លោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការ កងទ័ពជើងគោក និងជាអនុប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ បានថ្លែងថា អាជីពជាបុគ្គលិកសុខាភិបាលជាអាជីពតំណាងឱ្យព្រះអាទិទេពក្នុងការជួយសង្គ្រោះជីវិតមនុស្សឱ្យរួចផុតពីជំងឺដង្កាត់ និងគ្រោះភ័យផ្នែកសុខភាពនានា។
លោកបានលើកឡើងបែបនេះ ក្នុងពិធីសំណេះសំណាលជាមួយថ្នាក់ដឹកនាំ មន្ត្រីរាជការ បុគ្គលិកសុខាភិបាលរបស់មន្ទីរសុខាភិបាលនៃរដ្ឋបាលរាជធានីភ្នំពេញនាថ្ងៃទី ២៧ ខែមករា ឆ្នាំ ២០២២។
លោកក៏បានសាទរចំពោះភាពជោគជ័យនៃការគ្រប់គ្រងការរីករាលដាលនៃជំងឺកូវីដ ១៩ ដែលជាសមិទ្ធផលសម្រេចបានរួមគ្នាទាំងនៅរាជធានីភ្នំពេញ និងនៅទូទាំងប្រទេស ហើយស្ថានភាពនៃការជួបជុំក្នុងថ្ងៃនេះ គឺមានលក្ខណៈប្រកបដោយភាពសប្បាយរីករាយ ដោយខុសផ្ទុយគ្នាស្រឡះពីស្ថានភាពកាលពីឆ្នាំ ២០២១ កន្លងទៅ។
លោក ហ៊ុន ម៉ាណែត បានប្រសាសន៍ថា៖ «អាជីពជាបុគ្គលិកសុខាភិបាល មានគុណតម្លៃឧត្តុង្គឧត្តមថ្លៃថ្នូរសម្រាប់សង្គមជាតិ ឬអាចនិយាយម្យ៉ាងទៀតថាជាអាជីពតំណាងឱ្យព្រះអាទិទេពក្នុងការជួយសង្គ្រោះជីវិតមនុស្សឱ្យរួចផុតពីជំងឺដង្កាត់ និងគ្រោះភ័យផ្នែកសុខភាពនានា នាំមកនូវការជួបជុំត្រេកអរសប្បាយរីករាយ និងសុភមង្គលក្នុងសង្គមគ្រួសារនីមួយៗ»។
ផ្តើមចេញពីគោលគំនិតនេះ រាជរដ្ឋាភិបាលតែងបានខិតខំបង្កើនធនធាន និងកិច្ចសហប្រតិបត្តិការកៀរគរជំនួយជាតិ និងដៃគូអភិវឌ្ឍអន្តរជាតិ ដើម្បីជំរុញការអភិវឌ្ឍហេដ្ឋារចនាសម្ព័ន្ធជាមូលដ្ឋាននៃប្រព័ន្ធសុខាភិបាលរួមមានការកសាងហេដ្ឋារចនាសម្ព័ន្ធ, ការបណ្តុះបណ្តាលធនធានមនុស្ស, ការបំពាក់ឧបករណ៍បរិក្ខារ ជាដើម ដែលបម្រើឱ្យការផ្តល់សេវាសុខាភិបាលនៅទូទាំងប្រទេស។ នេះបើតាមការលើកឡើងរបស់លោក ហ៊ុន ម៉ាណែត។
លោកបានបញ្ជាក់ទៀតថា៖ «ជាលទ្ធផលកម្ពុជាសម្រេចបាននូវសមិទ្ធផល និងវឌ្ឍនភាពសំខាន់ៗជាច្រើនក្នុងនោះស្ថានភាពសុខភាពសាធារណៈត្រូវបានកែលម្អជាលំដាប់រួមជាមួយនឹងការយកចិត្តទុកដាក់ក្នុងការពង្រឹងគុណភាពសេវាសុខាភិបាលនៅគ្រប់កម្រិត»។
ជាក់ស្តែង កម្ពុជាក៏បានសម្រេចគោលដៅអភិវឌ្ឍន៍សហស្សវត្សរ៍របស់ខ្លួនគួរឱ្យកត់សម្គាល់ ដែលក្នុងនោះមានគោលដៅចំនួន ៤ ត្រូវបានសម្រេចមុនកាលបរិច្ឆេទកំណត់ គឺការកាត់បន្ថយអត្រាមរណៈកុមារ, ការលើកកម្ពស់សុខភាពមាតា, ការប្រយុទ្ធនឹងមេរោគអេដស៍ ជំងឺអេដស៍ ជំងឺគ្រុនចាញ់ និងជំងឺឆ្លងនានា។
ឆ្លៀតឱកាសនោះដែរ លោក ហ៊ុន ម៉ាណែត ក៏បានបញ្ជាក់ដែរថា កត្តាជោគជ័យនៃការគ្រប់គ្រងការរីករាលដាលនៃជំងឺកូវីដ ១៩ នៅកម្ពុជា គឺបានមកដោយកត្តា ០២ យ៉ាងគឺ ទី ១ ប្រទេសកម្ពុជាមានថ្នាក់ដឹកនាំកំពូល គឺលោកនាយករដ្ឋមន្ត្រី ហ៊ុន សែន ដែលបានដឹកនាំដោយតម្កល់ការសង្គ្រោះអាយុជីវិត និងជីវភាពរស់នៅរបស់ប្រជាពលរដ្ឋជាកត្តាអាទិភាពចម្បងបំផុត។
កត្តាទី ២ គឺការចូលរួមពីសំណាក់ប្រតិបត្តិករនានា រួមមាន កងទ័ពអាវសនៅទូទាំងប្រទេសជាមួយមន្ត្រីរាជការគ្រប់ក្រសួង-ស្ថាប័នពាក់ព័ន្ធ អាជ្ញាធរដែនដី និងកម្លាំងប្រដាប់អាវុធគ្រប់ប្រភេទ ក្នុងនាមជាកម្លាំងសរុបរបស់ជាតិរួមជាមួយនឹងប្រជាពលរដ្ឋពីគ្រប់មជ្ឈដ្ឋាន។
លោកថា៖ «គ្រប់គ្នាបានរួមគ្នាយ៉ាងសស្រាក់សស្រាំជាកម្លាំងមហាសាមគ្គីក្នុងការបំពេញគ្រប់ភារកិច្ចដោយមិនខ្លាចនឿយហត់ និងប្រកបដោយពលិកម្មគ្រប់បែបយ៉ាងសំដៅធ្វើយ៉ាងណាសង្គ្រោះ និងការពារអាយុជីវិតរបស់ប្រជាពលរដ្ឋចាស់ក្មេងឱ្យរួចផុតពីមាត់ជ្រោះមរណៈនៃជំងឺកូវីដ ១៩»៕