ភ្នំពេញៈ រដ្ឋលេខាធិការក្រសួងសាធារណការ និងដឹកជញ្ជូន លោកស្រី ឥម នីថារ៉ា តំណាងលោកទេសរដ្ឋមន្រ្តី ស៊ុន ចាន់ថុល កាលពីថ្ងៃទី ២៦ ខែឧសភានេះ បានផ្តល់អនុសាសន៍ណែនាំដល់និស្សិតជយលាភីអាហារូបករណ៍រដ្ឋាភិបាលអូស្ត្រាលីឆ្នាំ ២០២២ ក្រុមទី២ ចំនួន ២២ រូប មុនពេលដែលពួកគេចេញដំណើរទៅបន្តការសិក្សារបស់ខ្លួនក្នុងខែកក្កដា ខាងមុខនេះ។
យោងតាមក្រសួងសាធារណការបានឱ្យដឹងថា កម្មវិធីអាហារូបករណ៍នេះមានគោលបំណងចូលរួមអភិវឌ្ឍធនធានមនុស្សនៅកម្ពុជាតាមរយៈការផ្ដល់អាហារូបករណ៍សម្រាប់ការបណ្ដុះបណ្ដាល កម្រិតថ្នាក់ក្រោយឧត្តមសិក្សា នៅប្រទេសអូស្ត្រាលី លើគ្រប់វិស័យ ជាពិសេសវិស័យសំខាន់ៗមួយចំនួន។ ក្នុងនោះរួមមាន វិស័យសេដ្ឋកិច្ច ពាណិជ្ជកម្ម ការគ្រប់គ្រងដីធ្លី សេវាសាធារណៈ បច្ចេកវិទ្យា អប់រំ និងវិស័យកសិកម្ម ដើម្បីចូលរួមចំណែកក្នុងការអភិវឌ្ឍប្រទេសកម្ពុជា ប្រកបដោយបរិយាប័ន្ន និងចីរភាព។
ក្រោយបញ្ចប់ការសិក្សា និស្សិតជយលាភីទាំងអស់នឹងត្រូវត្រឡប់មកចូលរួមអភិវឌ្ឍប្រទេសកម្ពុជា វិញស្របតាមជំនាញ និងសក្តានុពលរៀងៗខ្លួន។ ក្នុងកិច្ចសំណេះសំណាលនេះដែរ ក្រុមនិស្សិតអាហារូបករណ៍ បានសួរសំណួរមួយចំនួនទាក់ទងនឹងវិស័យសាធារណការ វិស័យភ័ស្តុភារកម្ម វិទ្យាស្ថានតេជោ សែន សាធារណការ និងដឹកជញ្ជូន ប្រព័ន្ធដឹកជញ្ជូនផ្លូវគោក ផ្លូវទឹក ការងារកំពង់ផែ និងការងារស្លាកលេខពិសេសជាដើម។
និស្សិតជយលាភីអាហារូបករណ៍រដ្ឋាភិបាលអូស្ត្រាលីឆ្នាំ ២០២២ ក្រុមទី២ ទាំង ២២ រូបនោះ មានស្ត្រី ១៣ រូប ដែលមានសមាសភាពជាមន្ត្រីរាជការ បុគ្គលិកក្រុមហ៊ុនឯកជន និងមន្ត្រីអង្គការមិនមែនរដ្ឋាភិបាល។
ពួកគេនឹងចេញដំណើរទៅបន្តការសិក្សាថ្នាក់បណ្ឌិតចំនួន ១ រូប និងបរិញ្ញាបត្រជាន់ខ្ពស់នៅតាមសាកលវិទ្យាល័យផ្សេងៗនៅប្រទេសអូស្ត្រាលី នៅអំឡុងខែកក្កដា ឆ្នាំ ២០២២ ខាងមុខនេះ៕