណបក្សថែមទៀត ដែលនេះបង្ហាញពីចេតនានយោបាយ។
លោកថ្លែងថា៖ «ម្សិលម្ង៉ៃ (ថ្ងៃទី ២៥ ឧសភា) យើងដាក់ពាក្យបណ្តឹង ហើយម្សិលមិញ គេហៅទៅផ្សះផ្សាមុននឹងទៅផ្សះផ្សា ខ្ញុំបានប្រជុំជាមួយមេធាវី និងអ្នកច្បាប់។ គេឱ្យសម្រុះសម្រួលគ្នា យើងអត់មានសម្រុះសម្រួលទេ យើងរកផ្លូវច្បាប់ឱ្យជួយយើង។ ទី១ ឱ្យដកបេក្ខភាព ព្រោះវារំលោភច្បាប់ ទី២ ឱ្យពិន័យជាប្រាក់ តាមច្បាប់ ប្រមាណ ២០ លានរៀល»។
បើតាមលោក មឿន ផា បេក្ខជនរបស់គណបក្សភ្លើងទៀនមានចំនួន ១៨ នាក់ ដែលពាក់ព័ន្ធទៅនឹងការចែកលុយនេះ ប៉ុន្តែគណបក្សប្រជាជនបានប្តឹងតែបេក្ខជនចំនួន ១៥ នាក់ទៅគណៈកម្មការឃុំ សង្កាត់រៀបចំការបោះឆ្នោត ដោយមិនទទួលយកការសម្របសម្រួលនៅថ្នាក់ឃុំសង្កាត់នេះ គណបក្សក៏បន្តប្តឹងទៅថ្នាក់ខេត្តទៀត។
លោកបញ្ជាក់ទៀតថា បើការដោះស្រាយនៅគណៈកម្មការខេត្តរៀបចំការបោះឆ្នោតមិនអាចទទួលយកបានទៀត គណបក្សនឹងបន្តសិក្សាជាមួយមេធាវី និងអ្នកច្បាប់បន្តប្តឹងទៅគណៈកម្មាធិការ ជាតិរៀបចំការបោះឆ្នោតបន្តទៀត។
លោក គង់ រ៉ៃយ៉ា ប្រធាន និងជាបេក្ខជនឃុំប្រាប់ភ្នំពេញប៉ុស្តិ៍នៅថ្ងៃទី ២៦ ខែឧសភាថា លោករួមទាំងបេក្ខជន តំណាងគណបក្សភ្លើងទៀន ទាំង ១១ ឃុំនៃស្រុកកងមាសបានទទួលលិខិតអញ្ជើញពីគណៈកម្មការរៀបចំការបោះឆ្នោតឃុំនីមួយៗ ដើម្បីជួបសាកសួរពីពាក្យបណ្ដឹងមកពីគណបក្សប្រជាជនកម្ពុជានៅថ្ងៃទី ២៦ ខែឧសភា។
លោកបន្តថា ករណីចែកលុយនេះ គឺលោកទទួលបានថវិកា ១ ១០០ ដុល្លារអាមេរិកពីក្រុមការងារគណបក្សភ្លើងទៀន និងសប្បុរសជនមួយចំនួន ដើម្បីចែកជូនដល់បេក្ខជនឈរឈ្មោះរបស់គណបក្សភ្លើងទៀននៅតាមឃុំចំនួន ១១ ឃុំ នៃស្រុកកងមាស។ បើផ្អែកតាមច្បាប់ គ្មានអង្គហេតុណាប្តឹងបានទេ ដោយសារតែថវិកា និងសម្ភារគឺចែកជូនដល់បេក្ខជនរបស់គណបក្សឃុំ មិនមែនចែកជូនទៅអ្នកគាំទ្រឬ អ្នកបោះឆ្នោតនោះទេ។
លោកបញ្ជាក់ថា៖ «ច្បាប់គ្មានហាមឃាត់ មិនឱ្យចែកនៅទីសាធារណៈទេ។ យើងនៅតែមានទំនុកចិត្ត និងជឿជាក់ថា សកម្មភាពរបស់យើងធ្វើមិនខុសច្បាប់ទេ។ យើងសំណូមពរដល់គណៈកម្មការរៀបចំការបោះឆ្នោតខេត្តកំពង់ចាមឱ្យសម្របសម្រួលបញ្ចប់សំណុំរឿង ដើម្បីឱ្យយើងមានឱកាសឃោសនាបោះឆ្នោតទៀត ដោយសារតែមួយរយៈនេះ ក្រុមសកម្មជនគណបក្សភ្លើងទៀនគ្មានឱកាសឃោសនាទេ»។
លោក សោម សូរីដា អ្នកនាំពាក្យ គជប ប្រាប់ភ្នំពេញប៉ុស្តិ៍នៅថ្ងៃទី ២៦ ខែឧសភាថា ការផ្តល់ ឬក៏ចែកប្រាក់ទៅឱ្យគណបក្សឃុំ ដែលចំណុះឱ្យ ស្រុកកងមាស បើធ្វើការពិនិត្យបទប្បញ្ញត្តិនៅក្នុងច្បាប់ គឺច្បាប់ហាមចែកអំណោយដល់អ្នកបោះឆ្នោត នៅក្នុងគោលបំណងទិញទឹកចិត្តរបស់អ្នកបោះឆ្នោតតែប៉ុណ្ណោះ។
លោកថ្លែងថា៖ «ប៉ុន្តែ ករណីនេះ ជាករណីដែលគណបក្សផ្តល់ថវិកាដល់គណបក្សថ្នាក់ក្រោម ដែលពុំមានចែងនៅក្នុងច្បាប់នោះទេ អ៊ីចឹងទេ រាល់ការផ្តល់អំណោយមិនត្រូវភ្ជាប់ការទិញទឹកចិត្តរបស់អ្នកបោះឆ្នោត»៕
វីដេអូ៖