ភ្នំពេញៈ ការបង្កបង្កើនស្រូវរដូវវស្សាឆ្នាំនេះមានសម្ទុះយឺតជាងឆ្នាំមុន ដោយសារតំបន់មួយចំនួនមានភ្លៀងធ្លាក់ជោកជាំខ្លាំងពេកតាំងពីដើមរដូវ បណ្ដាលឱ្យជន់លិចដីស្រែមិនអាចធ្វើការភ្ជួររាស់ ដាំដុះស្រូវបាន។ ទន្ទឹមនឹងនេះ ជំនន់ទឹកភ្លៀងក៏បានបង្កផលប៉ះពាល់ និងខូចខាតស្រូវដើមរដូវវស្សារបស់ប្រជាកសិករសរុបជាង ១ ម៉ឺនហិកតា។ នេះបើយោងតាមសារាចរណែនាំរបស់ក្រសួងកសិកម្ម ស្ដីពីការថែទាំស្រូវរដូវវស្សាឆ្នាំ ២០២២។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានគូសបញ្ជាក់នៅក្នុងសារាចរណែនាំនោះកាលពីថ្ងៃទី ២៧ ខែឧសភា ថា គិតត្រឹមថ្ងៃទី ២៥ ខែឧសភា ឆ្នាំ ២០២២ កសិករសម្រេចដាំដុះដំណាំស្រូវវស្សាបានចំនួន ៥០២ ៧៩៩ ហិកតា ស្មើនឹង ១៩,១៩% នៃផែនការ ២ ៦១៩ ៥០០ ហិកតា ក្នុងនោះស្រូវស្រាលចំនួន ៣១៧ ៦៦៣ ហិកតា ស្រូវកណ្តាលចំនួន ៩៩ ៣១១ ហិកតា ស្រូវធ្ងន់ចំនួន ៧៩ ០៤៥ ហិកតា ស្រូវចម្ការចំនួន ៦៣៧ ហិកតា និងស្រូវឡើងទឹកចំនួន ៦១៤៣ ហិកតា។ ប៉ុន្តែតួលេខនេះ នៅមានភាពយឺតយ៉ាវជាងឆ្នាំមុន បើប្រៀបធៀបទៅនឹងសម្ទុះការងារដាំដុះស្រូវរដូវវស្សាក្នុងរយៈពេលដូចគ្នានេះ ព្រោះតំបន់មួយចំនួនលិចទឹកជោកជាំខ្លាំងពេក មិនអាចភ្ជួររាស់កើត។
លោកបានបន្តថា មិនត្រឹមតែធ្វើឱ្យការងារដាំដុះស្រូវរដូវវស្សាមានភាពយឺតយ៉ាវនោះទេ ភ្លៀងធ្លាក់ជាបន្តបន្ទាប់នាដើមរដូវវស្សានេះបានបង្កជាជំនន់ទឹកភ្លៀង ជន់លិចប៉ះពាល់ស្រូវដើមរដូវវស្សារបស់ប្រជាកសិករក្នុងខេត្តបន្ទាយមានជ័យ និងខេត្តត្បូងឃ្មុំសរុប ៦ ០១៦ ហិកតា និងខូចខាតចំនួន ៣ ៥១៣ ហិកតា ក្នុងនោះខេត្តបន្ទាយមានជ័យមានផ្ទៃដីប៉ះពាល់ចំនួន ៤ ៦៦៤ ហិកតា និងខូចខាតចំនួន ២ ៣៨០ ហិកតា និងខេត្តត្បូងឃ្មុំមានផ្ទៃដីប៉ះពាល់ចំនួន ១ ៣៣៧ ហិកតា និងផ្ទៃដីខូចខាតចំនួន ១ ១៣៣ ហិកតា។
ដើម្បីធានាបាននូវសន្តិសុខស្បៀង និងឈានទៅសម្រេចបានតាមគោលនយោបាយជំរុញផលិតកម្មស្រូវ និងការនាំចេញអង្កររបស់រាជរដ្ឋាភិបាល ជាពិសេសដើម្បីឱ្យលទ្ធផលនៃការងារបង្កបង្កើនផលសម្រេចបានល្អប្រសើរទៅតាមផែនការគ្រោងទុក និងក្នុងស្ថានភាពដែលមានការគំរាមកំហែងដោយជំនន់ទឹកភ្លៀងនេះផងនោះ លោក វេង សាខុន បានណែនាំឱ្យកសិករយកចិត្តទុកដាក់ពិនិត្យស្រែ និងត្រៀមលក្ខណៈរៀបចំដីស្រែ ជាពិសេសត្រូវបិទភ្លឺ និងបូមទឹកចេញពីក្នុងស្រែ ក្នុងករណីមានការលិចលង់ដោយជំនន់ទឹកភ្លៀងនៅដើមរដូវ។ សម្រាប់ប្រជាកសិករនៅតំបន់ខ្ពស់ ដែលដាំដុះស្រូវរដូវវស្សាដោយពឹងផ្អែកលើទឹកភ្លៀង និងមានទម្លាប់ដាំដុះក្នុងខែកក្កដា ឬខែសីហាត្រូវប្រញាប់ប្រញាល់ភ្ជួររាស់ដីដាំដុះពីពេលនេះទៅ ព្រោះឆ្នាំនេះមិនមានកូនរដូវប្រាំងនោះទេ។
លោកបានជំរុញដល់មន្ត្រីជំនាញតាមអង្គភាពក្រោមឱវាទនៃក្រសួង មន្ទីរកសិកម្ម រុក្ខាប្រមាញ់ និងនេសាទ រាជធានី-ខេត្តទាំងអស់ត្រូវចុះពិនិត្យណែនាំផ្ដល់បច្ចេកទេសថែទាំដំណាំស្រូវ ដូចជាការប្រើប្រាស់ជីបំប៉ន ថ្នាំកសិកម្ម និងការគ្រប់គ្រងសមាសភាពចង្រៃឱ្យបានទាន់ពេលវេលា និងមានប្រសិទ្ធភាព ជាពិសេសត្រូវចុះពិនិត្យ និងវាយតម្លៃផលប៉ះពាល់ និងការខូចខាតដំណាំស្រូវដោយសារជំនន់ទឹកភ្លៀងឱ្យបានច្បាស់លាស់ ដោយត្រូវសហការជាមួយស្ថាប័នពាក់ព័ន្ធ និងអាជ្ញាធរមូលដ្ឋានសំដៅជួយអន្តរាគមន៍ដល់កសិករក្រីក្រ និងអ្នកងាយរងគ្រោះដែលខ្វះលទ្ធភាព រកគ្រាប់ពូជស្រូវមកដាំដុះស្ដារឡើងវិញ ដើម្បីលើកសំណើសុំមកគណៈកម្មាធិការប្រព័ន្ធស្បៀងបម្រុងកម្ពុជា (ប.ស.ប.ក)។
លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃុំបានប្រាប់ភ្នំពេញប៉ុស្តិ៍ថា គិតមកទល់ថ្ងៃទី ២៩ ខែឧសភានេះ ប្រជាកសិករនៅទូទាំងខេត្តត្បូងឃ្មុំបានធ្វើការដាំដុះស្រូវដើមរដូវវស្សាបានប្រមាណ ៤១ ភាគរយនៃផែនការ ៣១ ០០០ ហិកតា។ ប៉ុន្តែផ្ទៃដីចំនួន ២ ៤៧១ ហិកតា ក្នុងចំណោមផ្ទៃដីដែលដាំដុះស្រូវដើមរដូវវស្សារួចប្រមាណ ៤១ ភាគរយនេះបានរងផលប៉ះពាល់ និងខូចខាតដោយគ្រោះជំនន់ទឹកភ្លៀង។
លោកថ្លែងថា៖ «នៅពេលនេះ ក្រុមការងារយើងកំពុងចុះពិនិត្យ និងស្រង់ទិន្នន័យបន្ថែមពីផលប៉ះពាល់ និងខូចខាតដំណាំស្រូវដើមរដូវវស្សានេះ ដើម្បីធ្វើការវាយតម្លៃ និងលើកសំណើទៅគណៈកម្មាធិការប្រព័ន្ធស្បៀងបម្រុងកម្ពុជា សុំគ្រាប់ស្រូវពូជសម្រាប់ផ្ដល់ជូនដល់កសិករក្រីក្រខ្វះលទ្ធភាព ដើម្បីដាំស្ដារឡើងវិញ»។
លោក ពិសិដ្ឋ ថា ដំណាំស្រូវដែលកំពុងរងផលប៉ះពាល់ និងខូចខាតដោយគ្រោះជំនន់ទឹកភ្លៀង នៅពេលនេះមាននៅក្នុងស្រុកចំនួន ៤ គឺ ស្រុកពញាក្រែក ត្បូងឃ្មុំ តំបែរ និងស្រុកអូររាំងឪ។ ក្រៅពីការងារចុះត្រួតពិនិត្យប្រមូលទិន្នន័យពីផលប៉ះពាល់ និងខូចខាតដោយគ្រោះជំនន់ទឹកភ្លៀង ក្រុមការងារបានណែនាំដល់កសិករ ដែលនៅតំបន់ខ្ពស់ធ្វើការរៀបចំភ្ជួររាស់ ពង្រាបដីស្រែឱ្យស្មើ និងលើកភ្លឺស្រែឱ្យបានត្រឹមត្រូវ ដើម្បីងាយស្រួលរក្សាទឹកទុក និងកាត់បន្ថយការចំណាយទៅលើថ្លៃជី និងថ្នាំគីមីកសិកម្ម។
លោកថ្លែងថា៖ «ការរៀបចំដីស្រែបានល្អ មិនគ្រាន់តែអាចកាត់បន្ថយនូវហានិភ័យពីគ្រោះជំនន់ទឹកភ្លៀងទេ ថែមទាំងអាចជួយកាត់បន្ថយថ្លៃជី និងថ្នាំគីមីកសិកម្មផងដែរ ខណៈជី និងថ្នាំកសិកម្មកំពុងឡើងថ្លៃ»។
លោក ម៉ក់ សារុន អាយុ ៦៨ ឆ្នាំ ជាប្រជាកសិករនៅភូមិបត់ទន្លា ឃុំកណ្ដោលជ្រុំ ស្រុកពញាក្រែក ខេត្តត្បូងឃ្មុំបាននិយាយថា មិនថា តែជី និងថ្នាំកសិកម្មទេដែលឡើងថ្លៃ សូម្បីតែថ្លៃភ្ជួរដីក៏គេឡើងថ្លៃដែរឥឡូវនេះ ព្រោះគេអះអាងថា ប្រេងវាឡើងថ្លៃ។
លោក សារុន ដែលអះអាងថា ទើបតែខូចខាតស្រូវពង្រោះដើមរដូវវស្សាឆ្នាំនេះអស់ ៣ ហិកតា ដោយសារជំនន់ទឹកភ្លៀងបាននិយាយថា៖ «នៅរដូវវស្សាឆ្នាំនេះ ខ្ញុំនឹងអ្នកភូមិខំតែអរ ព្រោះឃើញមានភ្លៀងតាំងពីដើមរដូវ ដឹងអីមេឃភ្លៀងឥតឈប់។ ឥឡូវខូចស្រូវឯងអស់ ៣ ហិកតា ហើយមិនខូចតែខ្ញុំទេ គឺអ្នកភូមិទាំងអស់ជាង ៣០០ គ្រួសារ ក្នុង ១ គ្រួសារខូចស្រូវអស់តិចបំផុតក៏កន្លះហិកតាដែរ»។ នៅពេលនេះ ជំនន់ទឹកភ្លៀងកំពុងលិចដីស្រែ៕
វីដេអូ៖