.jpg)
រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង ថ្លែងនាពេលកន្លងទៅ។ ហេង ជីវ័ន
ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានប្រកាសឱ្យម្ចាស់ ឬនាយករោងចក្រ សហគ្រាសដែលស្ថិតក្នុងដែនអនុវត្តនៃច្បាប់ស្តីពីការងារត្រូវប្រកាសអធិការកិច្ចការងារក្នុងប្រព័ន្ធស្វ័យប្រវត្តិកម្មឱ្យបានមុនដំណាច់ខែមិថុនា និងមុនដំណាច់ខែធ្នូនៃឆ្នាំនីមួយៗ។
ការលើកឡើងរបស់លោក អ៊ិត សំហេង ដូចនេះបានធ្វើឡើងតាមរយៈសេចក្តីជូនដំណឹងកាលពីថ្ងៃទី ២៧ ខែឧសភាស្តីពីការអនុវត្តរបបស្វ័យប្រកាសអធិការកិច្ចការងារតាមប្រព័ន្ធស្វ័យប្រវត្តិកម្ម។
លោកបានបញ្ជាក់ថា៖ «ម្ចាស់ ឬនាយករោងចក្រសហគ្រាសដែលស្ថិតក្នុងដែនអនុវត្តនៃច្បាប់ស្តីពីការងារឱ្យមានកាតព្វកិច្ចស្វ័យប្រកាសអធិការកិច្ចការងារក្នុងប្រព័ន្ធស្វ័យប្រវត្តិកម្មចំនួន ២ លើកក្នុង ១ ឆ្នាំគឺលើកទី ១ ឱ្យបានមុនដំណាច់ខែមិថុនា និងលើកទី ២ ឱ្យបានមុនដំណាច់ខែធ្នូនៃឆ្នាំនីមួយៗតាមរយៈគេហទំព័រ៖ https://sicms.mlvt.gov.kh ចាប់ពីថ្ងៃទី ១ ខែមិថុនា ឆ្នាំ ២០២២»។
លោករដ្ឋមន្ត្រីបានបន្ថែមទៀតថា ក្នុងរបាយការណ៍ស្វ័យប្រកាសអធិការកិច្ចការងារមានចំណុចអាទិភាពចំនួន ៣១ ដែលមានកំណត់នៅក្នុងលិខិតដាក់កំហិតរបស់អធិការការងារ ម្ចាស់ ឬនាយករោងចក្រ សហគ្រាសត្រូវអនុវត្តឱ្យខាងតែបានតាមលិខិតដាក់កំហិតនេះ។ ក្នុងករណីល្មើសនឹងចំណុចអាទិភាពណាមួយ នឹងត្រូវទទួលរងការផាកពិន័យភ្លាមៗពីអធិការការងារយោងតាមច្បាប់ និងបទប្បញ្ញត្តិជាធរមាន។
ជាមួយគ្នានេះដែរ លោកក៏បានក្រើនរំឭកដល់ម្ចាស់ ឬនាយករោងចក្រ សហគ្រាសផងដែរពីការចាក់វ៉ាក់សាំងកូវីដ-១៩ ដែលជាផ្នែកមួយនៃលក្ខខណ្ឌសុវត្ថិភាព និងសុខភាពការងារនៅតាមរោងចក្រ សហគ្រាស។
លោក អ៊ិត សំហេង បន្តថា៖ «ដូច្នេះ លោកអ្នកត្រូវបន្តសហការជាមួយអាជ្ញាធរមូលដ្ឋានរាជធានី ខេត្ត និងមន្ទីរការងារ និងបណ្តុះបណ្តាលវិជ្ជាជីវៈរាជធានីខេត្ត ដើម្បីជំរុញ និងរៀបចំចាក់វ៉ាក់សាំងដូសជំរុញជូនកម្មករនិយោជិតនៅតាមរោងចក្រសហគ្រាសដោយអាចបន្តដំណើរការផលិតកម្ម/អាជីវកម្មតាមធម្មតា»។
សេចក្តីជូនដំណឹងបានបញ្ជាក់ថា អធិការការងារនឹងចុះធ្វើអធិការកិច្ចការងារ ជាពិសេស ដើម្បីត្រួតពិនិត្យទិន្នន័យកម្មករនិយោជិតចាក់វ៉ាក់សាំងកូវីដ-១៩។ ក្នុងករណីម្ចាស់ ឬនាយករោងចក្រ សហគ្រាសមិនបានធ្វើរបាយការណ៍ស្វ័យប្រកាសអធិការកិច្ចការងារ តាមកាលកំណត់ និងមិនព្រមអនុវត្តតាមនឹងត្រូវទទួលការពិន័យ ឬផ្តន្ទាទោសតាមច្បាប់ និងការចាត់វិធានការតាមផ្លូវច្បាប់ពីក្រសួង។
បើតាមប្រកាសស្តីពីការដាក់ឱ្យដំណើរការរបបស្វ័យប្រកាសអធិការកិច្ចការងារ និងធ្វើអធិការកិច្ចការងារតាមប្រព័ន្ធស្វ័យប្រវត្តិកម្មរបស់ក្រសួងការងារកាលពីថ្ងៃទី ៣០ ខែធ្នូ ឆ្នាំមុន បានឱ្យដឹងថា អធិការការងារនឹងធ្វើអធិការកិច្ច ការងារសាមញ្ញតែ ១ លើកនៅក្នុង ១ ឆ្នាំ នៅតាមរោងចក្រ សហគ្រាស លើកលែងតែអធិការកិច្ចការងារ ពិសេសតាមដានការដាក់កំហិត តាមបណ្តឹង ឬទទួលបានព័ត៌មានអំពីការរំលោភច្បាប់ និងលិខិតបទដ្ឋានគតិយុត្តពាក់ព័ន្ធនានា៕
