ភ្នំពេញៈ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុនឹងចាប់ផ្តើមធ្វើការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ សម្រាប់ឆ្នាំ ២០២២ ចាប់ពីដើមខែមិថុនារហូតដល់ចុងខែវិច្ឆិកាឆ្នាំនេះ រីឯអាជ្ញាធរមានសមត្ថកិច្ចក៏នឹងត្រួតពិនិត្យការប្រកាសបង់ពន្ធ និងពិន័យអ្នកដែលមិនបានប្រកាសបង់ពន្ធពីថ្ងៃទី ១ ខែមករា ឆ្នាំ ២០២៣ ផងដែរ។
អគ្គនាយកដ្ឋានពន្ធដារឱ្យដឹងនៅថ្ងៃទី ២៧ ឧសភា ស្តីពីការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ ២០២២ ថា ការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ ២០២២ នឹងត្រូវដាក់ឱ្យអនុវត្តចាប់ពីថ្ងៃទី ១ ខែមិថុនា រហូតដល់ថ្ងៃទី ៣០ ខែវិច្ឆិកា ឆ្នាំ ២០២២ តទៅ។
ម្ចាស់យានយន្តគ្រប់ប្រភេទត្រូវដាក់លិខិតប្រកាស ឬយកមកជាមួយនូវបណ្ណសម្គាល់ការបង់ពន្ធលើមធ្យោបាយ ដឹកជញ្ជូន និងយានជំនិះគ្រប់ប្រភេទ និងធ្វើការបង់ពន្ធនៅសាខាពន្ធដារខេត្តខណ្ឌ ឬនៅតាមធនាគារមួយចំនួនដែលមានកិច្ចសហការជាមួយអគ្គនាយកដ្ឋានពន្ធដារ។
ធនាគារដែលម្ចាស់យានយន្តអាចបង់ពន្ធបានមានដូចជានៅធនាគារកាណាឌីយ៉ា ធនាគារអេស៊ីលីដា ធនាគារវឌ្ឍនៈ ធនាគារកម្ពុជាសាធារណៈ ធនាគារជេត្រាស់រ៉ូយ៉ាល់ ធនាគារស្ថាបនា ធនាគារប្រៃសណីយ៍កម្ពុជា ធនាគារវឌ្ឍនៈអាស៊ីចំកាត់ ធនាគារពាណិជ្ជកម្មក្រៅប្រទេសនៃកម្ពុជា ធនាគារដែលបានចុះអនុស្សរណៈនៃការយោគយល់គ្នាជាមួយក្រសួងសេដ្ឋកិច្ច និងហិរញ្ញវត្ថុ ឬអាចបង់តាមរយៈកម្មវិធី «GDT Taxpayer App»។
អគ្គនាយកដ្ឋានពន្ធដារបញ្ជាក់ថា៖ «ចំពោះយានយន្តដែលជាកម្មសិទ្ធិរបស់ស្ថានទូត ឬស្ថានកុងស៊ុលបរទេស អង្គការអន្តរជាតិ ឬទីភ្នាក់ងារសហប្រតិបត្តិការបច្ចេកទេសរបស់រដ្ឋាភិបាលនានាត្រូវស្នើសុំមកអគ្គនាយកដ្ឋានពន្ធដារ ដើម្បីទទួលបាននូវលតាបត្របង់ពន្ធ (ពន្ធជាបន្ទុករបស់រដ្ឋ)»។
ប្រភពដដែលបានបន្តថា ចំពោះយានយន្តរបស់ក្រសួង-ស្ថាប័ន ឬអង្គភាពដែលត្រូវទទួលបានលតាបត្រពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ (ពន្ធជាបន្ទុករបស់រដ្ឋ ឬបង់តាមអាណត្តិបើកប្រាក់) ត្រូវភ្ជាប់មកជាមួយនូវបញ្ជីសារពើភណ្ឌយានយន្ត ទ្រព្យសម្បត្តិរដ្ឋ (តារាងកើនឡើង និងថយចុះទ្រព្យសម្បត្តិរដ្ឋប្រចាំឆ្នាំ) ដែលបានចុះបញ្ជីនៅអគ្គនាយកដ្ឋានទ្រព្យសម្បត្តិរដ្ឋ និងចំណូលមិនមែនសារពើពន្ធនៃក្រសួង-សេដ្ឋកិច្ច និងហិរញ្ញវត្ថុ។
ចំពោះយានយន្តឯកជនជ្រកក្រោមស្លាកលេខរដ្ឋ ស្លាកលេខ ខ.ម និង ន.ប ពុំអនុញ្ញាតឱ្យបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ ២០២២ ទេ។ ម្ចាស់យានយន្តទាំងនេះអាចបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ ២០២២ បាន លុះត្រាតែបំពេញកាតព្វកិច្ចពន្ធ និងអាករនាំចូលស្របតាមច្បាប់ និងបទប្បញ្ញត្តិ ស្តីពីគយ និងចុះបញ្ជីយានយន្តនៅក្រសួងសាធារណការ និងដឹកជញ្ជូនឱ្យបានរួចរាល់ជាមុនសិន។
អគ្គនាយកដ្ឋានពន្ធដារបញ្ជាក់ថា៖ «ចាប់ពីថ្ងៃទី ១ ខែមករា ឆ្នាំ ២០២៣ តទៅ អគ្គនាយកដ្ឋានពន្ធដារនឹងសហការជាមួយអាជ្ញាធរមានសមត្ថកិច្ច ដើម្បីចុះត្រួតពិនិត្យ ការប្រកាសបង់ពន្ធ និងធ្វើការពិន័យចំពោះម្ចាស់យានយន្តទាំងឡាយណាដែលមិនទាន់បានប្រកាសបង់ពន្ធក្នុងឆ្នាំកន្លងមក តាមច្បាប់ស្តីពីសារពើពន្ធជាធរមាន»។
ការប្រមូលពន្ធលើយានយន្តក្នុងឆ្នាំ ២០២១ អគ្គនាយកដ្ឋានពន្ធដារបានប្រមូលពន្ធលើមធ្យោបាយដឹកជញ្ជូនបានប្រមាណ ៩៣ លានដុល្លារពីយានយន្តជិត ៨០ ម៉ឺនគ្រឿង ស្មើនឹង ១៧៤,២ ភាគរយនៃផែនការឆ្នាំ ២០២១ កើនជិត ៨ ភាគរយ បើធៀបនឹងរយៈពេលដូចគ្នា ឆ្នាំ ២០២០។
ប្រធាននាយកដ្ឋានពន្ធចលនទ្រព្យ និងអចលនទ្រព្យនៃអគ្គនាយកដ្ឋានពន្ធដារ លោក ខឹម តុលា ធ្លាប់បាននិយាយថា ចំនួនអ្នកបង់ពន្ធលើមធ្យោបាយដឹកជញ្ជូនបានកើនឡើងលើសផែនការនេះ ដោយសារតែការដាក់ឱ្យដំណើរការបង់តាម App GDT Taxpayer គួបផ្សំនឹងអ្នកបង់ពន្ធមានការភ្ញាក់រឭក៕