ភ្នំពេញៈ គ្រោះថ្នាក់ចរាចរណ៍ផ្លូវគោកទូទាំងប្រទេសនៅថ្ងៃទី ២៦ ខែឧសភា ឆ្នាំ ២០២២ បានបណ្តាលឱ្យមនុស្សស្លាប់យ៉ាងហោចណាស់ ៤ នាក់ ( ស្រី ១ នាក់ ) របួសធ្ងន់ចំនួន ៤ នាក់ ( ស្រី ១ នាក់ ) របួសស្រាល ១ នាក់ ក្នុងនោះមានបុរសម្នាក់នៅខត្តកំពង់ស្ពឺបានបើកបរម៉ូតូដួលនៅលើផ្លូវជាតិលេខ ៤ ហើយត្រូវរថយន្តកិនស្លាប់។
យោង តាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេសចេញដោយនាយកដ្ឋាន នគរបាលចរាចរណ៍ និង សណ្តាប់សាធារណៈនៃអគ្គស្នងការដ្ឋាននគរបាលជាតិនៅថ្ងៃទី ២៦ ខែឧសភា បានបញ្ជាក់ថា គ្រោះថ្នាក់ដែលបង្កឱ្យមានមនុស្សស្លាប់ និង របួសចំនួន ៩ នាក់ កើតឡើងដោយសារការប៉ះទង្គិចគ្នាចំនួន ៧ លើក ។
ជាមួយគ្នានេះ នៅថ្ងៃទី ២៦ ខែឧសភា នៅវេលាម៉ោង ១៨ និង ៣៥ នាទីនៅលើផ្លូវជាតិលេខ ៤ ចន្លោះគីឡូម៉ែត្រលេខ ៤៣-៤៤ ត្រង់ចំណុចភូមិរលាំងសង្កែ សង្កាត់សុព័រទេព ក្រុងច្បារមន ខេត្តកំពង់ស្ពឺ មានករណីគ្រោះថ្នាក់ចរាចរណ៍ម៉ូតូដួលត្រូវរថយន្ដកិនបណ្តាលឱ្យបុរសម្នាក់ស្លាប់នៅកន្លែងកើតហេតុ។
តាមការបញ្ជាក់ពីសមត្ថកិច្ចបានឱ្យដឹងថា មុនពេលកើតហេតុមានម៉ូតូ ០១ គ្រឿង ម៉ាក HONDA DREAM C125 ពណ៌ខ្មៅ ពាក់ស្លាកលេខកំពង់ស្ពឺ 1J1.646 អ្នកបើកបរឈ្មោះ លឹម សុភក្ត្រា ភេទប្រុស អាយុ ២៥ ឆ្នាំ រស់នៅភូមិជ័យឧត្តម ឃុំព្រែខ្សែ ខ ស្រុកពាមរក៍ ខេត្តព្រៃវែង បើកបរពីទិសខាងលិចទៅទិសខាងកើត លុះមកដល់ត្រង់ចំណុចខាងលើម៉ូតូក៏បានដួលហើយខ្ទាតទាំងម៉ូតូ និងមនុស្ស មកខាងឆ្វេងដៃភ្លាមនោះក៏មានរថយន្ដ ០២ គ្រឿង បើកបរពីទិសខាងកើតទៅទិសខាងលិច រថយន្តទី ១ មិនស្គាល់ម៉ាក និងអត្តសញ្ញាណអ្នកបើកបរ (បើក រត់គេច ក្រោយកើតហេតុ) បានទៅកិនមនុស្សដែលដួល និងរថយន្តទី ២ ម៉ាក HYUNDAI ពណ៌លឿង ពាក់ស្លាកលេខភ្នំពេញ 3E-8324 សណ្ដោងសឺមីរ៉ឺម៉ក ពណ៌លឿង ពាក់ស្លាកលេខភ្នំពេញ 4A-6246 មិនទាន់ស្គាល់អត្តសញ្ញាណអ្នកបើកបរ (ចុះរត់គេច) បានទៅកិនម៉ូតូដែលដួលនោះដែរ បណ្ដាលឱ្យឈ្មោះ លឹម សុភក្ត្រា ស្លាប់នៅកន្លែងកើតហេតុតែម្តង។
ចំពោះវត្ថុតាងរថយន្តត្រូវបានកម្លាំងនគរបាលបានយកទៅរក្សាទុកនៅការិយាល័យចរាចរណ៍ផ្លូវគោក ចំណែករថយន្ដមិនស្គាល់ម៉ាកកំពុងតែស្រាវជ្រាវបន្ដ ដើម្បីចាត់ការតាមនីតិវិធីច្បាប់៕