កំពង់ធំៈ នគរបាល​នឹង​បញ្ជូន​បុរស​សង្ស័យ​ម្នាក់​ទៅ​សាលាដំបូង​ខេត្ត​នៅ​ថ្ងៃទី​ ៣០ ឧសភា​បន្ទាប់ពី​ចាប់ខ្លួនបាន​ ២​ ថ្ងៃ​ពាក់ព័ន្ធ​ករណី​រឹតក​សម្លាប់​ក្មេងស្រី​អាយុ​ ១៣​ ឆ្នាំ​ម្នាក់ ដោយសារ​តែមាន​គំនុំ​ជាមួយ​ឪពុកម្តាយ​ក្មេងរងគ្រោះ​ប្រព្រឹត្ត​នៅ​ភូមិ​ចំបក់​ជ្រុំ ឃុំ​ប្រាសាទ ស្រុក​សន្ទុក កាលពី​ថ្ងៃ​ទី​ ២៧ ឧសភា​។

លោក​ ទិត្យ សំណាង ស្នងការរង​ទទួល​ផែន​ការងារ​ព្រហ្មទណ្ឌ ខេត្ត​កំពង់ធំ​ឱ្យដឹង​នៅ​ថ្ងៃទី​ ២៩ ឧសភា ថា ជនសង្ស័យ​ឈ្មោះ បួន យ៉ិក ភេទ​ប្រុស អាយុ ២៦ ឆ្នាំ រីឯ​ក្មេងស្រី​រងគ្រោះ​ឈ្មោះ​ សារីន ភ័ត្រា អាយុ ១៣​ ឆ្នាំ និង​មាន​សតិ​មិន​គ្រប់​។ ពួកគេ​រស់នៅ​ភូមិ​ផ្លុង ឃុំ​ទីពោ ស្រុក​សន្អុក ។

លោក​ថា​៖ «​ជនសង្ស័យ​យើង​ទើប​ចាប់បាន​ម្សិលមិញ​ (​ថ្ងៃទី ​២៨​ ឧសភា​)​ យើង​បញ្ជូន​គាត់​ទៅ​​តុលាការ​នៅ​ថ្ងៃ​ ៣០ ឧសភា​»​។

លោក​បាន​រៀបរាប់​តាម​ម្តាយ​ក្មេងរងគ្រោះ​ថា កាលពី​ព្រឹក​ថ្ងៃទី ​២៧ ឧសភា គាត់​បាន​បាត់​កូន​ហើយ​បានមក​ប្តឹង​ផ្ទាល់មាត់​នៅ​អធិការដ្ឋាន​នគរបាល​ស្រុក​។ ពេលនោះ​នគរបាល​បាន​ចាត់ចែង​ស្រាវជ្រាវ​រហូត​ដឹងថា គេ​បានឃើញ​ឈ្មោះ បួន យ៉ិក បាន​ឌុប​ក្មេងរងគ្រោះ​តាម​ម៉ូតូ​។ ក្រោយពី​បាន​តម្រុយ​មក​ទើប​កម្លាំង​សមត្ថកិច្ច​បាន​ស្រាវជ្រាវ​រក​ជនសង្ស័យ​ឃើញ​នៅ​ថ្ងៃទី ​២៨ ឧសភា នៅក្នុង​ភូមិ​ដែល​គេ​កំពុង​រស់នៅ ហើយ​សមត្ថកិច្ច​បាន​ហៅ​ជនសង្ស័យ​ទៅ​សាកសួរ​នៅ​អធិការដ្ឋាន​នគរបាល​ស្រុក​សន្ទុក​។

នៅពេល​សមត្ថកិច្ច​សាកសួរ​ជនសង្ស័យ​បាន​ឆ្លើយ​សារភាព​ថា ខ្លួន​ពិតជា​ឌុប​ក្មេងរងគ្រោះ​ទៅ​កន្លែង​ស្ងាត់​ក្បែរ​មាត់​ស្ទឹង​កំពង់ថ្ម​ហើយ​បាន​ដោះអាវ​ដែល​ពាក់​នៅ​ខ្លួន​របស់គេ​រឹតក​រហូតដល់​ដាច់ខ្យល់​ស្លាប់​។ បន្ទាប់ពី​សម្លាប់​រួច រូបគេ​បាន​យក​ការុង​ពណ៌​ស​ច្រក​ក្មេងរងគ្រោះ​ហើយ​ចង​មាត់​ការុង​ដឹក​យកទៅ​បោះ​ចូល​ទៅក្នុង​ទឹកស្ទឹង​កំពង់ថ្ម និង​បាន​ជិះ​ម៉ូតូ​ត្រឡប់​មកផ្ទះ​វិញ​រហូតដល់​ថ្ងៃទី​ ២៨ ​ឧសភា ក៏ត្រូវ​សមត្ថកិច្ច​ចាប់ខ្លួន​។ ចំពោះ​មូលហេតុ​សម្លាប់​នោះ ដោយសារ​តែ​គេ​ខឹង​មាន​ទំនាស់​ពាក្យសម្តី​ជាមួយ​ឪពុកម្តាយ​ក្មេងស្រី ហើយ​ក៏​ចង់​សងសឹក​មិនដឹង​ជា​ធ្វើ​អ្វី​កើត​ក៏​សម្លាប់​កូន​របស់​ពួកគាត់​ទៅ​៕