The Phnom Penh Post Search

Search form




Logo of Phnom Penh Post newspaper Phnom Penh Post - គជបៈ ថ្ងៃទី​​ ៧ ការឃោសនាបោះឆ្នោត​ប្រព្រឹត្តទៅ​គ្មាន​ការគំរាមកំហែង​

គជបៈ ថ្ងៃទី​​ ៧ ការឃោសនាបោះឆ្នោត​ប្រព្រឹត្តទៅ​គ្មាន​ការគំរាមកំហែង​

Content image - Phnom Penh Post
គណបក្សសំបុកឃ្មុំសង្គមប្រជាធិបតេយ្យ ឃោសនាបោះឆ្នោតនាពេលថ្មីៗនេះ។ រូបថត ហ្វេសប៊ុក

គជបៈ ថ្ងៃទី​​ ៧ ការឃោសនាបោះឆ្នោត​ប្រព្រឹត្តទៅ​គ្មាន​ការគំរាមកំហែង​

ភ្នំពេញៈ គណៈកម្មាធិការ​ជាតិ​រៀបចំ​ការបោះឆ្នោត (​គជប​) អះអាងថា ថ្ងៃទី​ ២៧ ខែឧសភា ដែលជា​ថ្ងៃទី ​៧​ នៃ​ការធ្វើ​យុទ្ធនាការ​ឃោសនាបោះឆ្នោត​ឃុំ សង្កាត់ របស់​គណបក្សនយោបាយ បាន​ប្រព្រឹត្ត​ទៅក្នុង​បរិយាកាស​មាន​សណ្តាប់ធ្នាប់​ល្អ គ្មាន​អំពើហិង្សា និង​គ្មាន​ការគំរាមកំហែង​។​

​គជប បញ្ជាក់​ក្នុង​សេចក្តីប្រកាស​ព័ត៌មាន​នា​ថ្ងៃទី​២៧ ខែឧសភា ថា​៖ «​ចំពោះ​សភាពការណ៍​ទូទៅ​នៃ​ដំណើរការ​ឃោសនាបោះឆ្នោត​របស់​គណបក្សនយោបាយ​ក្នុង​ថ្ងៃទី​៧​នេះ​គឺ​បាន​ប្រព្រឹត្ត​ទៅក្នុង​បរិយាកាស​មាន​សន្តិសុខ សុវត្ថិភាព សណ្តាប់ធ្នាប់​ល្អ​គ្មាន​អំពើហិង្សា និង​គ្មាន​ការគំរាមកំហែង​»​។​

​សេចក្តីប្រកាស​ព័ត៌មាន​បន្តថា ក្នុង​ថ្ងៃទី​៧​នេះ គណបក្សនយោបាយ​បានធ្វើ​សកម្មភាព​ស្វែងរក​ការគាំទ្រ តាមរយៈ​ការឃោសនា​អំពី​គោលនយោបាយ និង​កម្មវិធី​នយោបាយ​របស់​គណបក្ស​នយោបាយ​ខ្លួន ក្នុងការ​អភិវឌ្ឍ​ឃុំ សង្កាត់​។

​សកម្មភាព​ឃោសនា​តាមរយៈ​ការជួបប្រជុំ ការចែក​ខិ​ត្ត​បណ្ណ និង​ការចាក់​មេក្រូ​ផ្សព្វផ្សាយ​នៅតែ​ផុលផុស ខណៈ​សកម្មភាព​ហែ​ក្បួន​ត្រូវ​បានរៀបចំ​នៅតាម​ឃុំ សង្កាត់​មួយចំនួន​ផងដែរ​។​

​សេចក្តីប្រកាស​ព័ត៌មាន​បន្តថា ជាក់ស្តែង​នៅ​ខេត្តបន្ទាយមានជ័យ​សម្រាប់​សកម្មភាព​ជួបប្រជុំ ចែក​ខិ​ត្ត​បណ្ណ បិទ​ផ្សាយ​រូបភាព និង​ចាក់​មេក្រូ គណបក្ស​ប្រជាជន​កម្ពុជា បានធ្វើ​សកម្មភាព​ចំនួន​៥៥​ឃុំ​សង្កាត់ គណបក្ស​ភ្លើងទៀន​ចំនួន​ ៣៥ ​ឃុំ​សង្កាត់ គណបក្ស​ខ្មែរ​រួបរួម​ជាតិ​ចំនួន​ ១៨ ​ឃុំ​សង្កាត់ គណបក្ស​ហ្វ៊ុនស៊ិនប៉ិច​ចំនួន​៦​ឃុំ​សង្កាត់ គណបក្ស​ខ្មែរ​ស្រឡាញ់​ជាតិ​ចំនួន​៦​ឃុំ សង្កាត់ ហើយ​គណបក្ស​កែទម្រង់​កម្ពុជា គណបក្ស​កម្ពុជា​និយម គណបក្ស​ឆន្ទៈ​ខ្មែរ​បានធ្វើ​សកម្មភាព​ចំនួន​១​ឃុំ សង្កាត់​។​

​សេចក្តីប្រកាស​ព័ត៌មាន​បានឱ្យដឹងថា ចំពោះ​ការហែក្បួន​គណបក្ស​ភ្លើងទៀន​បានធ្វើ​សកម្មភាព ​៣​ ឃុំ គណបក្ស​ហ្វ៊ុនស៊ិនប៉ិច​បាន​ហែ​ក្បួន​ចំនួន ​១​ ឃុំ និង​គណបក្ស​សញ្ជាតិ​ក​ម្ពុ​ជា បាន​ហែ​ក្បួន​ចំនួន​១​ឃុំ​។​

​ការឃោសនាបោះឆ្នោត​ឃុំ សង្កាត់​គឺមាន​រយៈពេល ១៤ ​ថ្ងៃ ចាប់ពី​ថ្ងៃទី ​២១ ខែឧសភា ដល់​ថ្ងៃទី​ ៣ ខែមិថុនា ខណៈ​ថ្ងៃ​បោះឆ្នោត​នឹង​ប្រព្រឹត្តទៅ​នៅ​ថ្ងៃទី ​៥ ខែមិថុនា​៕​

អត្ថបទគួរចាប់អារម្មណ៍