ភ្នំពេញៈ ក្នុងរយៈពេល ៦ ថ្ងៃនៃយុទ្ធនាការឃោសនាបោះឆ្នោតឃុំ សង្កាត់ មានពាក្យបណ្ដឹងចំនួន ៣៣ ពាក់ព័ន្ធនឹងការឃោសនានេះត្រូវបានដាក់ចូលទៅកាន់គណៈកម្មការឃុំ សង្កាត់ រៀបចំការបោះឆ្នោត (គឃ.សប)។
លោក ហង្ស ពុទ្ធា សមាជិកគណៈកម្មាធិការជាតិរៀបចំការបោះឆ្នោត (គជប) បានថ្លែងក្នុងកិច្ចប្រជុំជាមួយភាគីពាក់ព័ន្ធនាថ្ងៃទី ២៧ ខែឧសភា ថា៖ «ចំពោះករណីបណ្តឹងអំពីការឃោសនាបោះឆ្នោត គិតត្រឹមថ្ងៃទី ២៦ ខែឧសភា ឆ្នាំ ២០២២ នេះមានពាក្យបណ្ដឹងចំនួន ៣៣ ត្រូវបានដាក់ចូលទៅកាន់ គឃ.សប»។
លោកបន្តថា ក្នុងចំណោមពាក្យបណ្ដឹងទាំងនោះមាន ៧ បណ្ដឹងត្រូវបានផ្សះផ្សាជាសះ គឃ.សប បានចេញលិខិតជូនដំណឹងចំនួន ១ បណ្តឹង ដើមបណ្តឹងបានដកពាក្យបណ្តឹងវិញចំនួន ១ បណ្តឹង ហើយបណ្តឹងចំនួន ១៨ កំពុងដោះស្រាយ។
លោក ហង្ស ពុទ្ធា បន្ថែមថាមានចំនួន ៦ បណ្តឹងផ្សះផ្សាមិនជាសះ ដែលក្នុងនោះមាន ៤ បណ្តឹងបានដាក់បន្តពី គឃ.សប និងកំពុងដោះស្រាយនៅគណៈកម្មការរាជធានី ខេត្តរៀបចំការបោះឆ្នោត (គធ.ខប) ដោយឡែក ១ បណ្តឹងទៀតបានដាក់បន្តពី គឃ.សប ហើយ គធ.ខប បានចេញលិខិតជូនដំណឹងរួចហើយ៕