ភ្នំពេញៈ រដ្ឋមន្ត្រីក្រសួងការងារ លោក អ៊ិត សំហេង ថ្លែងថា ការបង្កើតការិយាល័យទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិ្តបត្តិការ (SDC) នៅកម្ពុជារយៈពេល ១០ឆ្នាំមកនេះ បានបង្ហាញពីការប្តេជ្ញាចិត្ត និងភាពជាដៃគូដ៏យូរអង្វែងរបស់ SDC ជាមួយកម្ពុជា ដោយលោកចាត់ទុក SDC គឺជាម្ចាស់ជំនួយដ៏សំខាន់មួយដែលបានជួយដល់កម្ពុជាក្នុងការអភិវឌ្ឍសេដ្ឋកិច្ច និងវិស័យផ្សេងទៀត។
លោកលើកឡើងដូច្នេះនាឱកាសខួប ១០ ឆ្នាំនៃការបង្កើតការិយាល័យ SDC នៅកម្ពុជា និងការដាក់ឱ្យដំណើរការកម្មវិធីកិច្ចសហប្រតិបត្តិការស៊្វីសនៅក្នុងតំបន់មេគង្គ ឆ្នាំ២០២២-២០២៥ នាថ្ងៃទី២៧ ខែឧសភា នៅរាជធានីភ្នំពេញ។
លោកថ្លែងថា ការបង្កើតការិយាល័យ SDC នៅកម្ពុជារយៈពេល ១០ ឆ្នាំមកនេះគឺជាការបង្ហាញពីការប្តេជ្ញាចិត្ត និងភាពជាដៃគូដ៏យូរអង្វែងជាមួយកម្ពុជា ហើយលោកបានកោតសរសើរចំពោះប្រទេសស៊្វីស និងប្រជាជនស៊្វីសចំពោះការគាំទ្រ «ដ៏សប្បុរស» ដល់កម្ពុជាលើគ្រប់វិស័យ រួមទាំងវិស័យការងារ និងបណ្តុះបណ្តាលវិជ្ជាជីវៈផងដែរ។
លោក អ៊ិត សំហេង ថ្លែងថា៖ «SDC គឺជាម្ចាស់ជំនួយដ៏សំខាន់មួយដែលបានជួយដល់ប្រទេសកម្ពុជា តាមរយៈគម្រោងផ្សេងៗ ដើម្បីអភិវឌ្ឍសេដ្ឋកិច្ច អភិបាលកិច្ច ការប្រែប្រួលអាកាសធាតុ និងការគ្រប់គ្រងធនធានធម្មជាតិជាដើម»។
លោកបន្ថែមថា ក្រសួងការងាររបស់លោកបានទទួលការគាំទ្រពី SDC លើគម្រោងជាច្រើនរួមទាំងឧបករណ៍បរិក្ខារ បច្ចេកទេស និងហិរញ្ញវត្ថុ។ ប្រទេសស៊្វីស និង SDC បានផ្តល់ជំនួយយ៉ាងច្រើនលើផ្នែកឧបករណ៍បរិក្ខារ បច្ចេកទេស និងហិរញ្ញវត្ថុ ដល់កម្ពុជាទាំងនៅថ្នាក់ជាតិ និងថ្នាក់ក្រោមជាតិ និងបាននាំយកបទពិសោធ ចំណេះដឹង និងបច្ចេកទេសនានាមកជួយដល់កម្ពុជា។
រដ្ឋមន្ត្រីរូបនេះបន្តថា៖ «SDC បាន និងកំពុងធ្វើការជាមួយដៃគូនានាជាច្រើន រួមទាំងរដ្ឋាភិបាល អង្គការក្រៅរដ្ឋាភិបាល វិស័យឯកជន និងដៃគូអភិវឌ្ឍន៍ផ្សេងៗទៀត សម្រាប់ការគាំទ្រប្រទេសកម្ពុជា ឆ្ពោះទៅរកការកាត់បន្ថយភាពក្រីក្រ និងការអភិវឌ្ឍប្រកបដោយចីរភាព និងរួមបញ្ចូល យុទ្ធសាស្ត្ររយៈពេល ៤ឆ្នាំ ស្របតាមផែនការយុទ្ធសាស្រ្តជាអាទិភាពរបស់កម្ពុជា និងឆ្លើយតបទៅនឹងតម្រូវការរបស់ប្រជាជនកម្ពុជា»៕