កំពង់ស្ពឺៈ នគរបាលចំនួន ២៥៧ នាក់ (ស្រី ៣៥ នាក់) បានចូលរួមក្នុងវគ្គបណ្តុះបណ្តាល «កម្រិតបឋមវិជ្ជាជីវៈនគរបាល» នៅសាលានគរបាលជាតិមិត្តភាពកម្ពុជា-វៀតណាម ក្នុងខេត្តកំពង់ស្ពឺ ដែលជាផ្នែកសំខាន់នៃការបណ្តុះបណ្តាល និងការបំប៉នជំនាញជូនដល់កងកម្លាំងនគរបាលជាតិ ដើម្បីឱ្យមានសមត្ថភាព និងជំនាញបច្ចេកទេសខ្ពស់ ក្នុងការបំពេញភារកិច្ច។ នេះបើតាមអគ្គស្នងការដ្ឋាននគរបាលជាតិ។
លោកឧត្តមសេនីយ៍ឯក អ៊ុ អុន អនុប្រធានសេនាធិការ និងជានាយកសាលានគរបាលជាតិមិត្តភាពកម្ពុជា-វៀតណាម បានថ្លែងនៅក្នុងពិធីបើកវគ្គបណ្តុះបណ្តាលនៅថ្ងៃទី ២៦ ឧសភាថា វគ្គបណ្ដុះបណ្ដាលកម្រិតបឋមវិជ្ជាជីវៈនគរបាលក្នុងពេលនេះ មានសិក្ខាកាមសរុបចំនួន ២៥៧ នាក់ (ស្រី ៣៥ នាក់) ដែលមកពីអគ្គលេខាធិការដ្ឋាន នាយកដ្ឋានអង្គភាពចំណុះអគ្គស្នងការដ្ឋាននគរបាលជាតិ និងគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គមចំនួន ១២។
លោក អ៊ុ អុន បានបញ្ជាក់ថា ផ្ដើមចេញពីគោលនយោបាយ និងយុទ្ធសាស្ដ្រកំណែទម្រង់សាលានគរបាលជាតិមិត្តភាពកម្ពុជា-វៀតណាម មានតួនាទីយ៉ាងសំខាន់ ក្នុងការធ្វើជាសេនាធិការ ជូនអគ្គស្នងការដ្ឋាននគរបាលជាតិ លើការកសាងផែនការបណ្ដុះបណ្ដាល បំពាក់បំប៉នមុខជំនាញ ជូនដល់កងកម្លាំងនគរបាលជាតិ។
បន្ទាប់ពីសម្ពោធដាក់ឱ្យដំណើរការក្នុងឆ្នាំ ២០១៥ សាលានគរបាលជាតិ មិត្តភាពកម្ពុជា-វៀតណាម បានបើកវគ្គបណ្ដុះបណ្ដាល និងបំប៉នជំនាញជូនកងកម្លាំងនគរបាលជាតិទូទាំងប្រទេសបានចំនួន ២២ វគ្គ មានសិក្ខាកាមសរុបចំនួន ២ ៦៦៦ នាក់ ស្រី ១១៩ នាក់។
ក្នុងឱកាសនោះ លោកឧត្តមសេនីយ៍ឯក ចាន់ ស៊ីថា អគ្គស្នងការរងនគរបាលជាតិបានថ្លែងកោតសរសើរចំពោះថ្នាក់ដឹកនាំសាលា និងមន្ដ្រីនគរបាលទាំងអស់នៃសាលានគរបាលជាតិមិត្តភាពកម្ពុជា-វៀតណាម ដែលបានយកចិត្តទុកដាក់ និងទទួលខុសត្រូវ ចំពោះការងារបណ្ដុះបណ្ដាលកងកម្លាំងនគរបាលជាតិ តាំងពីដើមរហូតមកដល់ពេលបច្ចុប្បន្ននេះ ក៏ដូចជាបន្ដទៅថ្ងៃអនាគត។
លោកមានប្រសាសន៍ថា ការបណ្ដុះបណ្ដាលនៅពេលនេះ គឺពិតជាមានសារៈសំខាន់។ នៅចំពោះមុខនៃបញ្ហាប្រឈម តម្រូវឱ្យកងកម្លាំងដែលមានសមត្ថកិច្ចក្នុងការងារសន្ដិសុខ សណ្ដាប់ធ្នាប់ ត្រូវមានសមត្ថភាព និងជំនាញបច្ចេកទេសខ្ពស់ ក្នុងការបំពេញភារកិច្ច ព្រមជាមួយនេះផងដែរ ត្រូវមានភាពរហ័សរហួន និងឈ្លាសវៃក្នុងការកំណត់មុខសញ្ញា ដើម្បីធ្វើការបង្ក្រាប និងសង្គ្រោះក្នុងករណីដែលមានហេតុការណ៍ផ្សេងៗកើតឡើង។
លោកបន្ដទៀតថា ការសិក្សានៅសាលា គ្រាន់តែជាការសិក្សាទ្រឹស្ដី និងបច្ចេកទេសមួយចំនួន ដែលនឹងជួយផ្ដល់ចំណេះដឹង និងជំនាញ សម្រាប់សិក្ខាកាមទាំងអស់ អាចយកទៅប្រើប្រាស់ជាក់ស្ដែងនៅពេលបំពេញភារកិច្ចតែប៉ុណ្ណោះ។
ប៉ុន្ដែការអនុវត្តជាក់ស្ដែងក្នុងពេលបំពេញភារកិច្ច គឺតម្រូវឱ្យកងកម្លាំងមានសមត្ថកិច្ចត្រូវខិតខំបំពេញភារកិច្ចប្រកបដោយការទទួលខុសត្រូវខ្ពស់ ដោយប្រើនូវកម្លាំងកាយ ប្រាជ្ញា ស្មារតី និងភាពវៃឆ្លាតក្នុងការដោះស្រាយបញ្ហា ដែលកើតមានឡើងចំពោះមុខ។
ក្នុងនាមអគ្គស្នងការដ្ឋាននគរបាលជាតិ លោក ចាន់ ស៊ីថា ក៏បានចែករំលែកនូវមតិមួយចំនួនក្នុងទិសដៅនៃការកសាងសមត្ថភាព និងការលើកកម្ពស់ប្រសិទ្ធភាពការងាររបស់កងកម្លាំងនគរបាលជាតិ។
ក្នុងនោះ ទី១ ត្រូវបន្ដខិតខំពង្រឹងនគរបាលជាតិគ្រប់ថ្នាក់ គ្រប់ផ្នែក ដែលជាកម្លាំងអនុវត្តច្បាប់ឱ្យមានជំនាញវិជ្ជាជីវៈខ្ពស់ ជាមួយការគោរពឱ្យបានត្រឹមត្រូវ នូវច្បាប់របស់រដ្ឋ លើកកម្ពស់ការគោរពសិទ្ធិមនុស្ស គោរពសិទ្ធិសេរីភាព របស់ប្រជាពលរដ្ឋដោយត្រូវគោរពឱ្យបានម៉ឺងម៉ាត់នូវក្រមសីលធម៌វិជ្ជាជីវៈ ត្រូវមានភាពស្មោះត្រង់ក្នុងវិជ្ជាជីវៈរបស់ខ្លួន ត្រូវប្រកាន់ខ្ជាប់នូវវិន័យសេចក្ដីថ្លៃថ្នូរ និងភាពស្អាតស្អំក្នុងការបម្រើប្រជាពលរដ្ឋ។
ទី២ ទន្ទឹមនឹងការជំរុញអនុវត្តគោលនយោបាយ ភូមិ-ឃុំ មានសុវត្ថិភាព ដើម្បីពង្រឹងឱ្យបានកាន់តែរឹងមាំថែមទៀត នូវសន្ដិសុខ សុវត្ថិភាព សណ្ដាប់ធ្នាប់សាធារណៈ និងគោរពច្បាប់ សំដៅជំរុញឱ្យបានខ្លាំងក្លានូវការអភិវឌ្ឍសេដ្ឋកិច្ច សង្គមប្រកបដោយចីរភាពរយៈពេលវែងជាបន្ដទៀត និងដើម្បីផ្ដល់ភាពកក់ក្ដៅជូនប្រជាពលរដ្ឋ និងសង្គមទាំងមូល។
ទី៣ ត្រូវដាក់ចេញវិធានការបង្ការ ទប់ស្កាត់ជាមុន និងចាត់ចែងប្រើប្រាស់គ្រប់មធ្យោបាយ ដើម្បីបង្ក្រាបឱ្យបានទាន់ពេលវេលា និងមានប្រសិទ្ធភាពចំពោះហេតុការណ៍ដែលកើតឡើងក្នុងមូលដ្ឋានរបស់ខ្លួន ជាពិសេសអំពើប្លន់ប្រដាប់អាវុធ ឃាតកម្ម អំពើហិង្សានានា ទំនាស់នៅក្នុងសង្គម ឬបាតុភាពបង្កឱ្យបាត់បង់សណ្ដាប់ធ្នាប់សាធារណៈ និងរាល់បទល្មើសទាំងឡាយ ទោះក្រោមរូបភាពណាក៏ដោយ ត្រូវខិតខំស្រាវជ្រាវរកឱ្យឃើញជនប្រព្រឹត្ត ដើម្បីនាំខ្លួនមកផ្ដន្ទាទោសតាមច្បាប់ជាធរមាន។
ចំណែកចំណុចទី៤ លោក ចាន់ ស៊ីថា បានលើកឡើងថា ត្រូវបន្ដខិតខំរៀបចំសណ្ដាប់ធ្នាប់សាធារណៈឱ្យកាន់តែល្អប្រសើរ ស្របតាមការវិវត្តន៍រីកចម្រើនរបស់ប្រទេសជាតិ។ ក្នុងនោះ បញ្ហាដែលត្រូវយកចិត្តទុកដាក់ គឺសណ្ដាប់ធ្នាប់ចរាចរណ៍ ដែលនៅតែជាបញ្ហាប្រឈមដ៏ធ្ងន់ធ្ងរ បណ្ដាលឱ្យមានគ្រោះថ្នាក់ដល់អាយុជីវិត និងទ្រព្យសម្បត្តិប្រជាពលរដ្ឋជារៀងរាល់ថ្ងៃ។
លោកបន្តថា រីឯចំណុចទី៥ ដើម្បីលើកកម្ពស់ប្រសិទ្ធភាពខ្ពស់ ក្នុងការអនុវត្តភារកិច្ចខាងលើ ត្រូវបន្ដធ្វើការកែទម្រង់នគរបាលជាតិ ឱ្យកាន់តែស៊ីជម្រៅ ដោយខិតខំបង្កើនការបណ្ដុះបណ្ដាល កសាងសមត្ថភាពកម្លាំងនគរបាលជាតិ នៅគ្រប់ថ្នាក់ដោយដើរទន្ទឹមនឹងការលើកកម្ពស់មនសិកាវិជ្ជាជីវៈ ការគោរពវិន័យសីលធម៌ ដើម្បីលើកកម្ពស់គុណភាព សមត្ថភាពរបស់កងកម្លាំងនគរបាលជាតិទាំងមូល ក្នុងការផ្ដល់សេវាសន្ដិសុខ ជូនប្រជាពលរដ្ឋឱ្យបានកាន់តែទូលំទូលាយ ប្រកបដោយភាពស្មោះត្រង់រាក់ទាក់គ្រប់ទីកន្លែង និងទាន់ពេលវេលា។
បន្ថែមពីនេះ លោកអគ្គស្នងការរងបានលើកឡើងទៀតថា ចំពោះការងារបណ្ដុះបណ្ដាល និងបំប៉នជំនាញដល់មន្ដ្រីនគរបាលជាតិ សេនាធិការដ្ឋាន ត្រូវបន្ដកិច្ចសហការជាមួយអង្គភាពជំនាញពាក់ព័ន្ធនានា ដើម្បីរៀបចំកម្មវិធីសិក្សា និងខ្លឹមសារបង្ហាត់បង្រៀនឱ្យស្របតាមសភាពការណ៍វិវត្តន៍ថ្មីៗរបស់សង្គមជាតិ ក្នុងនោះមុខវិជ្ជាបច្ចេកទេសព័ត៌មានវិទ្យា ក៏ដូចជាមុខវិជ្ជាសំខាន់មួយ ដែលត្រូវផ្ដោតការយកចិត្តទុកដាក់បណ្ដុះបណ្ដាល និងបំប៉នដល់កងកម្លាំងនគរបាលជាតិ សំដៅធ្វើយ៉ាងណាឱ្យមន្ដ្រីនគរបាលមានការអភិវឌ្ឍលើជំនាញបច្ចេកទេសគួបផ្សំនឹងសីលធម៌ គុណធម៌ ការគោរពវិន័យ និងការទទួលខុសត្រូវខ្ពស់ ក្នុងការគោរពប្រតិបត្តិច្បាប់ គោរពសិទ្ធិមនុស្ស ស័ក្តិសមជាអ្នកបម្រើប្រជាជន និងសង្គមជាតិដោយស្មោះត្រង់៕