.jpg)
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។ រូបថត ក្រសួងការងារ
មន្ត្រីជាន់ខ្ពស់នៃក្រសួងការងារនិងបណ្តុះបណ្តាលវិជ្ជាជីវៈ បានប្រកាសឱ្យម្ចាស់ឬនាយករោងចក្រ សហគ្រាសដែលស្ថិតក្នុងដែនអនុវត្តនៃច្បាប់ស្តីពីការងារត្រូវប្រកាសអធិការកិច្ចការងារក្នុងប្រព័ន្ធស្វ័យប្រវត្តិកម្មឱ្យបានមុនដំណាច់ខែមិថុនា និងមុនដំណាច់ខែធ្នូ នៃឆ្នាំនីមួយៗ។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងដូចនេះតាមរយៈសេចក្តីជូនដំណឹង នៅថ្ងៃទី ២៧ ខែឧសភា ស្តីពីការអនុវត្តរបបស្វ័យប្រកាសអធិការកិច្ចការងារតាមប្រព័ន្ធស្វ័យប្រវត្តិកម្ម។
លោកបានឱ្យដឹងថា ៖ «ម្ចាស់ ឬនាយករោងចក្រ សហគ្រាសដែលស្ថិតក្នុងដែនអនុវត្តនៃច្បាប់ស្តីពីការងារឱ្យមានកាតព្វកិច្ចស្វ័យប្រកាសអធិការកិច្ចការងារក្នុងប្រព័ន្ធស្វ័យប្រវត្តិកម្មចំនួន ២ លើកក្នុងមួយឆ្នាំ គឺលើកទី១ ឱ្យបានមុនដំណាច់ខែមិថុនា និងលើកទី២ ឱ្យបានមុនដំណាច់ខែធ្នូ នៃឆ្នាំនីមួយៗ តាមរយៈគេហទំព័រ៖ https://sicms.mlvt.gov.kh ចាប់ពីថ្ងៃទី ១ ខែ មិថុនា ឆ្នាំ ២០២២»។
រដ្ឋមន្ត្រីបានបញ្ជាក់ទៀតថា ក្នុងរបាយការណ៍ស្វ័យប្រកាសអធិការកិច្ចការងារមានចំណុចអាទិភាពចំនួន៣១ ដែលមានកំណត់នៅក្នុងលិខិត ដាក់កំហិតរបស់អធិការការងារ ម្ចាស់ ឬនាយករោងចក្រ សហគ្រាសត្រូវអនុវត្តឱ្យខានតែបានតាមលិខិតដាក់កំហិតនេះ ក្នុងករណីល្មើសនឹងចំណុចអាទិភាពណាមួយនឹងត្រូវទទួលរងការផាកពិន័យភ្លាមៗពីអធិការការងារយោងតាមច្បាប់ និងបទប្បញ្ញត្តិជាធរមាន។
ជាមួយគ្នានេះដែរ លោកក៏បានក្រើនរំឭកដល់ម្ចាស់ ឬនាយករោងចក្រ សហគ្រាសផងដែរ ពីការចាក់វ៉ាក់សាំងកូវីដ ១៩ ដែលជាផ្នែកមួយនៃលក្ខខណ្ឌសុវត្ថិភាព និងសុខភាពការងារនៅតាមរោងចក្រ សហគ្រាស។
លោក អ៊ិត សំហេង ថា ៖ «ដូច្នេះ លោក/លោកស្រី ត្រូវបន្តសហការជាមួយអាជ្ញាធរមូលដ្ឋានរាជធានី ខេត្ត និងមន្ទីរការងារនិងបណ្តុះបណ្តាលវិជ្ជាជីវៈរាជធានី ខេត្ត ដើម្បីជំរុញនិងរៀបចំចាក់វ៉ាក់សាំងដូសជំរុញ ជូនកម្មករនិយោជិតនៅតាមរោងចក្រ សហគ្រាស ដោយអាចបន្តដំណើរការ ផលិតកម្ម/អាជីវកម្មតាមធម្មតា»។
សេចក្តីជូនដំណឹង បានបញ្ជាក់ថា អធិការការងារ នឹងចុះធ្វើអធិការកិច្ចការងារពិសេស ដើម្បីត្រួតពិនិត្យទិន្នន័យកម្មករនិយោជិតចាក់វ៉ាក់សាំងកូវីដ១៩។ ក្នុងករណីម្ចាស់ ឬនាយករោងចក្រ សហគ្រាសមិនបានធ្វើរបាយការណ៍ស្វ័យប្រកាសអធិការកិច្ចការងារ តាម កាលកំណត់ និងមិនព្រមអនុវត្តតាម នឹងត្រូវទទួលការពិន័យ ឬផ្តន្ទាទោសតាមច្បាប់ និង ការចាត់វិធានការតាមផ្លូវច្បាប់ពីក្រសួង៕
