.jpg)
រូបភាព KOICA 캄보디아사무소
ភ្នំពេញៈ កយកា (KOICA) និងវិទ្យាស្ថានជាតិការទូត និងទំនាក់ទំនងអន្តរជាតិបានធ្វើការពិភាក្សាអំពីផែនការសម្រាប់កម្មវិធីបណ្តុះបណ្តាលស្តីពី កម្មវិធីអភិវឌ្ឍន៍សមត្ថភាពសម្រាប់គ្រូបង្គោលរបស់វិទ្យាស្ថានជាតិការទូត និងទំនាក់ទំនងអន្តរជាតិសម្រាប់រយៈពេល ៣ ឆ្នាំចាប់ពីឆ្នាំ ២០២២ ដល់ឆ្នាំ ២០២៤។
កិច្ចពិភាក្សានេះត្រូវបានធ្វើឡើងនាថ្ងៃទី ២៦ ខែឧសភានេះរវាង កយកា និងក្រោមកិច្ចសហការជាមួយវិទ្យាស្ថានស្រាវជ្រាវអាស៊ីនៃសាកលវិទ្យាល័យកូរ៉េ និង វិទ្យាស្ថានជាតិការទូត និងទំនាក់ទំនងអន្តរជាតិ (NIDIR) តាមរយៈប្រព័ន្ធវីដេអូពីចម្ងាយ (Zoom Meeting)។
ភាគី កយកា ដឹកនាំដោយ លោក នោ ហ្យន់ជូន ប្រធានតំណាងទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ប្រចាំប្រទេសកម្ពុជា។ ចំណែកភាគីវិទ្យាស្ថានជាតិការទូត និងទំនាក់ទំនងអន្តរជាតិ ដឹកនាំដោយលោក ទាន សំណាង ប្រធានវិទ្យាស្ថានជាតិការទូត និងទំនាក់ទំនងអន្តរជាតិ។
សេចក្តីប្រកាសព័ត៌មានរបស់ កយការ បានបញ្ជាក់ថា៖ «នៅក្នុងជំនួបនោះ ភាគីទាំង ២ បានពិភាក្សាអំពីផែនការសម្រាប់កម្មវិធីបណ្តុះបណ្តាលស្តីពីកម្មវិធីអភិវឌ្ឍន៍សមត្ថភាពសម្រាប់គ្រូបង្គោលរបស់វិទ្យាស្ថានជាតិការទូត និងទំនាក់ទំនងអន្តរជាតិ សម្រាប់រយៈពេល ៣ ឆ្នាំ ចាប់ពីឆ្នាំ ២០២២ ដល់ឆ្នាំ ២០២៤»។
វិទ្យាស្ថានស្រាវជ្រាវអាស៊ីនៃសាកលវិទ្យាល័យកូរ៉េបានបង្ហាញផែនការសម្រាប់វគ្គបណ្ដុះបណ្ដាល និងបានស្នើឱ្យរៀបចំវគ្គបណ្តុះបណ្តាលលម្អិតមួយដោយផ្លាស់ប្តូរយោបល់ពីគ្រប់ភាគី។
ក្នុងឱកាសនោះ លោក នោ ហ្យន់ជូន បានមានប្រសាសន៍ថា ចាប់តាំងពីមានការរីករាលដាលនៃជំងឺកូវីដ ១៩ វគ្គបណ្តុះបណ្តាលទាំងអស់របស់ កយកា ត្រូវបានប្តូរទៅវគ្គបណ្តុះបណ្តាលតាមរយៈប្រព័ន្ធវីដេអូពីចម្ងាយ (អនឡាញ) ហើយទោះបីជាការគំរាមកំហែងពីជំងឺកូវីដ ១៩ បានថយចុះក៏ដោយ ក៏ កយកា មានគម្រោងរៀបចំវគ្គបណ្តុះបណ្តាលទាំងអស់តាមរយៈប្រព័ន្ធវីដេអូពីចម្ងាយ (អនឡាញ) រួមទាំងឆ្នាំនេះផងដែរ”។
លោកបានគូសបញ្ជាក់យ៉ាងដូច្នេះថា៖ «ជាសំណាងល្អ បន្ទាប់ពីបានពិគ្រោះយោបល់ជាមួយទីស្នាក់ការកណ្តាល កយកា យើងបានធ្វើការផ្លាស់ប្តូរផែនការរបស់យើង និងចាប់ផ្តើមវគ្គសិក្សាថ្មី ដោយការសិក្សាដោយផ្ទាល់វិញ ដែលជាវគ្គបណ្តុះបណ្តាលផ្អែកលើការអញ្ជើញទៅសិក្សានៅសាធារណរដ្ឋកូរ៉េដោយផ្ទាល់»៕
