.jpg)
លោកនាយករដ្ឋមន្ត្រី ហ៊ុន សែន។ រូបថត SPM
លោកនាយករដ្ឋមន្ត្រី ហ៊ុន សែន បានបញ្ជាឱ្យក្រសួងរៀបចំដែនដី នគរូបនីយកម្ម និង សំណង់ រួមនឹងអភិបាលខេត្ត និងអភិបាលស្រុក-ឃុំ ត្រូវពិនិត្យលើភូមិកររបស់ប្រជាពលរដ្ឋដែលបង្កើតឡើងនៅក្នុងតំបន់ ៣ ឬតំបន់ ២ នៃតំបន់បឹងទន្លេសាបដែលមានតាំងពីយូរយារមកហើយនោះ ដោយមិនត្រូវបណ្តេញចេញ ឬរើចេញនោះឡើយ។
លោកបានថ្លែងដូចនេះនាព្រឹកថ្ងៃទី ២៧ ខែឧសភានេះស្តីពីបឹងទន្លេសាប ដោយលោកបានលើកឡើងថា រដ្ឋមន្ត្រីក្រសួងរៀបចំដែនដី នគរូបនីយកម្ម និង សំណង់ រួមនឹងអភិបាលខេត្តដែលពាក់ព័ន្ធនៅក្នុងតំបន់ទាំងនោះត្រូវមានការទទួលខុសត្រូវក្នុងការរក្សាទុកប្រជាពលរដ្ឋ ភូមិកររបស់ពួកគាត់នៅក្នុងតំបន់នោះដដែល។
បឹងទន្លេសាបត្រូវបានគ្របដណ្តប់ដោយ ៦ ខេត្ត រួមមាន ខេត្តកំពង់ឆ្នាំង កំពង់ធំ សៀមរាប បាត់ដំបង ពោធិ៍សាត់ និងខេត្តបន្ទាយមានជ័យ។
តំបន់បឹងទន្លេសាបត្រូវបានបែងចែកជា ៣ តំបន់ ដែលតំបន់ទី ១ គឺជាតំបន់រស់នៅរបស់ប្រជាជនដែលអាចចុះបញ្ជីដីធ្លី និងផ្តល់កម្មសិទ្ធិជូនប្រជាពលរដ្ឋ។ តំបន់ទី ២ គឺជាតំបន់ដែលនៅចន្លោះរវាងតំបន់ ១ និងតំបន់ ៣ អនុញ្ញាតឱ្យប្រជាពលរដ្ឋអាចអាស្រ័យផលលើទីតាំងដែលធ្លាប់មានកន្លងមក និងតំបន់ ៣ ជាតំបន់ព្រៃលិចទឹក និងជាតំបន់ហាមឃាត់ ការពារដាច់ខាត ប៉ុន្តែក៏នៅតែមានការរំលោភបំពាន។
លោកបានមានប្រសាសន៍ថា៖ «ម្សិលមិញនេះ ខ្ញុំបានដាក់ចេញនូវបទបញ្ជាឱ្យឯកឧត្តម ជា សុផារ៉ា ធ្វើការពិនិត្យជាបន្តទៀតត្រូវពិនិត្យ ពិចារណាដោយផ្អែកទៅលើស្ថានភាពជាក់ស្តែងនៃភូមិសាស្ត្រនីមួយៗក្នុងការកាត់ឆ្វៀលចេញពីតំបន់ ២ ឬតំបន់ ៣ សម្រាប់ទីតាំងដែលមានប្រជាជនរស់នៅជាក់ស្តែងកើតជាភូមិករ ជាឃុំ ជាស្រុក មានវត្តអារាម ហើយភូមិខ្លះបានកើតមានជាយូរយារណាស់មកហើយដែរ»។
លោកថា ប្រជាពលរដ្ឋខ្លះបានមករស់នៅក្នុងតំបន់ ៣ ឬតំបន់ ២ តាំងពីមុនពេលយើងកំណត់ក្របខ័ណ្ឌតំបន់ ១ តំបន់ ២ និងតំបន់ ៣ ទៅទៀត។ ដែលបានរស់នៅក្នុងតំបន់ ៣ ជាយូរយារណាស់មកហើយ។
លោក ហ៊ុន សែន បានថ្លែងថា៖ «ខ្ញុំសុំបញ្ជាក់ទៅខេត្តទាំង ៦ នៅជុំវិញបឹងទន្លេសាបត្រូវមានការទទួលខុសត្រូវចំពោះប្រជាជនខ្លួនឯង ទាំងថ្នាក់ខេត្ត ស្រុក ឃុំ ដោយត្រូវចៀសវាងនូវការឆ្វៀលចេញនៅភូមិកររបស់ប្រជាពលរដ្ឋនៅក្នុងតំបន់ ២ ក្តី ឬតំបន់ ៣ ក្តីដែលពួកគាត់បានបង្កើតជាយូរយារណាស់មកហើយនោះ»។
ប្រមុខរាជរដ្ឋាភិបាលកម្ពុជាក៏បានបញ្ជាឱ្យមានការកែសម្រួលនូវព្រំប្រទល់តំបន់ ២ និងតំបន់ ៣ ឡើងវិញ ដោយផ្អែកលើការជាក់ស្តែង ជាពិសេសផ្ទៃដីដែលចាំបាច់ និងសមហេតុសមផលសម្រាប់ការពារព្រៃលិចទឹកនៃបឹងទន្លេសាបក្នុងស្ថានភាពថ្មីនៃផ្ទៃបឹងដែលមានការគោករាក់ ហើយដែលប្រជាជនធ្លាប់បង្កបង្កើនផល។
លោកនាយករដ្ឋមន្ត្រី ហ៊ុន សែន បានថ្លែងថា៖ «វាមិនមានការពិបាកទេ យើងចុះហត្ថលេខាបាន យើងក៏អាចលុបវាបានដើម្បីកែសម្រួលព្រំប្រទល់ និងអំពាវនាវសុំកុំឱ្យប្រជាជនកាត់បន្ថែមតែប៉ុណ្ណឹង ប៉ុន្តែសម្រាប់ប្រជាជនដែលបានកំពុងអាស្រ័យផលនៅទីនោះ ដែលមិនមែនជាពួកថៅកែ គឺចាំបាច់ត្រូវតែមានការកែសម្រួលបទដ្ឋានគតិយុត្ត និងកែសម្រួលបង្គោលតំបន់ដោយបំព្រួញបង្គោលចេញពីតំបន់ ៣ ហើយទម្លាក់មកតំបន់ ២ ឬកែតំបន់ ២ មកជាតំបន់ ១»។
ទាក់ទងនឹងការកែសម្រួលតំបន់បឹងទន្លេសាបនេះលោកនាយករដ្ឋមន្ត្រីបានបញ្ជាឱ្យរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ត្រូវដឹកនាំសហការជាមួយនឹងក្រសួងពាក់ព័ន្ធមួយចំនួនទៀត ដូចជាក្រសួងធនធានទឹក និងឧតុនិយម, អាជ្ញាធរបឹងទន្លេសាប, ក្រសួងកសិកម្ម រុក្ខាប្រមាញ់ និងនេសាទរួមនឹងបណ្តាខេត្តដែលនៅជុំវិញបឹងទន្លេសាបផងដែរ៕
