.jpg)
ភ្នំពេញៈ អង្គការ WCS បានឱ្យដឹងនៅថ្ងៃទី ២៧ ខែឧសភានេះថា ចាប់តាំងពីខែកក្កដា ឆ្នាំ ២០១៩ មក គម្រោងអង្កេតតាមដានសុខភាពសត្វព្រៃ (Wild Health Net) ដែលគាំទ្រដោយទីភ្នាក់ងារកាត់បន្ថយការគំរាមកំហែងនៃសហរដ្ឋអាមេរិកបានរកឃើញហេតុការណ៍សត្វព្រៃឈឺ និងស្លាប់ជាង ១០០ ករណី នៅទូទាំងប្រទេស ហើយបានផ្តល់ការបណ្តុះបណ្តាលដល់ដៃគូរបស់បណ្តាញបានជាង ៤០០ នាក់។
គម្រោងអង្កេតតាមដានសុខភាពសត្វព្រៃនេះ ត្រូវបានបង្កើតឡើងនៅចុងឆ្នាំ ២០១៨ ក្នុងគោលបំណងគាំទ្រការកសាងសមត្ថភាពស្ថាប័នរដ្ឋាភិបាលក្នុងការអនុវត្តសកម្មភាពអង្កេតតាមដានសុខភាពសត្វព្រៃនៅក្នុងតំបន់ទន្លេមេគង្គក្រោម ដែលមានប្រទេសកម្ពុជា ឡាវ និងវៀតណាម) ដើម្បីស្រាវជ្រាវ ពិនិត្យតាមដាន និងរាយការណ៍អំពីប្រភេទជំងឺឆ្លងដែលគ្រោះថ្នាក់ជាពិសេស (EDPs) ដែលកើតលើសត្វព្រៃ។
អង្គការ WCS បានសរសេរនៅលើហ្វេសប៊ុករបស់ខ្លួនថា៖ «សមិទ្ធផលសំខាន់ៗមួយចំនួនដែលគម្រោងសម្រេចបានរួមមាន ការរកឃើញជំងឺប៉េស្តជ្រូកអាហ្វ្រិកលើសត្វជ្រូកព្រៃ ការឆ្លើយតបក្នុងន័យសុខភាពតែមួយដោយសហស្ថាប័នចំពោះការផ្ទុះជំងឺផ្តាសាយ H5N1 និងកិច្ចសហការរៀបចំយុទ្ធនាការ ចាក់វ៉ាក់សាំងការពារជំងឺដុំពកស្បែកលើសត្វពាហនៈជាមួយនាយកដ្ឋានសុខភាពសត្វ ដើម្បីការពារពពួកសត្វ ទំពារអៀងព្រៃ»។
ការបង្ហាញពីការឈឺនិងស្លាប់របស់សត្វព្រៃជាង ១០០ ករណីនេះត្រូវបានធ្វើឡើង ក្រោយពេលដែលអង្គការ WCS បានរៀបចំកិច្ចប្រជុំចុងក្រោយសម្រាប់គម្រោងអង្កេតតាមដានសុខភាពសត្វព្រៃ(Wild Health Net) ដើម្បីបំណងចែករំលែកសកម្មភាពការងាររបស់គម្រោង និងសមិទ្ធផលសម្រេចបានក្នុងរយៈពេលបីឆ្នាំកន្លងមកកាលពីសប្តាហ៍មុន។
កិច្ចប្រជុំត្រូវបានធ្វើឡើងដើម្បីពិភាក្សាអំពីឱកាសសម្រាប់ដៃគូរបស់បណ្តាញអង្កេតតាមដានសុខភាពសត្វព្រៃក្នុងកំឡុងពេលអន្តរកាលនេះដើម្បីរក្សា និងធានាដល់និរន្តរភាពរបស់បណ្តាញ និងផ្តល់នូវឱកាសសម្រាប់ដៃគូរបស់បណ្តាញដើម្បីឆ្លុះបញ្ចាំងអំពីវឌ្ឍនភាពនៃគម្រោងអង្កេត តាមដានសុខភាពសត្វព្រៃនៅកម្ពុជា និងពិនិត្យលទ្ធភាពថា តើគម្រោងនេះអាចបន្តនិរន្តរភាពនាពេលអនាគត បានយ៉ាងដូចម្តេចតាមរយៈកិច្ចសហការបន្តនិងការចូលរួមពីស្ថាប័នរដ្ឋាភិបាលនិងដៃគូរបស់បណ្តាញសុខភាពតែមួយ៕
