.jpg)
កំពតៈ រដ្ឋបាលខេត្តកំពត បានប្រកាសជូនដំណឹងស្តីពីយុទ្ធនាការចាក់វ៉ាក់សាំងការពារជំងឺកូវីដ ១៩ ដូសទី៥ ជូនដល់មន្ត្រីជួរមុខ និងក្រុមគោលដៅអាទិភាព ចាប់ពីថ្ងៃទី ៩ ខែមិថុនា ខាងមុខនេះទៅ។
សេចក្តីជូនដំណឹងរបស់រដ្ឋបាលខេត្តកំពត ចុះថ្ងៃទី ២៥ ខែឧសភានេះ បានជូនដំណឹងដល់មន្ត្រីជួរមុខ និងក្រុមគោលដៅអាទិភាព ដែលមានអាយុចាប់ពី ១២ ឆ្នាំឡើង ដែលបានចាក់វ៉ាក់សាំងកូវីដ ១៩ ដូសទី៤ រួច ហើយមានគម្លាតយ៉ាងតិច ៣ ខែឡើងឱ្យដឹងថា ការចាក់វ៉ាក់សាំងការពារជំងឺកូវីដ ១៩ ដូសទី៥ នេះនឹងចាប់ផ្តើមចាក់ជូនចាប់ពីថ្ងៃទី ០៩ ខែ មិថុនា ឆ្នាំ ២០២២ នេះតទៅ។
ការចាក់នេះ គឺចាប់ពី ម៉ោង ៨:០០ នាទី ដល់ម៉ោង ១៧:០០ នាទី ដោយឈប់សម្រាកអាហារថ្ងៃត្រង់ម៉ោង ១២:០០ ដល់ម៉ោង ១៤:០០ នាទីរសៀល ហើយពុំមានការឈប់សម្រាកថ្ងៃសៅរ៍-អាទិត្យ និងថ្ងៃបុណ្យឡើយ។
ចំពោះមន្ត្រីសុខាភិបាលជួរមុខ ទាំងរដ្ឋ និងឯកជន មន្ត្រីរាជការស៊ីវិល មន្ត្រីជាប់កិច្ចសន្យា អាជ្ញាធរមូលដ្ឋាន សមត្ថកិច្ច និងមនុស្សដែលមានអាយុចាប់ពី ៦០ ឆ្នាំឡើង ដែលបានចាក់វ៉ាក់សាំងកូវីដ ១៩ ដូសទី៤ រួច ហើយមានគម្លាតយ៉ាងតិច ៣ ខែឡើង សូមអញ្ជើញទៅចាក់វ៉ាក់សាំងកូវីដ ១៩ ដូសទី៥ ចាប់ពីថ្ងៃទី ០៩ ខែមិថុនានេះ។
ដោយឡែក ចំពោះក្រុមមនុស្សមានប្រព័ន្ធការពារខ្សោយ ដែលមានអាយុចាប់ពី ១២ ឆ្នាំឡើង នឹងចាប់ផ្តើមចាក់វ៉ាក់សាំងកូវីដ ១៩ ដូសទី៥ ចាប់ពីថ្ងៃទី ២០ ខែមិថុនាផងដែរ។
អ្នកដែលទៅចាក់វ៉ាក់សាំង ត្រូវភ្ជាប់ជាមួយនូវបណ្ណ័ចាក់វ៉ាក់សាំងកូវីដ ១៩ អត្តសញ្ញាណបណ្ណសញ្ញាតិខ្មែរ បណ្ណសម្គាល់ខ្លួនមន្ត្រីរាជការ បណ្ណសម្គាល់ខ្លួនមន្ត្រីជាប់កិច្ចសន្យា ឬឯកសារដែលបានប្រើប្រាស់ក្នុងការចុះឈ្មោះ កាលពីចាក់ដូសទី១ ដើម្បីឱ្យក្រុមគ្រូពេទ្យបន្តបញ្ចូលទិន្នន័យក្នុងប្រព័ន្ធគ្រប់គ្រងការចាក់វ៉ាក់សាំង។
រដ្ឋបាលខេត្តកំពត សង្ឃឹម និងជឿជាក់ថា លោក-លោកស្រី ក្រុមគ្រូពេទ្យជួរមុខទាំងរដ្ឋ និងឯកជន មន្ត្រីរាជការ មន្ត្រីជាប់កិច្ចសន្យា គ្រូបង្រៀន កងកម្លាំងប្រដាប់អាវុធ សមត្ថកិច្ច អាជ្ញាធរមូលដ្ឋាន ក្នុងខេត្តកំពតទាំងអស់ នឹងមកទទួលចាក់វ៉ាក់សាំងឱ្យបានគ្រប់ៗគ្នា ដើម្បីការពារសុខភាព រួមចំណែកទប់ស្កាត់ការឆ្លងរាលដាលនៃជំងឺកូវីដ ១៩ ក្នុងសហគមន៍ជាពិសេសប្រភេទវីរុសបំប្លែងខ្លួនថ្មី៕
