ភ្នំពេញៈ ក្រសួងសុខាភិបាលស្នើសុំក្រុមប្រឹក្សាធុរកិច្ចអាស៊ាន-អឺរ៉ុបពង្រីកកិច្ចសហប្រតិបត្តិការរវាងភាគីទាំង ២ ឱ្យកាន់តែទូលំទូលាយថែមទៀត បន្ទាប់ពីមានផលិតផលសុខភាពមកពីបណ្តាប្រទេសអឺរ៉ុបចំនួនប្រមាណជាង ៤ ០០០ មុខ បានចុះបញ្ជិកានៅក្រសួងសុខាភិបាល និងបានចរាចរនៅលើទីផ្សារកម្ពុជា។
ការស្នើសុំនេះធ្វើឡើងក្នុងជំនួបរវាងរដ្ឋមន្ត្រីក្រសួងសុខាភិបាល លោក ម៉ម ប៊ុនហេង និងលោក Chris Ilumphrey នាយកប្រតិបត្តិក្រុមប្រឹក្សាធុរកិច្ចអាស៊ាន-អឺរ៉ុប នាថ្ងៃទី ២៦ ខែឧសភា នៅទីស្តីការក្រសួងសុខាភិបាល។
ក្រសួងសុខាភិបាលបញ្ជាក់ក្នុងសេចក្តីប្រកាសព័ត៌មានចេញផ្សាយនាថ្ងៃទី ២៧ ខែឧសភា ថា៖ «ឯកឧត្តមរដ្ឋមន្ត្រី [លោក ម៉ម ប៊ុនហេង] បានស្នើសុំពង្រីកកិច្ចសហប្រតិបត្តិការរវាងក្រសួងសុខាភិបាល និងក្រុមប្រឹក្សាធុរកិច្ចអាស៊ាន-អឺរ៉ុប មិនត្រឹមតែអាស៊ានទេ តែក្នុងក្របខ័ណ្ឌទ្វេភាគីផងដែរ ជាពិសេសលើការអភិវឌ្ឍធនធានមនុស្ស»។
បើតាមប្រភពដដែល លោក Ilumphrey បានកោតសរសើរដល់រាជរដ្ឋាភិបាលកម្ពុជា ដែលបានគ្រប់គ្រងការរីករាលដាលនៃជំងឺកូវីដ ១៩ និងអាចឱ្យបើកដំណើរការប្រទេសបានឡើងវិញ និងអរគុណដល់រាជរដ្ឋាភិបាល ដែលបានចាក់វ៉ាក់សាំងកូវីដ ១៩ ឱ្យជនបរទេសទាំងអស់ស្នាក់នៅកម្ពុជា ដោយឥតគិតថ្លៃ រួមទាំងអ្នកវិនិយោគ និង ធុរៈជនអឺរ៉ុប ផងដែរ។
លោកថែមទាំងបានអរគុណដល់ក្រសួងសុខាភិបាលផងដែរ ដែលតែងតែសហការគាំទ្រដល់ធុរកិច្ចរបស់អឺរ៉ុប ជាពិសេសក្នុងការចុះបញ្ជិកាផលិតផលសុខភាព និងបានស្នើសុំឱ្យក្រសួងសុខាភិបាលកម្ពុជាបន្តគាំទ្រ និងពង្រីកកិច្ចសហប្រតិបត្តិការឱ្យកាន់តែទូលំទូលាយថែមទៀតលើវិស័យសុខាភិបាល។
លោក ម៉ម ប៊ុនហេង បានកោតសរសើរចំពោះធុរៈកិច្ចអាស៊ាន-អឺរ៉ុប ជាពិសេសមូលនិធិអាស៊ី-អឺរ៉ុប ដែលបានសហការគាំទ្រក្រសួងសុខាភិបាលក្នុងការរៀបចំវេទិកាអាស៊ី-អឺរ៉ុប ស្តីពីការប្រយុទ្ធប្រឆាំងនឹងឱសថក្លែងក្លាយ និងឱសថអន់គុណភាពនៅកម្ពុជា ទោះបីក្នុងកាលៈទេសៈដែលពិភពលោក និងកម្ពុជាប្រឈមនឹងការរីករាលដាលនៃជំងឺកូវីដ ១៩ ក៏ដោយ។
លោកបញ្ជាក់ថា រហូតមកដល់ពេលនេះមានផលិតផលសុខភាពមកពីបណ្តាប្រទេសអឺរ៉ុបចំនួនប្រមាណជាង ៤ ០០០ មុខ បានចុះបញ្ជិកានៅក្រសួងសុខាភិបាល និងបានចរាចរនៅលើទីផ្សារកម្ពុជា៕