ភ្នំពេញៈ លោកនាយករដ្ឋមន្ត្រី ហ៊ុន សែន បានបញ្ជាក់ថា កម្ពុជានឹងមិនដាក់ខ្លួន ជាកូនបំណុលរបស់អ្នកណាមួយទេ ហើយចិនក៏មិនមែនជាប្រទេសតែមួយគត់ ដែលកម្ពុជាខ្ចីប្រាក់ ដែលនឹងធ្វើឱ្យកម្ពុជាជាប់អន្ទាក់បំណុលរបស់សាធារណរដ្ឋប្រជាមានិតចិននោះទេ ហើយចិនក៏គ្មានបំណងដាក់កម្ពុជាជាអន្ទាក់បំណុលរបស់ចិនដែរ។
លោក ហ៊ុន សែន បានថ្លែងដូចនេះជាការឆ្លើយតបនឹងសំណួរក្នុងសន្និសីទអន្តរជាតិលើកទី ២៧ ស្តីពីអនាគតរបស់អាស៊ីនាថ្ងៃសុក្រតាមប្រព័ន្ធអនឡាញ ដែលរៀបចំឡើងនៅទីក្រុងតូក្យូប្រទេសជប៉ុនរយៈពេល ២ ថ្ងៃ គឺនៅថ្ងៃទី ២៦-២៧ ខែឧសភា ឆ្នាំ ២០២២។ លោកមានប្រសាសន៍ថា៖ «អ្វីដែលយើងខ្ញុំខ្ចី យើងមានការប្រុងប្រយ័ត្នខ្លួនឯង យើងខ្ញុំមានច្បាប់ទាក់ទងនឹងការខ្ចីបុល ហើយបើគិតមកដល់ពេលនេះ ពិតានសម្រាប់ការខ្ចីរបស់យើង ដែលគេអនុញ្ញាតឱ្យខ្ចីរហូតដល់ ៤០% នៃផលិតផលក្នុងស្រុក យើងខ្ញុំទើបនឹងខ្ចី ២៣% ប៉ុណ្ណោះ ដែលនៅសេសសល់ទំហំសម្រាប់ការខ្ចីបន្តទៀត»។ លោក ហ៊ុន សែនបញ្ជាក់ដែរថា កម្ពុជាមិនមែនចេះតែខ្ចីដោយមិនបានគិតគូរអំពីស្ថានភាពបំណុលដែលយើងអាចដោះស្រាយបាននោះទេ។ ដូច្នេះលោកមិនយល់ថា សាធារណរដ្ឋប្រជាមានិតចិននឹងដាក់អន្ទាក់កម្ពុជាតាមរយៈការផ្តល់ហិរញ្ញប្បទានឱ្យកម្ពុជានោះទេ ហើយលោកក៏មិនគិតដែរថា ជប៉ុនដាក់អន្ទាក់កម្ពុជាលើបញ្ហាការខ្ចីបុលពីជប៉ុនសម្រាប់ការអភិវឌ្ឍវិស័យហេដ្ឋារចនាសម្ព័ន្ធ នោះដែរ។
លោក ហ៊ុន សែនថា៖ «ខ្ញុំសុំបញ្ជាក់ថា កម្ពុជានឹងមិនដាក់ខ្លួនទៅជាកូនបំណុលរបស់អ្នកណាមួយនោះទេ ព្រោះយើងមិនអាចខ្ចីតែពីចិនតែមួយទេ គឺយើងអាចខ្ចីពីជប៉ុន កូរ៉េ ធនាគារអភិវឌ្ឍន៍អាស៊ី ធនាគារពិភពលោក និងខ្ចីពីធនាគារអឺរ៉ុបផងដែរ»។
ជាមួយគ្នានេះដែរ លោកក៏បានបញ្ជាក់ផងដែរថា វាច្បាស់ណាស់ ចិនបានផ្តល់ជាមូលដ្ឋានសម្រាប់កម្ពុជា ដែលនេះជាបញ្ហាពិតប្រាកដ ហើយលោកក៏បានលើកឡើងផងដែរកាលពីឆ្នាំមុនថា បើលោកមិនពឹងចិន តើឱ្យលោកពឹងអ្នកណា? លោកបានថ្លែងថា៖ «នេះជាសម្ដីពិតរបស់ខ្ញុំ ហើយខ្ញុំសុំបញ្ជាក់យ៉ាងដាច់ណាត់ថា យើងខ្ញុំមិនអាចក្លាយទៅជាកូនបំណុលតែមួយគត់ ហើយជាអន្ទាក់បំណុល ដែលចិនត្រូវដាក់ ហើយចិនក៏គ្មានបំណងដាក់កម្ពុជាជាអន្ទាក់បំណុលរបស់ចិននោះដែរ»។
ប្រធានវិទ្យាស្ថានប្រជាធិបតេយ្យកម្ពុជាលោក ប៉ា ចន្ទរឿន ថ្លែងនៅថ្ងៃទី ២៩ ឧសភាថា កម្ពុជាជាប្រទេសដែលកំពុងអភិវឌ្ឍន៍ដែលត្រូវការនូវធនធានគ្រប់ប្រភេទ ដោយរួមទាំងធនធានផ្នែកហិរញ្ញវត្ថុក្នុងទម្រង់ជាប្រាក់កម្ចីជាដើម ដើម្បីយកមកអភិវឌ្ឍប្រទេស ប៉ុន្តែកម្ពុជាត្រូវមានការប្រយ័ត្នប្រយែងក្នុងការខ្ចីបុលនេះ។ លោកបានថ្លែងថា៖ «ការប្រយ័ត្នប្រយែងនេះ ដើម្បីធានាថា បំណុល កម្ចីដែលយើងយកមកនេះនឹងមិនក្លាយជាអន្ទាក់វ័ណ្ឌក សម្រាប់ប្រទេសជាតិយើង ដែលមិនត្រឹមតែមិនអាចជួយអភិវឌ្ឍសង្គមជាតិយើងឱ្យទៅមុខទេ តែបែរជាវាអាចក្លាយទៅជាសម្ពាធ ឬក៏ជាមហន្តរាយសម្រាប់សង្គមទាំងមូល»។
លោក ប៉ា ចន្ទរឿន បន្ថែមថា កម្ពុជាត្រូវតែបញ្ចៀសឱ្យបានក្នុងការដែលអាចធ្លាក់ចូលទៅក្នុងអន្ទាក់បំណុលរបស់ប្រទេសណាមួយ រួមទាំងប្រទេសចិនផងដែរ ដើម្បីកុំឱ្យកើតមានមហន្តរាយ ឬក៏ការប្រឈមស្អេកស្កះដូចប្រទេសមួយចំនួននៅក្នុងពិភពលោកដែលកំពុងតែមានការលំបាកនៅក្នុងការសងបំណុលរបស់ចិន និងទាំងការដោះស្រាយបញ្ហាចាក់ស្រែះនៅក្នុងសង្គមរបស់ខ្លួនដែលខ្ចីបុលពីបរទេសហួសប្រមាណ៕