លោកនាយករដ្ឋមន្ត្រី ហ៊ុន សែន បានបញ្ជាក់ថា កម្ពុជាមិនអាចដាក់ខ្លួនទៅក្នុងអន្ទាក់បំណុលរបស់អ្នកណាទាំងអស់ ហើយចិនក៏មិនមែនជាប្រទេសតែមួយគត់ដែលកម្ពុជាខ្ចីប្រាក់នោះដែរ ដែលនឹងធ្វើឱ្យកម្ពុជាក្លាយអន្ទាក់បំណុលរបស់សាធារណរដ្ឋប្រជាមានិតចិននោះទេ ហើយចិនក៏គ្មានបំណងដាក់កម្ពុជាជាអន្ទាក់បំណុលរបស់ខ្លួនផងដែរ។
លោក ហ៊ុន សែន បានថ្លែងដូចនេះក្នុងការឆ្លើយតបនឹងសំណួរក្នុងសន្និសីទអន្តរជាតិលើកទី ២៧ ស្តីពីអនាគតរបស់អាស៊ីនាថ្ងៃសុក្រនេះតាមប្រព័ន្ធអនឡាញ ដែលរៀបចំឡើងនៅទីក្រុងតូក្យូ ប្រទេសជប៉ុនរយៈពេល ២ ថ្ងៃនៅថ្ងៃទី ២៦-២៧ ខែឧសភា ឆ្នាំ ២០២២។
លោកមានប្រសាសន៍ថា៖ «អ្វីដែលយើងខ្ញុំខ្ចី យើងមានការប្រុងប្រយ័ត្នខ្លួនឯង យើងខ្ញុំមានច្បាប់ទាក់ទងនឹងការខ្ចីបុល ហើយបើគិតមកដល់ពេលនេះ ពិដានសម្រាប់ការខ្ចីរបស់យើងដែលគេអនុញ្ញាតឱ្យខ្ចីរហូតដល់ ៤០% នៃផលិតផលក្នុងស្រុក យើងខ្ញុំទើបនឹងខ្ចី ២៣% ប៉ុណ្ណោះ ដែលនៅសេសសល់ទំហំសម្រាប់ការខ្ចីបន្តទៀត»។
ប្រមុខរាជរដ្ឋាភិបាលកម្ពុជាក៏បានបញ្ជាក់ដែរថា កម្ពុជាមិនមែនចេះតែខ្ចីដោយមិនបានគិតគូរអំពីស្ថានភាពបំណុលដែលយើងអាចដោះស្រាយបាននោះទេ។ ដូច្នេះ លោកនាយករដ្ឋមន្ត្រី ហ៊ុន សែន មិនយល់ថាសាធារណរដ្ឋប្រជាមានិតចិននឹងដាក់អន្ទាក់កម្ពុជាតាមរយៈការផ្តល់ហិរញ្ញប្បទានឱ្យកម្ពុជានោះទេ ហើយលោកក៏មិនគិតដែរថា ជប៉ុនដាក់អន្ទាក់កម្ពុជាលើបញ្ហាការខ្ចីបុលពីជប៉ុនសម្រាប់ការអភិវឌ្ឍវិស័យហេដ្ឋារចនាសម្ព័ន្ធនេះដែរ។
លោក ហ៊ុន សែន មានប្រសាសន៍ថា៖ «ខ្ញុំសុំបញ្ជាក់ថា កម្ពុជានឹងមិនដាក់ខ្លួនទៅជាកូនបំណុលរបស់អ្នកណាមួយនោះទេ ព្រោះយើងមិនអាចខ្ចីតែពីចិនតែមួយទេ គឺយើងអាចខ្ចីពីជប៉ុន កូរ៉េ ធនាគារអភិវឌ្ឍន៍អាស៊ី ធនាគារពិភពលោក និងខ្ចីពីធនាគារអឺរ៉ុបផងដែរ»។
ជាមួយគ្នានេះដែរ លោកក៏បានបញ្ជាក់ផងដែរថា វាច្បាស់ណាស់ ចិនបានផ្តល់ជាមូលដ្ឋានសម្រាប់កម្ពុជា ដែលនេះជាបញ្ហាពិតប្រាកដ ហើយលោក ហ៊ុន សែន ក៏បានលើកឡើងផងដែរកាលពីឆ្នាំមុនថា បើលោកមិនពឹងចិនតើឱ្យលោកពឹងអ្នកណា?
លោកបានថ្លែងថា៖ «នេះជាសម្ដីពិតរបស់ខ្ញុំ ហើយខ្ញុំសុំបញ្ជាក់យ៉ាងដាច់ណាត់ថា យើងខ្ញុំមិនអាចក្លាយទៅជាកូនបំណុលតែមួយគត់ហើយជាអន្ទាក់បំណុលដែលចិនត្រូវដាក់ ហើយចិនក៏គ្មានបំណងដាក់កម្ពុជាជាអន្ទាក់បំណុលរបស់ចិននោះដែរ»៕
វីដេអូ៖