ភ្នំពេញៈ ​បុរស​ម្នាក់​ដែល​អារក​សម្លាប់​ប្រពន្ធ ពីព្រោះ​តែ​រឿង​ប្រចណ្ឌ​ដែល​គ្មាន​ភ័ស្តុតាង​នៅ​សង្កាត់​បឹងកក់​ទី​ ១ ខណ្ឌ​ទួលគោក​កាលពី​យប់​ថ្ងៃទី​ ២៧ ឧសភា ហើយ​ត្រូវ​ចាប់ខ្លួន​បាន​ ១​ ថ្ងៃ​ក្រោយមក​នោះ​នឹងត្រូវ​សមត្ថកិច្ច​នគរបាល​បញ្ជូន​ទៅ​តុលាការ​នៅ​ថ្ងៃទី​ ៣០ ឧសភា ។

លោក​ សាន សុខសីហា អ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញ​ឱ្យដឹង​នៅ​ថ្ងៃទី​ ២៩ ​ឧសភា​ថា ជនសង្ស័យ​ឈ្មោះ ភួង រដ្ឋា អាយុ ២៧​ ឆ្នាំ ត្រូវ​កម្លាំង​ជំនាញ​ព្រហ្មទណ្ឌ​នៃ​ស្នងការដ្ឋាន​នគរបាល​រាជធានី​ភ្នំពេញ​កសាង​សំណុំរឿង​បញ្ជូនទៅ​សាលា​ដំបូង​រាជធានី​ភ្នំពេញ​នៅ​ថ្ងៃទី​ ៣០​ ឧសភា​។ ជនសង្ស័យ​ពាក់ព័ន្ធ​បទល្មើស​អារក​សម្លាប់​ប្រពន្ធ​របស់ខ្លួន​។ លោក​ថ្លែងថា​៖ «​ករណី​ជនសង្ស័យ​ម្នាក់នេះ កម្លាំង​សមត្ថកិច្ច​ត្រូវ​ចាប់បញ្ជូន​បន្ត​ទៅ​សាលាដំបូង​រាជធានី​ភ្នំពេញ​ប្រហែល​នៅ​ថ្ងៃ​ចន្ទ ពេលព្រឹក​ស្អែក​ (៣០ ​ឧសភា​)​។ តែ​នៅថ្ងៃនេះ​(​ថ្ងៃទី​ ២៩ ​ឧសភា​) ​កម្លាំង​ជំនាញ​កំពុងធ្វើការ​សាកសួរ​បន្ថែម​បន្តិចទៀត​សិន​»​។

លោក អេង សោភា នាយការិយាល័យ​ព្រហ្មទណ្ឌ​កម្រិតធ្ងន់​នៃ​ស្នងការដ្ឋាន​នគរបាល​រាជធានី​ភ្នំពេញ​ប្រាប់​នៅ​ថ្ងៃទី​ ២៩​ ឧសភា​ថា ការចាប់ខ្លួន​ជនសង្ស័យ​ឈ្មោះ ភួង រដ្ឋា រូបនេះ​គឺ​នៅវេលា​ម៉ោង​ប្រមាណ​ ៣ ​រសៀល ថ្ងៃទី​ ២៨ ​ឧសភា ឆ្នាំ ២០២២ នៅ​ចំណុច​មុខ​អធិការដ្ឋាន នគរបាល​ខណ្ឌ​ព្រែកព្នៅ​។ ការស្រាវជ្រាវ​ចាប់ខ្លួន​ជនសង្ស័យ​ក៏​ទទួលបាន​ការណែនាំ​ពី​លោក​ឧត្តមសេនីយ៍ឯក ស ថេត អគ្គស្នងការរង និង​ជា​ស្នងការ​នគរបាល​រាជធានី​ភ្នំពេញ និង​លោក​ឧត្តមសេនីយ៍​ទោ សុង លី ស្នងការរង​ទទួល​ផែន​ការងារ​ព្រហ្មទណ្ឌ​សហការ​ជាមួយ​នាយកដ្ឋាន​ព្រហ្មទណ្ឌ ក្រសួង​មហាផ្ទៃ ស្នងការដ្ឋាន​នគរបាល​ខេត្ត​តាកែវ​រួមទាំង​អធិការដ្ឋាន​នគរបាល​ខណ្ឌទួលគោក អធិការដ្ឋាន​នគរបាល ខណ្ឌ​ព្រែកព្នៅ​ផងដែរ​។

ទោះយ៉ាងណា​លោក សោភា មិនបាន​បញ្ជាក់​លម្អិត​ពី​ដំណើរ​រឿង​យ៉ាងណា​នោះទេ ក៏ប៉ុន្តែ​បើតាម​ឃ្លីប​វីដេអូ​មួយ គឺ​ជនសង្ស័យ ភួង រដ្ឋា បាន​ឆ្លើយ​ប្រាប់​សមត្ថកិច្ច​ក្រោយ​ចាប់ខ្លួន​ថា មូលហេតុ​ដែល​សម្លាប់​ប្រពន្ធ គឺ​ដោយសារ​គាត់​ប្រចណ្ឌ​ហើយ​មុន​អារក​សម្លាប់​នាង​គឺ​គាត់​មិនបាន​វាយដំនាង​ទេ​។

ជនសង្ស័យ​ប្រាប់​សមត្ថកិច្ច​ថា​៖ «​ខ្ញុំ​ប្រចណ្ឌ​ព្រោះ​ខ្ញុំ​ឃើញ​ប្រពន្ធ​ខ្ញុំ មាន​អារម្មណ៍​ប្លែកៗ តែ​មុន​សម្លាប់ ខ្ញុំ​មិនបាន​វ៉ៃ​នាង​ទេ​។ ខ្ញុំ​យក​កាំបិតប៉័ងតោ​ពណ៌​ស មក​អារ​បំពង់ក​ពីមុខ ហើយ​ពីមុន​ខ្ញុំ​ធ្លាប់ប្រើ​គ្រឿងញៀន តែ​ឥឡូវនេះ​អត់​បាន​ប្រើ​ទេ​»​។

មន្ត្រីនគរបាល​ប៉ុស្តិ៍​បឹងកក់​ទី​ ១ ​មួយរូប​ស្នើសុំ​មិនឱ្យ​បញ្ចេញ​ឈ្មោះ​បាន​និយាយប្រាប់​តាម​សាក្សី​នៅ​ថ្ងៃទី​ ២៩ ​ឧសភា ថា ករណីនេះ​លោក​មិនអាច​ប្រាប់​ពី​ឈ្មោះ​ស្ត្រី​រងគ្រោះ​បានទេ ដោយសារ​តែ​ខុស​វិជ្ជាជីវៈ តែ​ជនសង្ស័យ និង​ប្រពន្ធ​ដែលជា​ស្ត្រី​រងគ្រោះ​នោះ​មាន​កូន​ប្រុស​ម្នាក់​អាយុប្រមាណ​ ៣ ​ឆ្នាំ មក​ស្នាក់នៅ​បណ្តោះអាសន្ន​ដោយ​ជួល​បន្ទប់​លេខ​ ១៥ ក្នុងភូមិ ​៤ សង្កាត់ បឹងកក់​ទី​ ១ ខណ្ឌ​ទួលគោក​។ ប៉ុន្តែ​កូនប្រុស​ម្នាក់​នោះ​ត្រូវបាន​ស្ត្រី​រងគ្រោះ​យក​ទៅ​ផ្ញើ​ម្តាយ​ឪពុក​បង្កើត​របស់​នាង​ឱ្យជួយ​មើលថែ​នៅឯ​ស្រុកកំណើត​ខេត្តតាកែវ​។

ចំណែកឯ​ស្ត្រី​រងគ្រោះ​បម្រើការ​ជា​អ្នក​ធ្វើ​អនាម័យ​នៅ​បុរី​សាន់វ៉េ​។ មន្ត្រីនគរបាល​រូបនេះ​បន្តថា ហេតុការណ៍​សម្លាប់​នេះ​អាច​កើតឡើង​មុន​ម៉ោង​ ៧​ យប់​ថ្ងៃទី​ ២៧​ ឧសភា ឆ្នាំ​ ២០២២ ហើយ​សមត្ថកិច្ច​របស់​លោក​ទទួល​បាន​ដំណឹង​នៅ​ម៉ោង​ ៧​ យប់​ថ្ងៃ-​ខែ-ឆ្នាំ​ដដែល​ បន្ទាប់ពី​អ្នករស់នៅ​ក្បែរ​បន្ទប់​ប្រទះឃើញ​ស្ត្រី​រងគ្រោះ​ដេកស្លាប់​មាន​ប្រឡាក់​ឈាម​នៅក្នុង​បន្ទប់​ម្នាក់ឯង​។ បន្ទាប់មក​អ្នកភូមិ​បាន​ទូរស័ព្ទ​រាយការណ៍​ប្រាប់​នគរបាល​ប៉ុស្តិ៍​បឹងកក់​ទី​ ១ ​ហើយ​សមត្ថកិច្ច​មូលដ្ឋាន​បាន​រាយការណ៍​បន្តទៅ​ជំនាញ​នៃ​ស្នងការដ្ឋាន​នគរបាល​រាជធានី​ភ្នំពេញ​តែម្តង​។

មន្ត្រីនគរបាល​ដដែល​បាន​ថ្លែងថា​៖ «​ស្ត្រី​រងគ្រោះ​ឃើញ​មាន​ស្នាម​អារ​ដាច់​បំពង់ក ហើយ​ដេក​ផ្កាប់មុខ​លើ​កម្រាល​ឥដ្ឋការ៉ូ​។ នៅក្នុង​បន្ទប់​នោះ​រស់នៅ​តែ​ ២ ​នាក់​ប្តី​ប្រពន្ធ​ទេ​»៕