កំពង់ចាមៈ រដ្ឋបាល​ខេត្ត​កំពង់ចាម ត្រៀម​រៀបចំ​ពិធី​រូប​សំណាក ព្រះឥន្ទ្រ​គង់លើ​ដំរី​ឯរវ័ណ នៅ​លើ​សួនច្បារ​មាត់​ទន្លេ ក្នុង​សង្កាត់​កំពង់ចាម ក្រុង​កំពង់ចាម ហើយ​រដ្ឋបាល​ខេត្ត​គ្រោង​នឹង​ធ្វើ​ពិធី​អភិសេក នា​ពេល​ឆាប់ៗ​ខាង​មុខ។ ទោះ​ជា​យ៉ាង​ណា​ រដ្ឋបាល​ខេត្ត​មិន​បាន​បញ្ជាក់​ពី​ពេលវេលា​ជាក់លាក់​នោះ​ទេ។

លោក អ៊ុន ចាន់ដា អភិបាល​ខេត្ត​កំពង់ចាម​ថ្លែង​ថា នៅ​ព្រឹក​ថ្ងៃ​ទី​២៨ ខែ​ឧសភា ឆ្នាំ ២០២២ នេះ លោក​បាន​ដឹកនាំ​មន្ទីរ អង្គភាព​ជុំវិញខេត្ត អាជ្ញាធរ​មូលដ្ឋាន និង​មន្ត្រី​បច្ចេកទេស ចុះ​ពិនិត្យ​ទីតាំង​ដោយ​ផ្ទាល់ ដើម្បី​ធ្វើការ​រៀបចំ​ប្រារព្ធ​ពិធី​អភិសេក​រូប​សំណាក​ខាងលើ ទៅ​តាមប្រពៃណី​ដ៏ផូរផង់​របស់​ខ្មែរ​យើង​នៅ​ពេល​ខាងមុខ។

លោកបន្តថា រូបសំណាក ព្រះឥន្ទ្រ​គង់​លើ​ដំរីឯរវ័ណ​នេះ គឺជា​ការ​ផ្តួចផ្តើម​កសាង​ឡើង​ដោយ រូបលោក និង​លោក ខ្លូត ផន ប្រធាន​ក្រុមប្រឹក្សា​ខេត្ត និង​ត្រូវ​បាន​សិក្សា​ដោយ​ផ្អែក​លើ​មូលដ្ឋាន​នៃ​រចនាប័ទ្ម​ចម្លាក់​លោត នៃ​រចនាប័ទ្ម​ខ្មែរ​បុរាណ និង​បាន​ធ្វើការ​សំយោគ​រចនាប័ទ្ម ៣បញ្ចូលគ្នា (១) បាពួន (២) អង្គរ និង(៣) បាយ័ន។

ចំណែក​បដិមា​ព្រះឥន្ទ្រ ត្រូវ​បាន​សិក្សា​ដោយ​កំណត់​ទម្រង់​ឥរិយាបថ "សន្តិភាព-ឈ្នះ​ចម្បាំង តំណាង​ឱ្យ​សេចក្តី​ដឹង​គុណ​ចំពោះ"សន្តិភាព" គឺ​បច្ចុប្បន្នភាព​នៃ​ព្រះរាជាណាចក្រ​កម្ពុជា ក្រោម​ការ​ដឹកនាំ​របស់​លោក ហ៊ុន សែន នាយក​រដ្ឋមន្ត្រី​កម្ពុជា​ទទួល​បាន​សុខសន្តិភាព​បរិបូណ៌៕