ភ្នំពេញៈ អ្នកប្រើប្រាស់ និងអ្នកធ្វើការក្នុងវិស័យភ្លើងអគ្គិសនីអះអាងថា ការសន្សំសំចៃថាមពលអគ្គិសនីជារឿងល្អ និងមានប្រយោជន៍ក្នុងការបង្កើនហិរញ្ញវត្ថុក្នុងគ្រួសារ ខណៈយុទ្ធនាការ «ខ្ញុំសន្សំ» លេចមុខឡើងដោយសំអាងថា ខ្លួននឹងផ្តល់វិធីសាស្ត្រងាយៗ ទាក់ទងការសន្សំសំចៃថាមពលអគ្គិសនីជាមួយនឹងការប្រើប្រាស់ឧទាហរណ៍បច្ចេកវិទ្យា ដើម្បីការពារការប្រែប្រួលអាកាសធាតុ។
លោក សេង វីរៈ ជាងភ្លើងអគ្គិសនីម្នាក់នៅរាជធានីភ្នំពេញ ថ្លែងនៅថ្ងៃទី ២៩ ខែឧសភាថា ការសន្សំសំចៃថាមពលអគ្គិសនីជារឿងសំខាន់មួយ ដែលពលរដ្ឋភាគច្រើនតែងចង់បាន ប៉ុន្តែការចង់បាននោះគឺភាគច្រើនមិនសំដៅទៅផ្នែកមួយនៃការចូលរួមការកាត់បន្ថយការប្រែប្រួលអាកាសធាតុនោះទេ គឺពួកគាត់គ្រាន់តែចង់ឱ្យជាងភ្លើងជួយតភ្ជាប់បណ្តាញអគ្គិសនីយ៉ាងណាឱ្យបានត្រឹមត្រូវប៉ុណ្ណោះ។ ការសន្សំសំចៃក្នុងការប្រើប្រាស់ភ្លើងអគ្គិសនីអាចធ្វើបានដោយតភ្ជាប់អំពែរភ្លើងឱ្យបានត្រឹមត្រូវ ដោយប្រៀបធៀបមើលទៅលើឧបករណ៍ប្រើប្រាស់ប្រចាំថ្ងៃក្នុងផ្ទះដូចជា ទូទឹកកក ម៉ាស៊ីនត្រជាក់ កុំព្យូទ័រ ឧបករណ៍បំពងសំឡេង ជាដើម។
លោកថ្លែងថា៖ «ដូចយើងរែកទឹកអ៊ីចឹង ស្មាយើងទទួលបានតែម្ខាង បើដាក់ ២ ទៅវាធ្ងន់ ភ្លើងក៏អ៊ីចឹងដែរ បើយើងចង់ឱ្យវាអស់តិច យើងថ្លឹងថ្លែងទៅដាក់អំពែរភ្លើងឱ្យស៊ីគ្នាជាមួយឧបករណ៍ប្រើប្រាស់ទៅគឺវាអស់តិចទៅតាមហ្នឹងហើយ។ ការសន្សំសំចៃគឺយើងអាចធ្វើបានតែតាមវិធីសាស្ត្រហ្នឹង បើទៅលួចគីឡូភ្លើងកាត់តពីគេអី អាហ្នឹងគេថា យើងចោរហើយ»។
ប្រឡូកក្នុងវិស័យជាងភ្លើងអគ្គិសនី ១៤ ឆ្នាំ លោក សេង វីរៈ ថ្លែងទៀតថា បើមានការផ្សព្វផ្សាយឱ្យមានការយល់ដឹងអំពីវិធីសាស្ត្រសន្សំសំចៃថាមពលភ្លើងអគ្គិសនីបន្ថែមលើនេះទៀតកាន់តែល្អប្រសើរ។ ការចូលរួមថែរក្សាបរិស្ថាន និងការប្រែប្រួល អាកាសធាតុជារឿងសំខាន់ដែលគ្រប់គ្នាត្រូវចូលរួមចំណែក ព្រោះគ្មាននរណាម្នាក់អាចធ្វើការគ្រប់គ្រងតែឯងបានទេក្នុងរឿងនេះ។
លោក សុខ ភាក់ ប្រជាពលរដ្ឋម្នាក់នៅខេត្តត្បូងឃ្មុំ ថ្លែងនៅថ្ងៃទី ២៩ ខែឧសភាថា ការសន្សំសំចៃថាមពលជារឿងល្អមួយ ខណៈការផ្សព្វផ្សាយឱ្យមានការយល់ដឹង និងចូលរួមក្នុងការកាត់បន្ថយការប្រែប្រួលអាកាសធាតុក៏មានជាបន្តបន្ទាប់ ជាក់ស្តែងមានកម្មវិធីបិទភ្លើងអគ្គិសនីទូទាំងពិភពលោក ឬទូទាំងប្រទេស ដើម្បីបរិស្ថានជាដើម ដែលបានរួមចំណែកពញ្ញាក់ស្មារតីឱ្យពលរដ្ឋមានការយល់ដឹងពីការយកចិត្តទុកដាក់ចំពោះបរិស្ថាន និងការប្រែប្រួលអាកាសធាតុ។ លោកថា ការប្រើប្រាស់ថាមពលអគ្គិសនីគឺចាំបាច់ ប៉ុន្តែអ្នកប្រើប្រាស់មិនគួរខ្ជះខ្ជាយពេកទេ។
លោកបានថ្លែងថា៖ «អគ្គិសនីយើងមិនដែលប្រើពេញ ១ ថ្ងៃទេ ជាធម្មតាគឺប្រើពេលយប់ គ្រួសារខ្លះគាត់បើកទាំងយប់ទាំងថ្ងៃ ដែលធ្វើឱ្យខាតខ្ជះខ្ជាយថាមពល អ៊ីចឹងយើងត្រូវគិតឡើងវិញថាការសន្សំសំចៃថាមពលបានរួមចំណែកក្នុងហិរញ្ញវត្ថុគ្រួសារបានច្រើន អ៊ីចឹងពេលណាចាំបាច់ចាំយើងប្រើ»។
លោកស្រី Tina Redshaw ឯកអគ្គរាជទូតចក្រភពអង់គ្លេសប្រចាំកម្ពុជាថ្លែងតាមរយៈសេចក្តីប្រកាសព័ត៌មានពីយុទ្ធនាការ ខ្ញុំសន្សំ ដែលធ្វើឡើងតាមរយៈបណ្តាញសង្គមហ្វេសប៊ុកកាលពីថ្ងៃទី ២៥ ខែឧសភាបានឱ្យដឹងថា ការផ្លាស់ប្តូររបត់ទៅកាន់ថាមពលស្អាតដែលដើរទន្ទឹមគ្នានឹងប្រសិទ្ធភាពថាមពលក្លាយជាវិធីសាស្ត្រដ៏មានប្រសិទ្ធភាពដែលធានានូវសន្តិសុខអាកាសធាតុថាមពល និងភាពរុងរឿងសម្រាប់ប្រទេសកម្ពុជា និងពិភពលោកទាំងមូល។
លោកស្រីបន្តថា សន្និសីទក្រុងប៉ារីសលើកទី ២៦ របស់អង្គការសហប្រជាជាតិស្តីពីការប្រែប្រួលអាកាសធាតុបានទទួលភាពជោគជ័យដ៏ធំមួយនៅក្នុងទីក្រុង ក្លាសហ្គូ ក្នុងខែវិច្ឆិកា ឆ្នាំ ២០២១។ ក្រោយពីភាគីចំនួន ១៩៧ ភាគីបានយល់ព្រមនៅក្នុងកតិកាសញ្ញាអាកាសធាតុទីក្រុងក្លាសហ្គូ មូលមតិគ្នាទៅលើភាពចាំបាច់នៃសកម្មភាពលើអាកាសធាតុ។ ដើម្បីបន្តភាពជោគជ័យមួយនេះនៅក្នុងឆ្នាំ ២០២២ និងឆ្លើយតបនឹងគោលដៅនៃកិច្ចព្រមព្រៀងទីក្រុងប៉ារីស ការផ្លាស់ប្តូរជាសកលក្នុងការប្រើប្រាស់ថាមពលស្អាត និងប្រកបដោយប្រសិទ្ធភាពពិតជាមានការចាំបាច់ខ្លាំងណាស់។
លោកស្រីថា៖ «នៅស្ថានទូតអង់គ្លេសប្រចាំកម្ពុជា ពួកយើងពិតជាមានសេចក្តីរីករាយក្នុងការបន្តការគាំទ្ររបស់យើងទៅលើប្រទេសកម្ពុជាក្នុងការឆ្លើយតបនឹងតម្រូវការសម្រាប់សន្តិសុខថាមពលនៅថ្ងៃនេះ និងនាពេលអនាគត»។
តាមសេចក្តីប្រកាសព័ត៌មានពីយុទ្ធនាការ ខ្ញុំសន្សំ កាលពីថ្ងៃទី ២៥ ខែឧសភា បានឱ្យដឹងថា ស្របតាមការប្តេជ្ញារបស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងការប្រែប្រួលអាកាសធាតុ យុទ្ធនាការលើបណ្តាញសង្គមមួយដែលត្រូវបានគេស្គាល់ថា «ខ្ញុំសន្សំ» ឬ «I Save» ត្រូវបានបង្កើតឡើងក្នុងគោលបំណងលើកកម្ពស់ការយល់ដឹងអំពីប្រសិទ្ធភាពថាមពលតាមរយៈការស្វែងយល់ និងអនុវត្តទម្លាប់ងាយៗ អ្នកប្រើប្រាស់តាមផ្ទះ និងម្ចាស់អាជីវកម្មនឹងអាចកាត់បន្ថយការប្រើប្រាស់ថាមពល ចំណេញថវិកា និងរួមចំណែកបង្កើតបរិស្ថានប្រកបដោយសុខភាព។
យុទ្ធនាការ «ខ្ញុំសន្សំ» ត្រូវបានគាំទ្រដោយការិយាល័យ Foreign Commonwealth and Development Office (FCDO) របស់រដ្ឋាភិបាលចក្រភពអង់គ្លេស ហើយត្រូវបានរៀបចំដោយក្រុមហ៊ុន Carbon Trust ដែលជាផ្នែកមួយនៃកម្មវិធីកាត់បន្ថយកាបូនក្នុងតំបន់អាស៊ាន និងអនុវត្តដោយដៃគូ ដែលរួមមានស៊ីអ៊ិនវេសមិន ដែលជាសហគ្រាសសង្គមផ្តល់ការគាំទ្រដល់សហគ្រាសធុនតូចរបស់សហគ្រិនស្ត្រីនៅក្នុងប្រទេសកម្ពុជា។
កិច្ចផ្តួចផ្តើមមួយនេះមានគោលបំណងពន្លឿនការផ្លាស់ប្តូរក្នុងប្រទេសកម្ពុជា ក្នុងការធន់ទៅនឹងអាកាសធាតុ កាត់បន្ថយការបញ្ចេញឧស្ម័នកាបូនិច និងការអភិវឌ្ឍប្រកបដោយនិរន្តរភាព។ ប្រទេសកម្ពុជាបានប្តេជ្ញាក្នុងការចូលរួមចំណែកកាត់បន្ថយការបំពុលជាសកលទៅតាមលទ្ធភាព និងធនធានរបស់ខ្លួន។ កម្ពុជាក៏បានបង្ហាញពីទស្សនវិស័យ និងយុទ្ធសាស្ត្រដែលជាត្រីវិស័យដឹកនាំប្រទេសទៅកាន់សេដ្ឋកិច្ចដែលមានតុល្យភាពកាបូនទូទាំងប្រទេសនៅត្រឹមឆ្នាំ ២០៥០។
តាមរយៈទំព័ររបស់ខ្លួន «ខ្ញុំសន្សំ» ថា នឹងផ្តល់វិធីសាស្ត្រងាយៗ សាមញ្ញ ក៏ដូចជាព័ត៌មាននានា ដែលអាចឱ្យប្រជាជនតាមផ្ទះ ឬសហគ្រិនអាចប្រើប្រាស់ជាក្បួនណែនាំស្តីពីការប្រើប្រាស់ និងការសម្រេចចិត្តប្រចាំថ្ងៃទាក់ទងនឹងថាមពលមានដូចជា៖ ពន្យល់ពីនិយមន័យនៃប្រសិទ្ធភាពថាមពលជាមួយនឹងឧទាហរណ៍, ពន្យល់ពីសារៈសំខាន់នៃការលាងសម្អាតម៉ាស៊ីនត្រជាក់ និងរបៀបដែលវាអាចកាត់បន្ថយការប្រើប្រាស់ថាមពល, កំណត់អេក្រង់កុំព្យូទ័រទៅជា sleep mode ឬបិទកុំព្យូទ័រឱ្យបានត្រឹមត្រូវពេលមិនប្រើ, ចែករំលែកគន្លឹះក្នុងការសន្សំសំចៃថវិកាតាមរយៈការទិញសម្ភារប្រើប្រាស់ក្នុងផ្ទះ ឬសម្ភារការិយាល័យដែលមានស្លាកសញ្ញាប្រសិទ្ធភាពថាមពល, ប្រើបន្ទះថាមពលឆ្លាតវៃដែលអាចរកឃើញ នៅពេលដែលឧបករណ៍ស្ថិតនៅក្នុង standby mode និងកាត់បន្ថយថាមពល ដើម្បីសន្សំសំចៃការប្រើប្រាស់ថាមពល។
លោក Chris Stephen នាយកនៃក្រុមហ៊ុន Carbon Trust ប្រចាំតំបន់ថ្លែងថា បើទោះបីជាពួកគេមានការចាប់អារម្មណ៍លើការសន្សំថាមពលក៏ដោយ ក៏កង្វះព័ត៌មានដែលទាក់ទងនឹងប្រសិទ្ធភាពថាមពលនៅតែជាបញ្ហាចោទ៕