The Phnom Penh Post Search

Search form




Logo of Phnom Penh Post newspaper Phnom Penh Post - លោក ប្រាក់ សុខុន នៅតែ​សង្ឃឹមថា កម្ពុជា​នឹងចូលរួម​ចំណែក​កសាង​មូលដ្ឋានគ្រឹះ​សន្តិភាព​នៅ​មី​យ៉ាន់​ម៉ា​

លោក ប្រាក់ សុខុន នៅតែ​សង្ឃឹមថា កម្ពុជា​នឹងចូលរួម​ចំណែក​កសាង​មូលដ្ឋានគ្រឹះ​សន្តិភាព​នៅ​មី​យ៉ាន់​ម៉ា​

Content image - Phnom Penh Post
លោក ប្រាក់ សុខុន រដ្ឋមន្ត្រីការបរទេស​កម្ពុជា​។

លោក ប្រាក់ សុខុន នៅតែ​សង្ឃឹមថា កម្ពុជា​នឹងចូលរួម​ចំណែក​កសាង​មូលដ្ឋានគ្រឹះ​សន្តិភាព​នៅ​មី​យ៉ាន់​ម៉ា​

ភ្នំពេញៈ លោក ប្រាក់ សុខុន រដ្ឋមន្ត្រីការបរទេស​កម្ពុជា​នៅតែមាន​សង្ឃឹមថា​ កិច្ចប្រឹងប្រែង​របស់​កម្ពុ​ជា​នឹងចូលរួម​ចំណែក​កសាង​មូលដ្ឋានគ្រឹះ «​ដ៏​រឹងមាំ​» ដើម្បី​ស្វែងរក​សន្តិភាព​ដល់​ប្រទេស​មី​យ៉ាន់​ម៉ា ទោះបី​វិបត្តិ​នៅ​ប្រទេស​នេះ​មាន​លក្ខណៈ​ចាក់​ស្រែះ​ជ្រៅ​ក៏ដោយ​។​

​លោក​បាន​សរសេរ​នៅលើ​ហ្វេ​ស​ប៊ុ​ក ក្រោយពី​បញ្ចប់​កិច្ចប្រជុំ​ដើម្បី​ជូន​ព័ត៌មាន​លើក​ទី​២​ដល់​ក្រុមប្រឹក្សាសន្តិសុខ​អង្គការសហប្រជាជាតិ​ស្តីពី​បញ្ហា​មី​យ៉ាន់​ម៉ា នា​ថ្ងៃទី​២៧ ខែឧសភា ដែល​រហូតមក​ដល់ពេលនេះ​មាន​រយៈពេល​ ៥ ​ខែ បន្ទាប់ពី​លោក​បាន​ជូន​ព័ត៌មាន​លើកដំបូង​កាលពីដើម​ខែមករា​។​

​លោក ប្រាក់ សុខុន ដែលជា​ប្រេសិត​ពិសេស​របស់​ប្រធាន​អាស៊ាន បានសរសេរថា ប្រទេស​មី​យ៉ាន់​ម៉ា​នៅតែ​បន្ត​ប្រឈមមុខ​នឹង​បញ្ហា​ស្មុគស្មាញ​ជាច្រើន ដូចជា​វិបត្តិ​នយោបាយ និង​សេដ្ឋកិច្ច ជំងឺ​រាតត្បាត​កូ​វីដ​១៩ និង​វិបត្តិ​មនុស្សធម៌​ដ៏​ធ្ងន់ធ្ងរ ដោយ​លោក​អះអាងថា​៖ «​យ៉ាងណាក្តី មិនមែន​មានន័យថា​អស់សង្ឃឹម​នោះទេ ដរាបណា​យើង​ទាំងអស់ រួមទាំង​អាស៊ាន​និង​សហគមន៍​អន្តរជាតិ បន្ត​ប្រាស្រ័យ​ទាក់ទង​ជាមួយ​មី​យ៉ាន់​ម៉ា​ប្រកបដោយ​ការស្ថាបនា ផ្ទុយ​ពី​នយោបាយ​ឯកោ​និយម​»​។

​លោក​បន្តថា​៖ «​កម្ពុជា​ទទួលស្គាល់ថា​វិបត្តិ​មី​យ៉ាន់​ម៉ា​គឺមាន​លក្ខណៈ​ចាក់​ស្រែះ​ជ្រៅ​។ ស្របពេល​ដែល​យើង​កំពុង​ប្រឹងប្រែង​អស់ពី​សមត្ថភាព​ក្នុងនាម​ជា​ប្រធាន​អាស៊ាន យើង​នៅតែ​សង្ឃឹមថា​កិច្ចប្រឹងប្រែង​នោះ​នឹងចូលរួម​ចំណែក​កសាង​មូលដ្ឋានគ្រឹះ​ដ៏​រឹងមាំ​មួយ​ដើម្បី​ស្វែងរក​សន្តិភាព ស្ថិរភាព និង​វិបុលភាព​សម្រាប់​ប្រទេស​មី​យ៉ាន់​ម៉ា​ទាំងមូល​»​។​

​រដ្ឋមន្ត្រី​រូបនេះ​អះអាងថា ខណៈពេលដែល​លោក​ទន្ទឹងរង់ចាំ​ដំណើរ​ទស្សនកិច្ច​លើក​ទី​២​ទៅកាន់​ប្រទេស​មី​យ៉ាន់​ម៉ា​នៅពេល​ដ៏​ខ្លី​ខាងមុខនេះ លោក​តែងតែ​គិតពី​ចំណុច​សំខាន់ៗ​ចំនួន​៥ គឺ ទី​១​គឺ​ការបញ្ឈប់​អំពើហិង្សា ទី​២​គឺ​ការចូលរួម​ប្រាស្រ័យ​ទាក់ទង​គ្នា​ក្នុងន័យ​ស្ថាបនា ទី​៣​គឺ​យុទ្ធនា​ការចាក់​វ៉ាក់សាំង​កូ​វីដ ១៩ ទី​៤​គឺ​ជំនួយ​មនុស្សធម៌ និង​ជាពិសេស​ចុងក្រោយ​គឺ​សុទិដ្ឋិនិយម​៕​

អត្ថបទគួរចាប់អារម្មណ៍