The Phnom Penh Post Search

Search form




Logo of Phnom Penh Post newspaper Phnom Penh Post - ទៅលេង​សួន​ធម្មជាតិ​អង្គរ​កុំ​ភ្លេច​ជួយ​ទិញ​ផ្លែ​ម្នាស់​ទឹកឃ្មុំ​របស់​គម្រោង​អភិវឌ្ឍន៍​ភូមិ​ធម្មជាតិ​រុនតាឯក

ទៅលេង​សួន​ធម្មជាតិ​អង្គរ​កុំ​ភ្លេច​ជួយ​ទិញ​ផ្លែ​ម្នាស់​ទឹកឃ្មុំ​របស់​គម្រោង​អភិវឌ្ឍន៍​ភូមិ​ធម្មជាតិ​រុនតាឯក

Content image - Phnom Penh Post
ក្រុមមន្ត្រី ពិនិត្យ​ផ្លែឈើ​ដែល​ដាំ​នៅក្នុង​ភូមិ​ធម្មជាតិ​រុនតាឯក​។ រូបថត​អាជ្ញាធរ​ជាតិ​អប្សរា

ទៅលេង​សួន​ធម្មជាតិ​អង្គរ​កុំ​ភ្លេច​ជួយ​ទិញ​ផ្លែ​ម្នាស់​ទឹកឃ្មុំ​របស់​គម្រោង​អភិវឌ្ឍន៍​ភូមិ​ធម្មជាតិ​រុនតាឯក

សៀមរាបៈ ផ្លែ​ម្នាស់​ទឹកឃ្មុំ​របស់​គម្រោង​អភិវឌ្ឍន៍​ភូមិ​ធម្មជាតិ​រុនតាឯក​ត្រូវបាន​ដាក់លក់​នៅមុខ​សួន​ធម្មជាតិ​អង្គរ​ ដែល​អាជ្ញាធរ​ជាតិ​អប្សរា​ទើបនឹង​បើកសម្ពោធ​កាលពី​ថ្ងៃទី​ ១៩ ខែឧសភា​។

គម្រោង​អភិវឌ្ឍន៍​ភូមិ​ធម្មជាតិ​រុនតាឯក​កំពុង​ប្រមូលផល​ម្នាស់​ទឹកឃ្មុំ ដែល​បាន​ដាំ​បង្ហាញ​លើ​ផ្ទៃដី​ជាង ​២ ​ហិកតា​។ ការដាំដុះ​គឺ​ប្រើប្រាស់​ជីធម្មជាតិ​សុទ្ធសាធ និង​ទទួល​បាន​ការកោត​សរសើរ​ថា​មាន​ឱជារស​ផ្អែម​ឆ្ងាញ់​។

សាធារណជន​អាច​ភ្លក់​រសជាតិ​ម្នាស់​ទឹកឃ្មុំ ដែល​ដាំ​ដោយ​អ្នកភូមិ​ធម្មជាតិ​រុនតាឯក​នៅ​សួន​រុក្ខជាតិ​អង្គរ​។ នេះ​បើ​យោងតាម​ការចុះផ្សាយ​របស់​អាជ្ញាធរ​ជាតិ​អប្សរា​នៅ​ថ្ងៃទី​ ២៧ ​ឧសភា​។

លោក ស៊ុន កែវពិសី អនុប្រធាន​គម្រោង​អភិវឌ្ឍន៍​ភូមិ​ធម្មជាតិ​រុនតាឯក ប្រាប់ថា គម្រោង​ដាំ​បង្ហាញ​ម្នាស់​នៅ​ក្នុងភូមិ​ចាប់ផ្តើម​ពី​ឆ្នាំ​ ២០២១ ​មក ដោយ​ឆ្នាំ​ដំបូង​ដាំ​បាន​ចំនួន​ ៦ ​ពាន់​ដើម​លើ​ផ្ទៃដី​កន្លះ​ហិកតា និង​ទទួលផល​ល្អប្រសើរ​។

ដោយ​ទិន្នផល​ល្អ​ដូច្នេះហើយ​ទើប​ឆ្នាំ​ ២០២២ ​នេះ​គម្រោង​បាន​បំបែក​កូន​ម្នាស់​ដាំ​ជា​បន្តបន្ទាប់ ដោយ​ពង្រីក​លើ​ផ្ទៃដី​សរុប ២ ​ហិកតា​កន្លះ​។

ចំពោះ​ការប្រើប្រាស់​ជី​វិញ លោក ស៊ុន កែវពិសី ប្រាប់ថា គឺ​ប្រើ​ជី​អាចម៍មាន់ និង​ប្រភេទ​ជី​កំប៉ុស្ត ហើយ​ការប្រើ​ជីធម្មជាតិ​ ដូច្នេះ​អ្នកជំនាញ​ប្រាប់ថា បាន​ទិន្នផល​ល្អ​មិន​ចាញ់​ប្រើ​ជីគីមី​ប៉ុន្មាន​ទេ និង​ថែមទាំង​មិន​ប៉ះពាល់​សុខភាព​ទៀត​។

ចំណែក​ទីផ្សារ​វិញ ការដាំ​នៅ​ឆ្នាំនេះ គឺ​បេះ​លក់​នៅ​សួន​រុក្ខជាតិ​អង្គរ ដែល​អាជ្ញាធរ​ជាតិ​អប្សរា​ទើបនឹង​សម្ពោធ​កាលពី​ថ្ងៃទី​ ១៩ ខែឧសភា ឆ្នាំ​ ២០២២ ហើយ​មានការ​គាំទ្រ​ច្រើន​ពី​សាធារណជន​ដែល​បាន​ចូលទៅ​ទស្សនា​ក្នុង​សួន​មួយ​នេះ​។

ក្រៅពី​ម្នាស់ ក្នុង​គម្រោង​អភិវឌ្ឍន៍​ភូមិ​ធម្មជាតិ​រុនតាឯក​នេះ​ក៏មាន​ដាំ​ផ្លែឈើ​ចម្រុះ​ដទៃទៀត រួមមាន ផ្លែ​ខ្នុរ ស្រកានាគ អំពៅ​។​ល​។ បង្ហាញ​ដល់​ពលរដ្ឋ​ក្នុងភូមិ និង​លើក​ទឹកចិត្ត​ដល់​ពួកគេ​ដាំដុះ​ឱ្យបាន​ច្រើន​ផងដែរ​។

ចំពោះ​ដំណាំ​ម្នាស់​វិញ​មាន​ពលរដ្ឋ​ ៤​ គ្រួសារ​ហើយ​ដែល​ចាប់អារម្មណ៍ ហើយ​គម្រោង​នេះ​បាន​ចែក​ពូជ​កូន​សរុប ១ ២០០ ​កូន ដល់​ពលរដ្ឋ​ដោយ​ឥត​បង់ថ្លៃ ក្នុង​ន័យ​លើកស្ទួយ​កម្រិត​ជីវភាព​ពួកគេ​ឱ្យមាន​ភាពល្អប្រសើរ និង​ដែល​ពួកគេ​យកទៅ​ដាំ​លើ​ផ្ទៃដី​ដែល​អាជ្ញាធរ​ជាតិ​អប្សរា​ចែកជូន​។ នេះ​ជា​ការ​បញ្ជាក់​របស់​លោក ស៊ុន កែវពិសី​។

លោក ស៊ុន កែវពិសី ក៏​លើកឡើង​ពី​កិច្ចខិតខំ​ប្រឹងប្រែង​របស់​ថ្នាក់ដឹកនាំ​អាជ្ញាធរ​ជាតិ​អប្សរា ដើម្បី​បន្ត​អភិវឌ្ឍន៍​ភូមិ​នេះ ដូចជា​បាន​បន្ត​រៀបចំ​ជា​ផ្លូវថ្នល់ និង​ប្រព័ន្ធ​ប្រឡាយ​ ៤ ​ខ្សែ​បន្ថែមទៀត សម្រួល​ដល់​ការធ្វើ​ដំណើរ និង​យក​ទឹក​ស្រោចស្រព​សម្រាប់​ដំណាំ​កសិកម្ម​ប្រជាពលរដ្ឋ​ក្នុង​ភូមិ​ទាំងមូល​ផងដែរ​៕

អត្ថបទគួរចាប់អារម្មណ៍