ភ្នំពេញៈ គណៈប្រតិភូនៃអង្គភាពប្រឆាំងអំពើពុករលួយ (អ.ប.ព.) នឹងចូលរួមក្នុងវេទិកាយុត្តិធម៌ពិភពលោកឆ្នាំ ២០២២ ចាប់ពីថ្ងៃទី ៣០ ខែឧសភា ដល់ថ្ងៃទី ០២ ខែ មិថុនា ឆ្នាំ ២០២២ តាមរយៈអនទ្បាញពីទីក្រុងទ្បាអេ ប្រទេសហូទ្បង់។
យោងតាមសេចក្តីប្រកាសរបស់អង្គភាពប្រឆាំងអំពើពុករលួយកាលពីថ្ងៃទី ២៦ ខែឧសភា បានឱ្យដឹងថា គណៈប្រតិភូនៃអង្គភាពប្រឆាំងអំពើពុករលួយដែលនឹងចូលរួមប្រជុំនោះត្រូវបានដឹកនាំដោយលោក អ៊ន បញ្ញា ឧបការី នៃអ.ប.ព។
អ.ប.ពបានបន្តថា ព្រឹត្តិការណ៍នេះរៀបចំឡើងជាលទ្ធផលនៃកិច្ចប្រជុំកម្រិតខ្ពស់តាមអនឡាញនាពេលថ្មីៗនេះរវាងសមាគមអន្តរជាតិអាជ្ញាធរប្រឆាំងអំពើពុករលួយ (IAACA) និងគម្រោងយុត្តិធម៌ពិភពលោក(WJP) ដែលបានឯកភាពត្រូវតែបន្តទៅមុខនូវកម្លាំងរួមគ្នា ដើម្បីប្រឆាំងអំពើពុករលួយ និងលើកកម្ពស់នីតិរដ្ឋនៅទូទាំងពិភពលោក។
សមាជិកគណៈប្រតិភូ អ.ប.ព. ដែលអម លោកអ៊ន បញ្ហា ចូលរួមក្នុងវេទិកាយុត្តិធម៌ពិភពលោក ឆ្នាំ ២០២២ នេះរួមមានលោក ទូច ខេមរិន្ទ អនុប្រធាននាយកដ្ឋានកិច្ចការគតិយុត្ត ពាក្យប្តឹង និងអន្តរជាតិ, លោកស្រី វ៉ិត សាវី និងលោក អ៊ុក ពណ្ណរាយ មន្ត្រីនៃការិយាល័យកិច្ចការអន្តរជាតិ, កញ្ញា គុណ ច័ន្ទបូទី, កញ្ញា តាំង ហ្គេចលី និង លោក ដេត មុនីវិបុល មន្ត្រីនៃនាយកដ្ឋានស៊ើបអង្កេត និងចារកម្ម៕