ភ្នំពេញៈ យុទ្ធនាការមួយឈ្មោះថា «ខ្ញុំសន្សំ» ត្រូវបានធ្វើឡើងរយៈពេល ៥ ខែ ចាប់ពីខែឧសភា ដល់ខែកញ្ញា ឆ្នាំ ២០២២ នេះ ដើម្បីលើកកម្ពស់ការយល់ដឹងពីប្រសិទ្ធភាពថាមពល និងចូលរួមប្រយុទ្ធប្រឆាំងនឹងការប្រែប្រួលអាកាសធាតុ។
យោងតាមសេចក្តីប្រកាសព័ត៌មានពីយុទ្ធនាការនេះកាលពីថ្ងៃទី២៥ ខែឧសភាបានឱ្យដឹងថា ស្របតាមការប្តេជ្ញារបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងការប្រែប្រួលអាកាសធាតុ យុទ្ធនាការលើបណ្តាញសង្គមមួយដែលត្រូវបានគេស្គាល់ថា «ខ្ញុំសន្សំ» ឬ «iSave» ត្រូវបានបង្កើតឡើងក្នុងគោលបំណងលើកកម្ពស់ការយល់ដឹងអំពីប្រសិទ្ធភាពថាមពល។ តាមរយៈការស្វែងយល់និងអនុវត្តទម្លាប់ងាយៗ អ្នកប្រើប្រាស់តាមផ្ទះនិងម្ចាស់អាជីវកម្មនឹងអាចកាត់បន្ថយការប្រើប្រាស់ថាមពល ចំណេញថវិកា និងរួមចំណែកបង្កើតបរិស្ថានប្រកបដោយសុខភាព។
យុទ្ធនាការ«ខ្ញុំសន្សំ»ត្រូវបានគាំទ្រដោយការិយាល័យ Foreign Commonwealth and Development Office (FCDO) របស់រដ្ឋាភិបាលចក្រភពអង់គ្លេស ហើយត្រូវបានរៀបចំដោយក្រុមហ៊ុនCarbon Trust ដែលជាផ្នែកមួយនៃកម្មវិធីកាត់បន្ថយកាបូនក្នុងតំបន់អាស៊ាន និងអនុវត្តដោយដៃគូ ដែលរួមមានស៊ីអ៊ិនវេសមិន ដែលជាសហគ្រាសសង្គមផ្តល់ការគាំទ្រដល់សហគ្រាស ធុនតូចរបស់សហគ្រិនស្ត្រីនៅក្នុងប្រទេសកម្ពុជា។
កិច្ចផ្តួចផ្តើមមួយនេះមានគោលបំណងពន្លឿនការផ្លាស់ប្តូរក្នុងប្រទេសកម្ពុជាក្នុងការធន់ទៅនឹងអាកាសធាតុ កាត់បន្ថយការបញ្ចេញឧស្ម័នកាបូនិច និងការអភិវឌ្ឍប្រកបដោយនិរន្តរភាព។ ប្រទេសកម្ពុជាបានប្តេជ្ញាក្នុងការចូលរួមចំណែកកាត់បន្ថយការបំពុលជាសកល ទៅតាមលទ្ធភាពនិងធនធានរបស់ខ្លួន។ កម្ពុជាក៏បានបង្ហាញពីទស្សនវិស័យនិងយុទ្ធសាស្ត្រដែលជាត្រីវិស័យដឹកនាំប្រទេសទៅកាន់សេដ្ឋកិច្ចដែលមានតុល្យភាពកាបូនទូទាំងប្រទេសនៅត្រឹមឆ្នាំ២០៥០។
លោកស្រី Tina Redshaw ឯកអគ្គរាជទូតចក្រភពអង់គ្លេសប្រចាំកម្ពុជាបានមានប្រសាសន៍ក្នុងសេចក្តីប្រកាសថា៖ «ការផ្លាស់ប្តូររបត់ទៅកាន់ថាមពលស្អាតដែលដើរទន្ទឹមគ្នានឹងប្រសិទ្ធភាពថាមពលក្លាយជាវិធីសាស្ត្រដ៏មានប្រសិទ្ធភាពដែលធានានូវសន្តិសុខអាកាសធាតុនិងថាមពល និងភាពរុងរឿងសម្រាប់ប្រទេសកម្ពុជានិងពិភពលោកទាំងមូល»។
លោកជំទាវបានបន្តថា សន្និសីទក្រុងប៉ារីសលើកទី២៦ របស់អង្គការសហប្រជាជាតិស្តីពីការប្រែប្រួលអាកាសធាតុបានទទួលភាពជោគជ័យដ៏ធំមួយនៅក្នុងទីក្រុង ក្លាសហ្គូ ក្នុងខែវិច្ឆិកា ឆ្នាំ២០២១ ក្រោយពីភាគីចំនួន ១៩៧ភាគីបានយល់ព្រមនៅក្នុងកតិកាសញ្ញាអាកាសធាតុទីក្រុងក្លាសហ្គូ មូលមតិគ្នាទៅលើភាពចាំបាច់នៃសកម្មភាពលើអាកាសធាតុ។ ដើម្បីបន្តភាពជោគជ័យមួយនេះនៅក្នុងឆ្នាំ២០២២ និងឆ្លើយតបនឹងគោលដៅនៃកិច្ចព្រមព្រៀងទីក្រុងប៉ារីស ការផ្លាស់ប្តូរជាសកលក្នុងការប្រើប្រាស់ថាមពលស្អាតនិងប្រកបដោយប្រសិទ្ធភាពពិតជាមានការចាំបាច់ខ្លាំងណាស់។
លោកស្រីបានបញ្ជាក់ថា៖«នៅស្ថានទូតអង់គ្លេសប្រចាំកម្ពុជា ពួកយើងពិតជាមានសេចក្តីរីករាយក្នុងការបន្តការគាំទ្ររបស់យើងទៅលើប្រទេសកម្ពុជា ក្នុងការឆ្លើយតបនឹងតម្រូវការសម្រាប់សន្តិសុខថាមពលនៅថ្ងៃនេះនិងនាពេលអនាគត»។
«ខ្ញុំសន្សំ» មានគោលបំណងជំរុញនិងលើកទឹកចិត្តដល់សហគ្រិនជាស្ត្រី យុវជន និង សាធារណជនអំពីការប្រើប្រាស់ថាមពលប្រកបដោយទំនួលខុសត្រូវ។ តាមរយៈទំព័ររបស់ខ្លួន «ខ្ញុំសន្សំ» នឹងផ្តល់វិធីសាស្ត្រងាយៗ សាមញ្ញ ក៏ដូចជាព័ត៌មាននានា ដែលអាចឱ្យប្រជាជនតាមផ្ទះឬសហគ្រិនអាចប្រើប្រាស់ជាក្បួនណែនាំស្តីពីការប្រើប្រាស់និងការសម្រេចចិត្តប្រចាំថ្ងៃទាក់ទងនឹងថាមពល មានដូចជា៖ពន្យល់ពីនិយមន័យនៃប្រសិទ្ធភាពថាមពល ជាមួយនឹងឧទាហរណ៍, ពន្យល់ពីសារៈសំខាន់នៃការលាងសម្អាតម៉ាស៊ីនត្រជាក់ និងរបៀបដែលវាអាចកាត់បន្ថយការប្រើប្រាស់ថាមពល, កំណត់អេក្រង់កុំព្យូទ័រទៅជា sleep mode ឬបិទកុំព្យូទ័រឱ្យបានត្រឹមត្រូវពេលមិនប្រើ, ចែករំលែកគន្លឹះក្នុងការសន្សំសំចៃថវិកាតាមរយៈការទិញសម្ភារប្រើប្រាស់ក្នុងផ្ទះ ឬសម្ភារការិយាល័យដែលមានស្លាកសញ្ញាប្រសិទ្ធភាពថាមពល, ប្រើបន្ទះថាមពលឆ្លាតវៃដែលអាចរកឃើញនៅពេលដែលឧបករណ៍ស្ថិតនៅក្នុងstandby mode និងកាត់បន្ថយថាមពលដើម្បីសន្សំសំចៃការប្រើប្រាស់ថាមពល។
លោក Chris Stephen នាយកនៃក្រុមហ៊ុន Carbon Trust ប្រចាំតំបន់អាស៊ី និងអាហ្វ្រិកបានថ្លែងថា មតិដែលបានមកពីការពិភាក្សាក្រុមបានបង្ហាញថា បើទោះបីជាពួកគេមានការចាប់អារម្មណ៍លើការសន្សំថាមពលក៏ដោយ ក៏កង្វះព័ត៌មានដែលទាក់ទងនឹងប្រសិទ្ធភាពថាមពលនៅតែជាបញ្ហាចោទ។ «ខ្ញុំសន្សំ» មានគោលបំណងជួយលុបគម្លាតនេះដោយផ្តល់នូវព័ត៌មាននិងមាតិកាដែលឆ្លើយតបទៅនឹងតម្រូវការរបស់អ្នកប្រើប្រាស់ ដើម្បីធ្វើឱ្យវាងាយស្រួលសម្រាប់ពួកគេក្នុងការទទួលបានដំបូន្មានដែលពួកគេត្រូវការដើម្បីឱ្យកាន់តែមានប្រសិទ្ធភាពថាមពល និងដើម្បីដឹងពីអត្ថប្រយោជន៍នៃថាមពលជាដើម៕